¹ Ababwira kandi:Okuli mubwizire,baguma omw'aba bali hano barhakafa,chiru barhanabona oku obwami bwa N'Namahanga bwayisha n'emisi. ² Nenyuma lya nsiku ndarhu,Yesu arhola Petro,Yakobo na Yohana ,anabashonya bone oku ntondo ndi.Enshusho yage yahinduka emalanga gabo; ³ Emishangi yage yalangashana,mwyeru bwenene nkoku nta mulenga en'igulu wakahashire okuijira myeru ntyo. ⁴ Eliya boshi na Musa bababonekera,bashambala na Yesu. ⁵ Petro,ashuza,abwira Yesu:Mwalimu,biri binja rhubere hano;Rhuyubake mahema gasharhu,liguma lyawe,naliguma lya Musa,na liguma lya Eliya. ⁶ Bulya arhali manyire eby'aderha,echoba chali chama bagwarha. ⁷ Echitu chayisha chiri babwika,n'omwecho chotu mwarhenga izu:Oy'ali Mwana wani muzigirwa:Mumuyunve. ⁸ Ho naho Abaganda balol'eburhambi,barhabonga ndi nkaba Yesu yene haguma nabo. ⁹ Amango bayandagalaga kurheng'oku ntondo,Yesu abakomereza oku bamanye barhabwiraga muntu yeshi ebi babwine,kuhik amang'oMwana wo muntu afuka omu bafu. ¹⁰ Basez'ogyo mwanzi,badosanya bone mpu Kokuderha kuchi okufuka omu bafu. ¹¹ Abaganda bamudosa mpu:Bulya gurhi abandisi bakaderha mpu bikwanine Eliya ayishe burhanzi? ¹² Abashuza erhi:Eliya anayishe waburhanzi,n'oku yumanyanya e'bintu byoshi.Na bulya gurhi biba biyandisirw'enyanya lyo Mwana wo muntu oku alibula bwenene n'oku ganyagusibwa? ¹³ Chikwoki mubwizir'oku Eliya ayishire,banamujira nk'oku balilonzize,kushimbana n'oku biyandisirwe enyanya lyage. ¹⁴ Amango bahikaga aha baganda,babona olubaga lunene lubazungulusire,n'abandisi bakagi ja mbaka nabo. ¹⁵ Kurhenga erhi olubaga lubona Yesu,lwasomerwa,n'okulibirhira mpu bamulamuse. ¹⁶ Abadosa:Bichi birhumire muli mwaja mbaka mweshi nabo? ¹⁷ Na muntu muguma muguma omu lubaga amushuza:Mwalimu,nalidwirh'omwana wani emund'oli,oy'alikw'omuzimu wa kaduma. ¹⁸ Nangasi hantu amugwarhira,anamuhirimy'okwidaho;N'omwana anarhondere ayisha ifula,n'okuluma amino,ana ishe adorha.Nahunyire abaganda bawe oku barhenze oyu muzimu,chibarhahashire. ¹⁹ Ewe iburha lirhagwerhi bwemere,Yesu ababwirantyo,kuhika mangachi nabera haguma naninyu?kuhika mangachi namulindirira?Nderheri ye. ²⁰ Bamulerhera ye.Ho naho erhi omwana abona Yesu,omuzimu amuzunguza bwenene;Amurhimb'okwidaho,agaya gaya n'okulerh'ifula. ²¹ Yes ados'ishe:Kurhenga mangahi ebi byarhonderaga?Ashuza erhi,kurheng'eburho bwage. ²² Na kanji kanji oyu muzimu anamukwebe omu muliro,n'omu lwishi ly'amushereza.Chikwone,nkaba hali oku wankahasha,orhurhabale,orhufe bwonjo ²³ Yesu amubwira:Erhi wankahasha!... Byoshi binaka hashikana okuye oyemire. ²⁴ Ho naho ishe wo mwana ayakuza:Injemire!oyish'ontabale oku kurhayemera kwani! ²⁵ Yesu,erh'abona olubaga lulundumana,ashoholera olya muzimu mubi,anamubwira:Muzimu kaduma na ntunva,nkurhegesire,orheng'omwoyu mwana,orhanachi mushubiraga mwo. ²⁶ Anarhenga,n'okuyama,n'okumuzunguza bwenene.Omwana ayorha nk'ofire,kuhika banji baderha mp'afire. ²⁷ Chi Yesu,erh'amugwarha oku kuboko,amuzusa.Naye ayimanga. ²⁸ Erhi Yesu adaha'omunyumpa,abaganda bage bamudosa bufunda:Bulya gurhi rhurha hashire'okuhinv'oyo muzimu? ²⁹ Ababwira:Oyo wantyo arhankarhenga n'agarhali mahuno. ³⁰ Barheng'aho,banayichirir'e Galilaya.Yesu arhali lonzize abantu bamanye. ³¹ Buly'akagi ka yigiriza abaganda bage,ana babwira:Omwana womuntu ayishihanwa omu maboko ga bantu;Bayishi muyirha,na,nsiku zisharhu ahanyuma ly'okuyirhwa,ayishi fuka. ³² Chikwone abaganda barhayunvagy'ako kanwa,banayoboh'okumudosa. ³³ Bahik'e Kapernaumu.Erhi bakola baly'omunyumpa,Yesu abadosa:Bichi mwakagi jira mbaka omu njira? ³⁴ Chikwone bahulika,bulya'omunjira bakagi ja mbaka bone mpu bamanye ndi mukulu kulusha. ³⁵ Lero atamala ahamagala balya ikumi nababirhi,ababwira:Owalonza abe waburhanzi,achijire muzinda wa boshi na mukozi wa boshi. ³⁶ Anarhol'omwana murho,amuyimanz'omukarhi kabo,erhi amurhol'omu maboko gage,ababwira: ³⁷ Ngasi wayankirir'okwi zino lyani muguma waba bana barho erhi nyen'ayankirire;Na ngasi manyankirira, erh'arhali nye ayankirire;Chikwone owa ntumaga. ³⁸ Yohana amubwira:mwalimu,rhwabwin'omuntu oliwahinv'a bashetani okwizino lyawe;rhwama mulahiza,buly'arharhushimba. ³⁹ Murhamu lahizagya,kwo Yesu ashuzize,bulya ntaye muntu wakajir'echisomerine okwizino lyani,aachiri naderha kubi ahanyanya zani. ⁴⁰ Bulya,orhali mushombanyi wirhu erhy'ali oluhande lwirhu. ⁴¹ Nangasi yeshi wamuhe igopo ly'amishi okwizino lyani,bulya muli bantuba Kristu,imbabwizire okuli,arhakaheza oluhembo lwage. ⁴² Chikwone,owasarhaze muguma omwaba bana bayemire,akwanine okushwekerw'olusho omwigosi,bamukwebe n'omunyanja. ⁴³ Akaba kuboko kwawe kwankarhuma wahirima,okutwe,kuli kwinj'okuwe okuj'omu buzine na kuboko kuguma, ⁴⁴ Kulush'okugwarha maboko gabirhi ogali j'omu chihenama,omu muliro gurhazima. ⁴⁵ Akaba kugulu kwawe kwakarhuma wahirima,okutwe,kuli kwinj'okuwe okuj'omu buzine na kugulu kuguma, ⁴⁶ Kulush'okugwarha magulu abirhi ogali kwebw'omu chihenama,omu muliro gurhazima. ⁴⁷ Akaba isu lyawe lyankarhuma wahirima,olimole,kuli kwinj'okuwe odah'omu bwami bwa N'Namahanga n'isu liguma,kulush;okugwarha masu gabirhi ogali kwebw'omu chihenama, ⁴⁸ omu omuvunyu gwabo gurhafwa,n'omuliro gurhazima. ⁴⁹ Bulya ngasi muntu analungwe n'omuliro. ⁵⁰ Omunyu kali kantu kinja;chikwon;erhi omunyu gwankarhenga mw'obununu,bichi mwankachi gulunga mwo?Mugwarhe omunyu omu ndalala zinyu,munabe n'omurhula mwene na mwene.