SURA YA 7

1 Mafarisayo na baadhi ya aandishi warioekala wadzomborera Yerusalemu ekusanyika wachimzunguka Jesu. 2 Na mafarisayo na aandishi eona kukala baadhi ya anafunzie ehia mkahe pkwa mikono michafu iyo kai dhaoga. 3 Pkwa kukala mafarisayo na aandishi osi kawaria mpaka waose mikono yao tototo wanagwieiea utamaduni wa azee. 4 Mafarisayo wahouya kombola hatu ha soko kawaria mpaka waoge pkwanza, na kuna sheria zinjine arizo wanazifua kabisa, chikala na hamwenga na kojesa vikombe, masufuria, vyombo. 5 Mafarisayo na aandishi emuza Jesu, “Pkwa noni anafunzio kawatii na kuzifua utamaduni wa azee ehu, wanaria chakuria hasiho koga mikoni?” 6 Lakini iye wewaambira, “Isaya wetabiri tototo kuhusu mwimwi mafarisayo na aandishi wanafiki, weandikwa atu aa wanariheshimu pkwa milomo yao, lakini mioyo yao ikure na mimi. 7 Wananihendera ibaada zisizo na maana, wachifundisha sheria za anadamu here mahochoho gao. 8 Mdziiricha sheria ya Mlungu na kugwirira pkwa tamaduni za azee enu.” 9 Jesu achiwaambira mwezikahala amri za Mulungu pkwa kukala mtunze tamaduni zenu! 10 Pkwa kukala Musa wegomba, mheshimu babayo na mameye, na iye amhukanaye babaye au mameye hakika yundafa. 11 Lakini mnagomba, “Hene mtu achogomba chitu cha kumwahidi babaye au mameye cha msada wowosi ario mndeehochera kombola pkwangu ni hazina ya kanisa,” vivyo ni kugomba kukala, nidziwomboza pkwa Mulungu? 12 Vivyo kuruhusu mhoho kuhenda jambo rorosi pkwa ajili ya babaye au mameye. 13 Mnazihenda amri za Mlungu kukala bale pkwa kuheha tamaduni zenu, mnahende manji ga jinsi iyo ganagohalana.” 14 Jesu weweha makutani kaheri na kuwaambira, “Mnisikize mimi, mwimwi mosi na mpate kunelewe. 15 Kakuna chakuria chochosi chombolacho konze ya mtu aricho chinaweza kumchafua mtu chenjiracho ndaniye, ni chicho agombacho mtu chicho chimchafuacho. 16 Chikala mtu yeyosi yuna masikiro ga kusikira na asikire jambo hiri na aelewe.” 17 Jesu ahouricha umati wa atu pkwenjira nyumba, anafunzie wachimza kuhusu mfano uo. 18 Jesu achigomba, “Na mwimwi pia bado kamdza elewa? Komona kukala chakuria chochosi chimwinjiracho mtu kachiweza kumuchafua. 19 Pkwa kukala chaweza pkwenda pkwenye moyowe, lakini chinaenjira pkwenye tumbo ye na kisha chinatsuoa pkwenye choo, pkwa maelezo gaga Jesu wevihenda vyakuria vyosi kukala vidzo. 20 Jesu achigomba chicho chicho chinamombola mtu ndani chicho ndochimchafuacho. 21 Pkwa kukala nikombola ndani ya mtu, ndani ya moyo nikombola Mawazo maovu, usherati, wevi, walogaji, 22 uzinzi, tamaa mbovu, ubaya, ukengaji, ufisadi, wivu, kukashifu, madzivuno, ujinga. 23 Maovu gaga gosi ganaombola ndani nag ago ndigogamchafuango mtu.” 24 Jesu welamka kombola haho harihokala yusegehe na kuka pkwenda kahiza mkoa wa Tiro na Sidoni. Weinjira ndani na kahenzere mtu yeyosi amanye kukala wekala haho, lakini kaiwezekanire kumfitsa. 25 Lakini shafula mwanamhe wekudza pkwa Jesu ariye mhohowe mtite wekala na roho chafu. Weikira habarize achidza na kubiga mavindi maguluni pkwapkwe Jesu. 26 Mwana mche iye wekala myunani wa kabila ra Kifoenike wemgwira Jesu amwinge pepo ombole pkwa bintiye. 27 Jesu achimwambira mwanamche wariche ahoho wariswe pkwanza chakuria pkwa kukala sisiwa kuhala chakuria cha ahoho na kuwatsuhira kuho.” 28 Lakini iye mwanamche achimjibu na kugomba, “Nivivyo Bwana hata kuko tsini ya maza ni kuria mabaki ga chakuria cha ahoho.” 29 Jesu achimwambira, “Pkwa kukala unaamini vivyo, uhuhu pkwenda pepo yudzimombola binti yo.” 30 Mwanamche weuya nyumbani pkwapkwe na achimona bintiye yuhehe chifa ndani na pepo wekala yudzombola. 31 Yesu weombola kaheri konze ya mkoa wa Tiro na kutsupira Sidoni pkwelekea baharini ya Galilaya mpaka kanda ya Dekapoli. 32 Na wachimrehera mtu ariekala na makoto na wekala kaweza kunena tototo, emusihi Jesu aike mikono dzuluye. 33 Jesu weomomboza mtu yuyu konze ya kukutana pkwa sihi na achika vyialavye pkweye masikiloge na baada ya kutsitsa mahe weguta ulimiwe iye mtu. 34 Jesu welola dzulu Mlunguni, achihema na kumwambira, “Efatha,” vivyo ni kugomba “fuguka!” 35 Na mda uo uo masikito gachifuguka na chirichokala chizulia lulimi chebanangwa na achiweza kugomba tototo. 36 Na wewaamuru wasimwambire mtu yeyosi lakini kadhi arivyowaamuru, vivyo ndivyo warivyo tangaza habari zizo pkwa unji. 37 Hakika eshangazwa na kugomba, yuhenda chila chitu tototo. Hata yudzigahneda makoto kusikira na mabubu kunena.