¹ Yakobo, njumwa ya Ongo, na y'enawetchu Yesu Kristo. Nandjikire mano maruba kwa milala ekumi n'ebilyi ya shandabanyire. ² Benye wetchu, muandje kwa bulyi bushaaluke, mukato wera mwa matangulo ma ngasi lubero; ³ Mube mumenyire kwa ekutangulwa kw'e bwemere bwenyu, kulyi kureta e kusera. ⁴ Oko kusera kube n'e mukolo ushingenene, ilyi muala kuba bashingenene na e be kulyi, busira kwandaalyirwa na mwasi woshi. ⁵ Si kweyine e mundju w'e mwenyu akandaalyirwa n'e bwenge, eem'ebwondjo e mwa Ongo, yi wende weresa bwoshi, kwa bushaaluke, na ata kalyiyira; naye angeresibwa. ⁶ Si eeme kwa bwemere, busira karinda kwo shi, kwa bushi e mundju w'e karinda kwalyi nga meshi m'e nyandja mekibwa n'e mbusi, n'e kusha banyisibwa eye n'ene. ⁷ Kwa bushi e mundju ulyi ngoyo ata tanyaa kwa angaangilyira kandju e mw'enawetchu. ⁸ E mundju w'e nyifindjo ebilyi yi wende ende ayina eraya mwa ndjira saye soshi. ⁹ Si mwenye wetchu ola utet'etchifumbi, ashaa luke kwa bushi Ongo amutongire; ¹⁰ si e muare kwa bushi andaasibwe; kwa bushi nga lyiuwa ly'e bi tchi angatereka. ¹¹ Kwa bushi e suba lyende lyelukira kwa kashangi, na lyende e bitchi, e lyiuwaa lyabye lyanatowa, e bubuya bw'e kuremwa kwalye kwana tereka, kunoko kunoko e muare akwoma mwa ndjira saye. ¹² Erayi ly'ola mundju wende wayima e matangulo, kwa bushi ilyi angaba era emererwaa ana angilyira e hungwe ly'e kalamo, Enawetchu alaanyaa eba musimire. ¹³ E mundju, ilyi anga tangulwa, ata tetaa, nata ngurwe ne Ongo, kwa bushi Ongo atangaal'e kutangulwa n'e mabi, ilyi Ongo yeyine ata tangula mundju. ¹⁴ Si kasi mundju end'atangulwa n'e nyifindjo saye yeyine, ilyi era abulutchwaa n'e kutebibwa. ¹⁵ Na ilyi oko kutchifindja kungaba kwera kw'ete simi, kwana buta e byaa, n'ebye byaa ilyi byera bya kulaa, byanabuta e lufu. ¹⁶ Benyewetchu basi mwa banyi, mutatebibwaa. ¹⁷ Ngasi kwana kulyi kubuya, na ngasi hyanyi rwe e kushingenene, kwende kwatenga e ndonga, kwende kwandaala e mwa tata w'e bulangare; era mwaye italyi kualuka, ilyi tchimbusa tcha kualuka aluka. ¹⁸ Kwa kusima kwaye yeyine kw'atchubu tchire tchubano, kwa mwasi w'e kunalyi, tchube nga batanzi mwa biremwa byaye. ¹⁹ Ebye mumenyire, benye wetchu basimwa. Si ngasi mundju abe wa kunva fuba fuba, si ata baa wa kuteta fuba fuba; ilyi kusinana. ²⁰ Kwa bu shi e bute bwa mwenye mundju butayira e kuho nda kwa Ongo. ²¹ Kwa bushi n'oko, mukabulyi re bure nenyu e singa lyoshi n'e bubi buluyire, n'e kwangilyira kwa burembu ola mwasi Ongo ayingaa mwanda senyu, mwasi ungaala kutchu ngula e mitchima yenyu. ²² Si kweyine mube bakosi b'e mwasi, si ata b'e kunvilyisa mbanga, mungesha kuba ba kutchiteba e mitchima yenyu. ²³ Kwa bushi e mundju ilyi angaba wa kunvilyisa e mwasi kwoshoko, si ata wa kuyira oko oyo mwasi atetchire, oyo mundju kwalyi ngola mundju wende watchilola kwo e buso bwaye mwa tchiyo. ²⁴ Kwa bushi ende atchilola kwo, na busnda anaenda, na unawo anebilyira kula abaa alyi. ²⁵ Si kweyine ola watangure e maanure m'ekunalyi, mala m'e kubo olwa, n'e kwikala mumwo, atabaa wa kunva n'e kwibilyira, si mukosi w'e mukolo, oyo angaba w'erayi mwa kukola kwaye. ²⁶ Ilyi e mundju anga tanya oko ete e dini, si atanza e lulyimi lwaye kwa kuluhweka, e dini y'oyo mundju lyitashingenene. ²⁷ E dini lyitchere, lyi tete esinga lyoshi e muhondo sa Ongo tata lyi lyilyine: "Kuya kutangula e fusi n'e bahumbakasi mwa kakatchi k'e malyibuko mabo, n'ekutchilanga n'e butala butalyi mw'e mabi.