¹ Daa bha ouwa tshukedhe na Yelusalema, ka dyaa bha ouwa Betifage, nai ekeka n'tala wa Mizeutuni, yese atuma bhatende ta bha vfili; ² Na ibha sowa: kenai á ndei iyo ya apele nanu; nugbokie dyokaa, falasa wa mwali n'sangie, ka mona wese egula tomoi, ubha sangula, ka ubha dhisia anganu. ³ Ani, mushe aanesowa nuwe ema ta emoi, ú manyulai: Bhwáná ú nakulu nabho. Ka ketetino, ubhatikilie ikena. ⁴ Ngo, ino yakiana ambusa taa ya akisiana iyo ibhia ekokoliane na nkanga: ⁵ Vfia na n'seke wa Sayuni: ena, nkota wai ane idjila, muidjale na inedhulusia ka á kpata ikulu la falasa, na mona wa falasa, na falasa wa mwali. ⁶ Bhatende bhukena ka bhukia iyo Yesu ubha lúusia. ⁷ bhudisia falasa ka na mona wese, bhu avfisia ikulu labho ngombe djabho, ka bha djumanila ngombe djio ikulu la falasa. ⁸ Nabhugi wa bhushe á dyombo bhu alilia ngombe djabho á paki; bhaamo bhutina mitavfi ma bhiti ka bha alilia djokuto á paki. ⁹ Bhaa bhu kina á pele, ka bhaa bhu mika Yesu, bhu dyoma: Ozana anga mona wa Daudi! A bhalikiwa undjo i idja na linya la Bhwáná! Ozana á bhigula bha bhiete ikulu! ¹⁰ Dyaa ulumia á Yelusalema, ndei ya dhene etopa ya sangala, ka bhubhavfia: neni unoo? ¹¹ Dyombho likpetania: i yese, n'kanga, wa Nazaleti á Galilaya. ¹² Yesu á lumila á yavfulu ya Mbali. Asaga bhatopa bhaa bhubhi kulusia ka bhaa bhubhi kula á semele na yavfulu ya Mbali; ú kpungbula mesa ma bhaa bhubha lenganisia bhulinge, ka bhigula bha bhaa bhubhi kulusakia bha ndjiwa. ¹³ Ka á bha sowa: ibhia ekpaluane: yavfulu yami igwali ebhisiane yavfulu ya ivfema. Nge nuwe naikia egula ya bha aga bhuhse. ¹⁴ Bhaa bha na bhutiti ka na bhaa bha na mabhunga bhan'bhamba á yavfulu ya Mbali. Ka abhabhikisia. ¹⁵ Nge bhadumanga bha bhakoli ka na bha kpalua bha ena ebhibhi, na iena bhima bha bhikako bhio úkia, ka toku bhana bhubhi dyoma áyavfulu ya Mbali: Ozana anga mona wa Daudi! ¹⁶ Bhan'sowa: uokie iyo bha vfie? yadjelia, Yesu abha manyula. Nundjemo anu bha some mavfia maa: wapata obibo luo á anyuwa wa bhana ka na anga bhaa bha bhumie? ¹⁷ Ka, na ibhatikila, avfundua á ndei ya dhene na ikena á Bhetania, dyaa ú lala. ¹⁸ Kapindi, na ikpudha á ndei ya dhene, oka egwa. ¹⁹ Na iena eti á paki, á ibhamba; nge á kogboka ese ku poli, ka á isowa: angai si bhutale ese puma! ka kudyokaa eti iyoma. ²⁰ Bhatende bhaa bhu ena eyo, bha sangala ka bhuvfia: namuna yania eti ino ya óma á wakati yokuno? ²¹ Yesu abha manyula: yanesowa nuwe angili, ani nubha gwala na idjelia ka na mbese anganyi, mbese ta ku nubhakia yoku iyo ibha ekiane á eti, nge dyaa nubhavfia na n'tala úno: ésa dyaa ka ú djituwa á semele na obingi la dhene, amba iyo ikiana. ²² Bhitopa bhiyo nu vfemie na idjelia na ivfema; nu li údhúwe. ²³ Yesu úkena á yavfulu ya Mbali, ka, dyaa ubhigulusia, bhadumanga bha bhakoli ka bhagagulu bha bhushe bhu idja ikonsowa: na lúúsa ya neni okiie bhima bhio, ka neni undjo uneowa lúúsa luwo? ²⁴ Yesu ubhakpenania: ine iye nuwe dyokuto; ka, ani na li manyula, énesuu nuwe na lúúsa la néni ikiie bhima bhio. ²⁵ Idjinisia Yoani, li idja niya? á ikulu la nguvfa, ao anga bhushe? Nge bhu waza ibho bhakulu bhaao; ani ta manyula: á ikulu la nguvfa, utusauwe: mungusa wa endje kotiyo nun'djelie anu? ²⁶ Ka ani ta manyula: anga bhushe, tuna bhuwa bha dyombo, mungusa bhatopa bhu mena Yoani toku n'kanga. ²⁷ Ngo bhum'manyula Yesu: tundje djibhiasu. Ka ubhasowa á mungo ú wese: émi mbese, indjene saweami nuwe na lúúsa la neni eküe bhima bhio. ²⁸ nuwazie titani: mushe tomoi ubhia na bhana ta bhavfili; ka, avfia na wapikilie, avfia: monami, kena ko kambi bhusi bhuno á bhole bhami bha mizabhibho, ²⁹ Akpetania: indje ondue ami. Ambusa, adjibhasia, ka úkena. ³⁰ Na ine sowa womo: avfia namuna ku temoi. Ka mona undjo á kpetania: ya onda ekima Bhwáná. Ka sa kene ese. ³¹ Wania á bhaa ta bhavfili, akia iyonda la Tita? bhan'kpetania: wapikilie. Ka Yesu abha sowa: yanesowa nuwe angili, bha Pibilika ka bha mavfanyi bha lumili apele nanu á bhukota bha Mbali. ³² Ngo Yoani ú idja anganu á paki ya bhu endjini, ka nu n'djelie anu. Nge bha Pibhilika ka na bha mavfanyi bhun'djelia idje, ka nuwe, bhaa nu ena iyo, nu bha anu dyokuto bhadji bhasie na inen'djelia. ³³ Okai mbendo yomo. ibha na mushe tomoi, mukula yavfulu, undjo úóna eti tomoi, ya muzabhibhu, á kulunhila na bhakako bha bhiti, útshiya litshiya la ikukula puma á semele, á kpela ékpangulu, á avfisia bha kambia, ka akena á ékita iyomo. ³⁴ Dyaa wakati wa ikola lu idja, atuma bhushe bhese bha mokambo anga bha kambia bha bhole, mungusa wa ikogeia puma dja bhole. ³⁵ Bha kambia bha bhole, na ibha dunga bhushe bhese bhaa, bhum'bhitila tomoi, bham'mula womo ka bhan'kulia wa masaso mambuo. ³⁶ Utúna kaamo bhamo bhushe bha mokambo, bhagi iyeta bhaa bha pikilie, ka bha kambia bha bhole bhu bha kia namuna ku temoi toku bha pikilie. ³⁷ A tútútú, antuma angabho mona wese, na ivfia: bha mesimie mona wami. ³⁸ Nge, dyaa bhakambia bha bhole bhu ména mona, bhasowana ibho ngungu: úno ú wa bhotiko; ukai, túmúlai, ka tugeya tiko yese. ³⁹ Ka bhan'dunga, bhan'kulia á bhovfo na bhole, ka bha mula. ⁴⁰ Dyaa, wakati uwo mukula wa bhole bha mizabhibu ú idjie, úkú indje na bha kambia bhaa? ⁴¹ Bhan'manyula: Úbha oluwe ta ébhibhi bhúwo anga bha kambia ibhamo, bhaa bha múuwe puma á wakati wa ikuwa puma. ⁴² Yesu abhasowa: nundje anu bhasome á makpalua: libhoi lio lituwana na bhaa bhubhi kpela, li óuwa libhoi la kóko á mangano ma djogubho, i anga Bhwáná iyo li idja, ka i maadjabho á madjo masu? ⁴³ I na éyo, yanesowa nuwe, bhukota bha Mbali bhu gwalie bhu esisiane anganu, ka bugwalie bhu ówané á ékita iyo i óuwe puma. ⁴⁴ Undjo ú kúuwe á libhoi liyo ú libhunuwe, ka anga undjo li n'kulie ugwali n'gbotané. ⁴⁵ Ambusa na iyoka mbendo djiyo, bhadumanga bha bhakoli ka na bha Falisayo bhú djibha taa i dyulu labho liyo Yesu ubhivfia; ⁴⁶ Ka bhuvfungala inen'dunga; nge bhu ónduwa dyombo, mungusa bhubhi ména toku nkanga.