¹ Benyewetchu, e bwemere bw'enawetchu Yesu Kristo, Enawetchu w'e bukuse, mutabaa nabo kwa kusima kw'e lubero mwa bandju. ² Kwa bushi ilyi angengilyira mwa sinagogi yenyu e mundju w'et'embete s'e milyinga embere n'e ndjimba sibuya; businda kwingire n'e mukene, ola wet'endji mba sibi; ³ Nenyu mwer'elukengwa oyo wimbe r'endjimba sibuya, n'e kumubira, "Woyo wikale wano alyi abuya!" n'e kubira oyo mukene, "Emanga wawo, ilyi ekala ala maulu manyi!" ⁴ Ilyi mutayilyire e bubi mwa kakatchi kenyu, n'e kuba beshi b'e mandja babi? ⁵ Benye wetchu basimwa, munvilyise, kute, Ongo atahombolaa e bakene b'e butala babe baare b'e bwemere na bakema mwa bwami bula alaanyaa e bamusimire? ⁶ Si mwabo mwera mumuyinyilyire e bukenge e mukene. Kute, e baa re bata babenga mwabo n'e kubabuluta e muhondo s'e bifumbi by'e butchindjibuse? ⁷ Na batendjire bakamba lyir'e sina lyibuya ly'enawe tchu Yesu Kristo, mweresibwaa ilyi mwabalangi lyirwaa? ⁸ Si kweyine ilyi nyinga yikilyisa lyir'eyano ly'e bwami ngoko byandjikirwe, "Usime mulyikenyu ngoko utchisima weyine," ilyi mwyilyire kubuya. ⁹ Si ilyi mungasim'e bandju kwa kubaberula, ilyi mwayiliyr'e byaa, n'e kutchindjibusibwa n'e maanu re nga bandju bayilyir'e mabi. ¹⁰ Kwa bushi ngasi mundju woshi ola ungahonda eku kulyikira e maanure mwoshi, si ilyi angasitala mu mwasi muuma, ohire e ndonga sa byoshi. ¹¹ Kwa bushi, oyo Ongo watetaa, "Utayi raa e buhungu," yi wanatetaa, "Utetaa." Kwa batcha, tchiro angaba utayilyir'e buhungu, si kweyi ne wetchire, wera ulyi mundju ufunyire ilyi usheresis'e mano ma Ongo. ¹² Mwabo mutete, n'e kukola nga bandju bala bakatchindjibusibwa kwa maanure m'e kunakyi, mabookere. ¹³ Kwa bushi e butchindjibuse butet'e bwondjo k'ola utet'e bwondjo. E bwondjo bwende bwatchikusa kwa butchindjibuse. ¹⁴ Benye wetchu, tchiye kutetchire, e mundju ilyi angateta kwa et'e bwemere, si kweyine atet'e biyiro? Kute, obwo bwemere bwanaala e kumu tchungula? ¹⁵ Nga mwenye wetchu mulume ilyi mwenye wenyu mukasi atet'endjimba n'e kuyina e bilyo, ¹⁶ na mundju muuma w'e mwenyu ana mubira oko aende n'e bwolo, wende kukaluka e mulyiro n'e kwiuta, si kweyine ata mweresise ebye e mubilyi uhondjire, tchiye kutetchire? ¹⁷ Kunoko kunoko e bwemere nabo, nga butet'e biyiro, obwo bwemere bufire mwa kakatchi kabwo. ¹⁸ Si kweyine e mundju angateta, woyo w'et'e bwemere, nanyi nyet'e biyiro. Unyilos'e bwemere bwawe busira biyiro, nanyi nyingakulosa e bwemere bwanyi kwa ndjira y'e biyiro byanyi. ¹⁹ Woyo wemere kwa Ongo alyi muuma; wayilyire kubuya. E basimu nabo bende bemera n'e kuku kumana. ²⁰ Si kweyine, uhondjire umenye, u mwenye mundju utalyi kandju, kwa ebwemere butet'e biyiro nutashingenene? ²¹ Kute tata wetchu Abrahamu ata bonekanaa kuba alyi w'e kunalyi kwa ndjira y'e biyiro, emango anaa e muala Isaka e ndonga s'e nderekero? ²² Ubwene kwa ebwemere bwayiraa e mukolo alauma n'e biyiro byaye, n'oko obwo bwemere bwa yikilyiraa kwa ndjira y'obwo bwemere. ²³ Amo mandjiko mera kuyikilyira matetaa, Abrahamu emeraa Ongo, byera kuanjibwa era mwaye kuba e kunalyi; naye era kubalangirwa mwira wa Ongo. ²⁴ Mubwene oko e mundju endaandjirwa kuba alyi w'e kulyi kwa ndjira y'e biyiro byaye; ata kwa bwemere bweyine. ²⁵ Kunoko kunoko ne Rahabu, era tchihungu natche; Kute, ata andjibwaa kuba alyi w'e kunalyi kwa biyiro, mala mango amwoeraa e ndjumwa sa Ongo, era kubelusa e mbuwa mwa yindji ndjira? ²⁶ Kwa bushi ngoko e mubilyi utet'e mutchima ilyi ufire, kunoko kunoko e bwemere busira biyiro nabo bufire.