¹ Yesu na ibhutala á Bheteleemu á Yudheya á evfumbu ya n'kota Elodhe, enai bhaa bha otinga bhundja á lopasika la kapindi bhu kiana á Yelusalema, ² Ka bhuvfia: ú niya n'kota wa bha Yuda undjo ubhutala? mungusa tu ena adaduwa lese á lopasika la kapindi, ka ta eka ikone mabuduwa. ³ Nkota Elodi, na iyoka iyo, ugbegba, ka na bhatopa bha Yelusalema. ⁴ Akumanisila bhadumanga bha bhakuli bhatopa ka na bhakpaluwa bha bhushe, ka abha eiya niya Kilisito ú wezie ibhutala. ⁵ Bhansowa: á Bheteleemu á Yudheya; ngo ena iyo ibhia ekpaluwane na nkanga: ⁶ Ka owe, Bheteleemu, kisi wa Yudhea, undje ai ndei ya buwa á ndei dja dhene dja Yudheya, mungusa angai ivfunduwe n'kota undjo ú dhusiye Isalaeli, bhushe bhami. ⁷ Ngo Elodhi abhisia na sili bhaa bha otinga ka na ibha eiya ta ekima tangiya wakati waniya adaduwa ubhiya mungale. ⁸ Kaa ubhatuma á Bheteleemu, na ivfia: kenai, ka iyayi mbino dja djikima isowa la molemba undjo; dyaa nu n'gbokiye, idjibhisiai, ambusa taa ikeni dyokuto emi mukulu aao ikone mabuduwa. ⁹ Ambusa na ine moka n'kota, bhakena. Ka enai, adaduwa undjo bhu ena á lopasika la kapindi uluvfa apele nabho mpaka dyaa ikiana á ikulu ya egula eyo mona wa molemba ubhiya, á tema. ¹⁰ Dyaa bhu ena adaduwa, bha ouwa na iseya ta ligi. ¹¹ Bhutangana á yavfulu, bhumena mona wa molemba na Malia, nyinya wese, bhutshuma malu ka na ine mabuduwa; bhusangula dyokuto mato mabho, ka bhumuwa zawadi ya Olo, kebhibhi ka na malasi. ¹² Ka Mbali abha owa makoko á bhitoti taa mbese ibho i iganaka anga Elodhe, bhi iganaka á ekita yabho á paki yomo. ¹³ Dyaa bhukena, ena, n'tambiya tomoi wa Bhwáná á midjila Yozefu na bhiloti, ka avfia: Tema, geiya mona wa molemba ka inya ese, kenai mavfi á Edjipito ka djumanai owa mpaka dyokaa ekone sauwe; mungusa Elodhe un'vfungalie mono taa á mulu. ¹⁴ Yozefu á tema, á geiya mona wa molemba ka na nyese botiyo, ka bha djiluta á Egipito. ¹⁵ Bhu djumana owa mpaka dyaa Elodhi ú ogwa, ambusa taa iyakisiana iyo Bhwáná úkkolia na n'kanga: imbhisia mona wami iesa á Edjipito. ¹⁶ Ngo Elodhe, na iyena taa ukombana na bhaa bha na otinga, ouwa na bhusungu ta bhugi, ka atuma iola bhana bhatopa bha mwaka ta mivfili ka na iyeta bhaa bhubhiya á Bheteleemu ka á ndei yese ku etubhu, iyekana na evfumbu iyo bhu okana ta ekima na bhaa bhu bhiya na otinga. ¹⁷ Ngo iyakisiana iyo ibhia ekokoliane na Yelemiya, n'kanga: ¹⁸ Tu oka makuwa á Lama, ndila ka na itelebhana ta ligi: Lakeli sunelila bhana bhese, ka sa ondese taa bhan'ko mula, mungusa bhandje ta abho. ¹⁹ Dyaa Elodhe uogwa, ena, n'tambiya tomoi wa Bhwáná an'vfundulia Yozefu, na bhiloti á Edjipito, ²⁰ Ka avfia: nyinya wese, ka kena á kisi ya Isalaeli, mungusa bhatopa bhaa bhubha mula mona bha ogwa. ²¹ Yozefu atema, ageiya mona wa molemba ka na nyinya wese, ka bha kena á kisi ya Isalaeli. ²² Nge, na iyoka taa Alekelau utabhala á Yudheya á egula ya Elodhi, idjidje, ú onduwa ikena owa; ka, úowana makoko ma Mbali á bhiloti, adjiluta á ndei ya Galilaya, ²³ Ka bhukena idjumana á ndei ya dhene tomoi ebhisiane Nazaleti, ambusa taa iyakisiana iyo ibhia ekokoliane na bhakanga taa: ugwalie mubhisiane wa Nazaleti.