¹ Kiisa sabhato, á kpala wa bhusi bhi itatika poso, Malia ma Magadhala ka na Malia i mamo bhakena i koena bhudjako. ² Ka bhona, i bha na bhaningina ta dhene á kisi; ngo n'tambia tomoi wa Bhwáná ú dhulua á ikulu la nguvfa, á kpungbula libhoi, ka á djumana á ikulu láaó. ³ Ali yese ibha toku mpena, ka ngombie ese ébha ngbúu toku lobhundji bhundji. ⁴ Bha sindili bhu kpokpuma na bhuwa, ka bha óuwa toku bhaa bhu ógwa. ⁵ Nge n'tambia á geya livfia, ka avfia na bhali: anganu, nu ónduai yanu; ngo édjibhi taa nun'vfungalie Yesu undjo ubhia n'gogilane. ⁶ Andje tese dyano; ú úmua, toku uvfia. Ukai, énai égula éyo úbhia mulalé, ⁷ Kenai mangba langba kosowai bhatende bhese taa úbha mu ómuwe anga bhaa bhu ogwa. Ka énai, á kena ápele nanu á galilaya: i dyoowa nune. ⁸ Bha esa mangbalangba á bhudjako, na bhuwa ka na isea ta dhene, ka bhakena mavfi ikobhasowa bhatende abhali undjo. ⁹ Ka énai, Yesu éka iko bhagboka ka avfia: yanesalimia nuwe. Bham'bhambha dyulu la idunga makulu mese, ka bhu tshuma malu á pele nana. ¹⁰ Ngo Yesu á bhasowa: mbese nuwe i óndua; kénai ikosowa bha monima bhakeni á Galilea: bha indenie dyoowa. ¹¹ Dyaa bhubhia na paki, bhaamo bha sudha bha sindili, bhutangana á ndei ya dhene, ka bha sumula anga bha dumanga bha bhakoli étopa iyo ikiana. ¹² Bhubhano, ambusa na ibho ikumanila na bha gagulu ka ambusa na iyakana makoko, bha owa bha sudha bhilinge ta bhigi, ¹³ Na ivfia: vfiai: bhatende bhese bhu idja bhotiyo i kon'teiya, dyaa tubhia tolo. ¹⁴ Ka ani Guluveneli óka, tun'dyedyie, ka tune ésisi nuwe á azabho. ¹⁵ Bhasudha bhu geiya bhulinge, ka bhu kia iyo bhu bhasowa. ka abhali undjo ú andala anga bhayuda, mpaka bhusi bhuno. ¹⁶ Bhatende ta bhúu na womo tomoi, bhukena á Galilea, ikulu la n'tala úwo úbhalaka. ¹⁷ Dyaa bhú mená, bhu tshuma malu apele náná. Nge bhaamo bhu bhia na nganyi. ¹⁸ Yesu, na ibha bhamba, ábhasowa dyitano: lokulu lutopa lúbhia lu owané angami ikulu la nguvfa ka na á kisi. ¹⁹ Kenai, kiai á bhiki ta bhitopa bha gwali bhatende; na ibha djinisia á linya la Tita, la mona ka na la mpumatima wa kéngo, ²⁰ Ka ubha gulusiai iesimia metopa miyo inevfanisia nuwe. Ka énai, énanu masi matopa mpaka á tútútú wa kisi.