¹ Kwa bushi, ngasi mudjindji mukulu ola watolwaa mwa kakatchi k'e bandju, abikirwe kwa bushi n'e bandju mwebira bimwerekere Ongo, ilyi endjulo n'enderekero kwa bushi n'e byaa. ² Oyo yi ungaala kubatabala kwa burembu abwo batame nyire n'ekutereka, kwa bushi yeyine alyi mwa shushanyo y'ebutambukare; ³ Na kwa bushi n'oko, bimwemire, nga kwa bushi n'e bandju, kunoko kunoko kwa bushi n'e kalamwo kaye yeyine, ekwana e ndjulo e ndonga s'e kalamwo kaye yeyine. ⁴ Na kutalyi tchiro n'e mundju muuma ola ungaa la kutchitorera yeyine buno bukenge bulyi ngo buno, si ola ubalangirwe ne Ongo, ngokula Aruni. ⁵ Na kunoko kunoko Kristo naye atatchitowa myaa e kalamwo kaye yeyine, kuyirwa mudjindji mukulu, si ola wamubiraa, "Woyo u mwana wanyi, nyono kulwarero nakubutchire, nyono ny'eho !" ⁶ Ngokula bitetchirwe e andji andju, endonga sa Kristo: "Woyo u ulyi mudjindji mukulu e myaka yoshi kwa muanyi wa Melkizedeki." ⁷ Oyola, ese siku s'e mubilyi waye, era kumwanyira oyola, ungaala kumufumya n'e kumukula mwa lufu, ememi n'e bwondjo alauma n'e kulyira busibu n'e bitengetenge, era kunvilyisibwa kwa bushi amwemere Ongo; ⁸ na, batcha, tchiro angaba alyi mwana wa Ongo, era ku tondera eya ekukenga kurengera e malumwa ilyi malyibuko amwo mamuyikiraa. ⁹ Naye, ilyi aba era ayirwaa w'e kunalyi, era kuba yi mutondero w'e butchunguke bw'e myaka ne myaka emwe bandju bwoshi bamukengire ilyi bamwemere; ¹⁰ Businda era kutetchibwa ne Ongo kuba mudjindji mukulu kwa muanyi wa Melkizedeki. ¹¹ Oyola, tchwete myasi yinene y'e kuteta kwa bushi n'e myasi yaye; na bilyi bisibu e kubibalyika kwa bushi mulyi batambukare b'e kunva. ¹² Kwa bushi, emango bibeemire kuba beyilyisa, (ng'ekandji kashangi karengire), mutere ne ilyi mushingenene e kuyilyisibwa n'e mundju e meyilyisa matanzi m'e myasi ya Ongo; nenyu mutchilyi mwatchanyira emata, si ata e bilyo bisibu. ¹³ Kwa bushi, ngasi mundju ola utchilyi walya emata, atamenyire busibu e mwasi w'e kunalyi, kwa bushi atchilyi mwana mutoto. ¹⁴ Si kweyine e bilyo bisibu ilyi binyake bilyi bya bandju bakulu, abwo e ndanya sabwo, kwa kukoresibwa, sera siterene e kuberula n'e kumenya e mabuya n'e mabi.