¹ A evfumbu iyo, bhatende bhum'bhamba Yesu, ka bhuvfia: neni ú n'dumanga iyeta bhatopa á bhukota bha ikulu la nguvfa? ² Yesu, na inebhisia mona tomoi wa musu, am'mavfisia á bholigogo bhabho, ³ Ka avfia: yane sowa nuwe angili, ani nasika idji bhasia, ka ani nouwe toku bhana bhasu, nundje tanganianu á bhukota bha ikulu la nguvfa. ⁴ Na eyo, n'lopa undjo udji dhulusie toku mona igwali n'dumanga á bhukota bha ikulu la nguvfa. ⁵ Ka n'topa undjo um'bhigie mona wa musu toku uno, ibhiga emi kubhanene. ⁶ Nge, ani mushe ukia bhubhi anga omoi wa bhana bha bhasu bhaa bhu djelia emi, ekpie angese asingilana á enyi yese libhoi la dhene, ka á kuliana a bhu dhou bhwa obingi la dhene. ⁷ Bhukuku na kisi mungusa bhubhi! Mungusa ekpie ikiana bhubhi; nge bhukuku na mushe undjo bhubhi bhun'kianilie. ⁸ Ani obho wai ao okulu wai i angai likiya la inekoisia, ulitina ka ulituwa ta dhomu nai, iekima angai ilumila á ibhika na libhunga ao na obho tomoi, ngo na igwala na makulu ta mavfili áo na mabho ta mavfili ka na igwala n'kuliane á isala la masi ku matopa. ⁹ Ka ani lidjolai i angai likiya la inekosia, ulibhia la ulituwa ta dhomu nai; iekima angai ulumila á ibhika, na lidjo ta limoi, ngo na igwala na madjo ta mavfili ka igwala n'kuliane á isala la Gehena. ¹⁰ Udjibhonilai na mbese iena bhana bha bhasu bhule, ngo yanesowa, nuwe taa bha tambia bhabho á ikulu la nguvfa bha enie saa etopa bhosio bha Tita undjo ú á ikulu la nguvfa. ¹¹ mungusa mona wa mushe ú idja ikobhikisia bhaa bhu bhola. ¹² Na ena titani? ani mushe ú na mekoko mia temoi, ka tomoi wabho ibhola,andje bhatikiliese bhaa makomo tisa na tisa á ikulu la n'tala, ka á kene ikone n'vfungala undjo ú bhola? ¹³ Ka, ani am'pata, yanesowa nuwe angili, un'seisie iyeta bhaa makomo tisa na tisa bhaa bhabhabho bha bhole. ¹⁴ i namuna ku emoi, undjese na iyonda la idje wanu undjo ú ikulu la nguvfa iyo ibholisie tomoi wa bhaa bha bhasu. ¹⁵ Ani wamo anekilia bhubhi, kena kon'vfanisia bhubhi bhese nuwe nana tabha vfili. Ani aneoko, wa an'toka. ¹⁶ Nge, ani sa ne okeese, geia mushe tomoi áo ta bhavfili; mungusa, mungusa úwo úokana na bha samboli tabhavfili áo tabha saso. ¹⁷ Ani manga asika ibha oka, kianisia munguso úwo á kanisa; ka ani asika dyokuto iyoka kanisa, um'mena toku mupagano ka toku mu Pibhilika. ¹⁸ Yanesowa nuwe angili: etopa iyo nusangie á kisi igwali esange á ikulu la nguvfa, ka etopa iyo nu sangulue á kisi isangulanie á ikulu la nguvfa. ¹⁹ Yanesowa kaamo nuwe taa, ani ta bhavfili anganu bha okano á kisi dyulu la ivfema ema temoi, egwalie iyowane na Tita undjo ú ikulu la nguvfa. ²⁰ Mungusa dyaa ta bhavfili ao ta bhasaso bha bhakumanile ma linya lami, i á semele nabho. ²¹ Ngo Petelo am'bhamba, ka avfia; Bhwáná, mingo imbani e n'samie monima, dyaa wa ikilie bhubhi? igwali ku mingo sabha? ²² Yesu ansowa: sinesawe ami mupaka á mingo sabha, nge mupaka mingo makomo sabha mingo sabha. ²³ Na eyo, bhukota bha á ikulu la nguvfa bhu bhuvfilane na n'kota undjo ú ondue ikia esabho na bha kambia bhese. ²⁴ Dyaa ú kpekisia ibhanda, bhun'disila n'kambia wesu tomoi undjo ubha na vfute ya talanta bhilefu ta bhúú. ²⁵ Toku sabhaese na ema ya ivfinda, Bhwáná bhese ú lúúsia ta bhan'kulusia, idjie, mwali wese, bhana bhese, ka na bhitopa bhio úbha nao ka vfute ya ibha. ²⁶ Nkambia undjo, udji kulia á misia, á kpudha na malu á pele nana, ka avfia: Bhwáná, ibhelia mbani, ka enevfindi bhitopa. ²⁷ Mu idjale na bhukuku, Bhwáná bha n'kambia undjo, antikila á keni ka á n'tikila na vfute iyo. ²⁸ Ambusa na idje ivfunduwa, mushe wa mokambo undjo ukunana na mange nana tomoi undjo ubhia na vfute yese bhilinge miya ta emoi an'dunga ka an'kapatania mokoso, na ivfia; vfinda yami iyo ú naó. ²⁹ Mange nana undjo, á djikulia á misia, an'komula, na ivfia: ibhelia ta bhuwa, ka enevfindie. ³⁰ Nge undjomo saonde ese, ka akena ikon'kulia a mu djalolo mpaka dyokaa ukonvfinda vfute yese. ³¹ Bhange nana bha kambia, na iena iyo ikiana, bha suma sana, ka bha kena ikon'sowa Bhwáná bhabho etopa eyo ya éta. ³² Ngo Bhwáná bhabho am'bhisia n'kambia wa m'bhibhi, inetikila na vfute tami etopa, mungusa wa owe inikomula; ³³ Supasiai ine mugulia mangenai bhukuku, toku ineugulia owe? ³⁴ Ka Bhwáná bhese, á suma, á muwa anga bhaa bha menisie mpuli, mpaka dyaa ukovfinda vfute iyo itopa. ³⁵ Igwali namuna temoi anga Tita wa ikulu la nguvfa unekü nuwe, ani kila mushe anganu sa n'samèè èse. wanyese á mpumatima wese.