¹ Achiwaambira, “Amini nawaambira, wakuko baadhi yenu wadzioema hahu wario kuwandatata kufa kabla ya kuwona ufalme wa Mlungu uchidza pkwa nguvu.” ² Na baada ya siku handahu Jesu wewahala Petro, Yakob na Yohana hamwenga naye dzulu ya murima hachiyao, kisha achigeuka sura mbere yao. ³ Mavazige aching’ala sana, meruhe kuriko arivyo mtu yeyosi duniani andeweza kuyang’arisha. ⁴ Kisha Eliya hamwenga na Musa eomborera mbere yao, nae kala wa chizungumza na Jesu. ⁵ Petro wejibu achimwambira Jesu, “Mwalimu, ni vidzo sisi kukala hah ana hudzenge vibanda vihahu, chimwenga pkwa ajiliyo, chimwenga pkwa ajili ya Musa na chinjine pkwa ajili ya Eliya.” ⁶ Pkwa kukala kamanyire kugomba maana eogoha sana. ⁷ Ingu richidza na richiwafinika, kisha sauti ichombola kahiza riro ingu, “Yuyu ni mwanagu mhenzwi, msikizeni iye.” ⁸ Ghafla wariholola kuku na kuku kawamonere kaheri mtu yeyosi hamwenga nao isihokala Jesu tu. ⁹ Warihokala wanateremka kombola mrimani, achiwaamuru wasimwambire mtu yeyosi gago gosi wadzigogaona, mpaka mwana wa Adamu andihofufuka kombola pkwa wafu. ¹⁰ Pkwa vivyo wachika jambo riro ndani ya mioyo yao enye lakini ejadiliana ao pkwa ao ninoni maanaye “Kufufuka kombola pkwa wafu.” ¹¹ Emuza Jesu, “Pkwa noni aandishi ni kugomba lazima Eliya adze pkwanza?” ¹² Achiwaambira, “Eliya yunadza pkwanza kudzia mambo gosi. Pkwa noni basi yeandipkwa kukala idzimpasa mwana wa Adamu kupata mateso manji kudahauliwa? ¹³ Lakini nawaambira ya kukala Eliya wegonya kudza na wachimhendera warivyohenza hehe irivyoandipkwa dzuluye.” ¹⁴ Na walihofika pkwa anafunzi, eona kundi bomu rudzuwazunguka na andiki ekala wanabishana nao. ¹⁵ Na maha waribomona Jesu, kundi hosi heshangaa na kumuchimbirira kumulamusa. ¹⁶ Wewauza anafunzie, “Mnabishana nao dzulu ya noni?” ¹⁷ Mtu kahiza umati wemjibu, “Mwalimu, nidzimreha mwanagu pkwako yuna hoho chafi inayo muhenda asiweze kumba. ¹⁸ Nikumkamata na kumubwaga hotsi, naye yunamboza povu mlomoni na kugaga meno na kukala mgumu. Nidziwavoya anafunzio wamomboze iye pepo lakini kawawezere. ¹⁹ Achiwajibu, “Chiviazi chisichoamini nindakala namwi hata rini? Nindawavumira mpaka rini? Mreheni pkwangu?” ²⁰ Wachimreha iye mvulana pkwapkwe. Roho mchafu arihomona Jesu, ghafla yemwenjiza kahiza kutetemeka. Mvulana wegwa hotsi na komboza povu mlomoni. ²¹ Jesu wemuza babaye, “Wekala kahiza hali hii pkwa muda wani?” Baba wegomba, “Hangu uhoho. ²² Mara zinjine nikumubwaga kahiza moho au pkwenye madzi na kujahibu kumwangamiza chikala unaweza kuhenda chochosi huhurumie na uhusaidie.” ²³ Jesu wemwambira, “Chikala unaweza? Chila chitu chinawezekana pkwa yeyosi aaminiye.” ²⁴ Ghafla baba wa mhoho wekiri na kugomba, “Naamini, nisaidie kusokuamini pkwangu.” ²⁵ Wakati Jesu arihoona kundi rinachimbirira pkwao, wemkemea roho mchafu na kugomba, “Uwe hoho bubu na chiziwi, nakuamuru ombola pkwapkwe, usimwenjire kahehi.” ²⁶ Weriha na kumhangaisha mvulana pkwa nguvu na kisha achimombola. Mvulana weonekana hehe yudzefa. Ndiho anji wachigomba, “Yudzefa,” ²⁷ Lakini Jesu wemhala pkwa mkono achimunula, na mvulana Achema. ²⁸ Wakati Jesu ariho enjira ndani ya nyumba, anafunzie emuza pkwa faragha, “Pkwa noni kuhuweza kuyomboza?” ²⁹ Achiwaambira, “Ainaii kayombola isihokala pkwa mavoyo.” ³⁰ Wachombola haho na kuchiriha Galilaya kahenzere mtu yeyosi amaye wariho. ³¹ Pkwa kulama wekala yunafundisha anafunzie, Achiwaambira, “Mwana wa Adamu yundalaviwa mikononi mwa atu, na wandamolaga. Andihofa, baada ya siku tahu yundafufuka kaheri.” ³² Lakini kawelewere maelezo gaga na eogoha kumuza. ³³ Ndiho efika Kaperinaumu. Baada ya pkwenjira ndani ya nyumba achiwauza, “Mdzikala mnafadili noni njirani?” ³⁴ Lakini ekala chimya pkwani ekala wanabishana njirani kukala nani adzikala mubomu zaidi. ³⁵ Arihosagala hotsi achiweha kumi na airi hamwenga na achiwaambira, “Chikala yeyosi yunamala kukala wa pkwanza ni lazima akale wamwisho na mtumishi wa osi. ³⁶ Achimhala mhoho mtite achimwika kahikahi yao. Achimhala kahiza mikonoye achiwaambira, ³⁷ “Yeyosi amhocheraye mhoho hehe yuyupkwa dzina rangu pia yudzinihochera mimi na ichikaa mtu yudzinihochera mimi tu, lakini pia aliyenihuma.” ³⁸ Yohana achimwambira, “Mwalimu, hudzimona mttu yunamboza pepo pkwa dzinaro na hukamzulia pkwa sababu kahutua.” ³⁹ Lakini Jesu achigomba, “Msimzulie pkwa kukala kakuna andiyehenda kazi bomu pkwa dzina rangu na ndiho kisha baadaye agombe neno baya hohosi dzulu yangu. ⁴⁰ Yeyosi asiyekala chinyume nasi yuu pande wehu. ⁴¹ Yeyosi andiyekupa chikombe cha madzi ga kunua pkwa dzina rangu uwe ni wamasihi. Amini nawaambira Kanda thawabuye. ⁴² Yeyosi awakoseshaye mmwenga waho wa atite aa waniaminio mimi kudzipkwala indekala vidzo pkwapkwe kufungiwa dziwe ra kusagiha singoni na kutsuhiwa baharini. ⁴³ Chikala mkonii uchikukosesha ukate, ni baha pkwenjira kahiza uzima bila mkono kuriko pkwenjira kuzimu uchikala na mikono yosi kahiza moho usiozimika.” ⁴⁴ Hatu ambaho funza kuwafa na moho usiozimika (Kaumo kahiza nakala za kapindi). ⁴⁵ Chikala chegulu uchikukosesha ukate. Ni vidzo pkwako pkwenjira uzimani uchikala chirema kuriko kutsuhiwa kuzimu na magulu mairi. ⁴⁶ Hatu hariho funza kawafa na moho usioweza kuzimika.” ⁴⁷ Chikala dzitsoro richikukosesha ring’ole. Ni vidzo pkwako pkwenjira kahiza ufalme wa Mlungu uchikala na dzitso mmwenga kuriko kukala na matso mairi na kutsuhiwa kuzimu. ⁴⁸ Hatu harihofunza ao kawafa na moho usiozomika. ⁴⁹ Pkwa kukala chila mtu yundenjizwa munyu pkwa moto. ⁵⁰ Munyu nu mudzo, lakini chikala munyu uchangamiza ladhaye, unawezadze kuihenda ukale munyu kaheri? Mkale munyu mwimwi pkwa mwimwi na mkale na Amani chila mmwenga na mnjine.”