¹ Unola u mwasi w'Enawetchu w'eshiraa Mika, Mumoreshathi, mwa siku sa Yothamu, ne Ahazi, ne Hezekia, bami b'e Yuda; bibwonekeresi alolaa kwo e ndonga s'e Samaria ne Yerusalemu. ² Munvilyise, mu bandju b'e nyibaa soshi; minvilyise, mu butala na byoshi bilyi mwo; Enawetchu Ongo aamilyis'e ndonga senyu, yi Enawetchu kutenga mwa kanisa kaye katchesibwa. ³ Kwa bushi, mulolae, Enawetchu eshire kutenga e andju aye, naye ang'andaala, n'e kubirata e andju e butala emukire. ⁴ N'ese ndjulungu sika shandabana e masina saye, n'e nyibanda singa berengibwa, ng'okwo e kafuma k'ende kaba e muhondo s'e mulyiro, ng'okw'e meshi m'ende masheshekala mwa mwandaalo ⁵ Kwa bushi n'e bubi bwa Yakobo, ku bine byoshi byayikilyire, na kwa bushi n'e bubi bw'e nyumba ya Israeli. Bu tchiye bu bubi bwa Yakobo? Kute! lyita lya Samaria? Na ngayi u andju a Samaria e mukire nga ata Yerusalemu? ⁶ Kwa bushi n'okwo nyinga yira Samaria kuba nga tchungu mwa kakatchi k'ehwa, na nga bwaso bw'ehwa ly'e mizabibu; nanyi nyinga kabula e makoyi maye mwa lubanda, nanyi nyinga bihula e bibandja byaye. ⁷ N'e shushanyo saye soshi s'e kubesha sanga pundjibwa pundjibwa, n'e kusheresibwa kwa mulyiro, n'e shushanyo saye soshi nyinga siyira sitatchibaa wo; kwa bushi asikundamanyise kwa mukolo w'e buhungu, nase ku sikanaalulwa kwa buhungu. ⁸ Kwa bushi n'okwo nyingayir'e mishibwo n'e kulyira, nyinga enda nakuly'e ndjimba, nyibe buhunzi; nyinga lakanga nga kabwa k'omw'erungu, n'e kulyira nga mbuni. ⁹ Kwa bushi e byulu byaye bitafuma, kwa bushi e nyifu s'eshire kuyik'e Yuda, na lwayikilyir'e lunvi lw'e bandju banyi; na batcha, kuyik'e Yerusalemu. ¹⁰ Mut'eyilyisaa binera e Gathi, mutanalyiraa tchiro n'e hitcha; mwa kakatchi k'e Beth-le-afra, utchialule alule mwa mukungu. ¹¹ Murenge mwa ndjira yenyu, mu bandju b'e Shafiri, mulyi buhunzi na b'e honyi; bandju b'e Saanani mut'elukaa e mbuwa; Beth-eseli walyira, na anga kula e butabare bwaye e mwenyu. ¹² Kwa bushi e bandju b'e Marothi b'endjire balyindjira kwa mbusha e kubwon'e mabuya; si kweyine e busheresi bwa ndaere kutng'emw'Enawetchu. N'e kuyik'e Yerusalemu. ¹³ Muhwek'e farasi yakanya kwa mutchukalyi w'e ndambala, mu bandju b'e Yakishi; yi yabaa e mutondero w'e byaa kwa banyere b'e Sayuni; kwa bushi e bubi bw'e Israeli bwabwonekene e mwawe. ¹⁴ Kwa bushi n'okwo, mung'eresa Moreshth- Gath e lwembo lw'e kula anya; e nyumba sa Akzibu singaba hokololo y'e kuteba e bami b'e Israeli. ¹⁵ Nenyu mu bandju b'e Maresha, nyinga huba kubaretera ola unga batambula; e bukuse bwa Israeli bungayik'e Adalamu. ¹⁶ Mukumul'e matchwe menyu e lwala, mukul'e nvilyi senyu, kwa bushi n'e bana baba shaalusise; muyire e lwala lwenyu lunene, kwa bushi bab'ekire bure mwa lubungo.