¹ Na batcha, nga kutchilyi etchiraane tch'ekuya mwa bushaaluke bwaye, tchwobae, muuma wetchu angesha kuyina e lubwonekana. ² Kwa bushi kulyi kw'e kunalyi, netchu tchweyilyisibwe e mwasi mubuya wa Ongo kuuma nabwo. Si kweyine, oyo mwasi wonvibwaa, ata batabalaa kandju, kwa bushi oyo mwasi utahoanganyisibwa a n'e bwemere mwanda sabwo abwo bwonvaa. ³ Kwa bushi tchutchwemere, tchukengira mwobwo bushaaluke; ngoko Ongo atetaa, "Kwa nalapaa kwa bute bwanyi, batak'engira mwa bushaaluke bwanyi;" Tchiro angaba oyo mukolo yayikilyire kutengera e kubikwa kw'ebibandja by'ebutala. ⁴ Kwa bushi atetchire e lusiku lwa kalyinda andju auma batcha, Ongo era kutamuka e lwe kalyinda, era kureka kuyira emikolo yaye yoshi. ⁵ Nawo nabo, Ongo atetchire kwa batak'engira bwa bushaaluke bwanyi. ⁶ Na batcha, kwa bushi kutchilyi ono mwasi ushibire kuteta kwa kutchilyi e bandju bak'engira mwobwo bushaaluke, na bala beyilyisibwaa oyo mwasi kutenga mira bera kuyina e kwingira mwo kwa bushi n'e kutemera kwabo. ⁷ Batcha, Ongo era'hubire kubika e lundji lusiku lurebe; atetchire mu Daudi e nyuma sa bishangi binene kulyi ngoku no, kulwarero; ngoko byatetchibwaa kutengera mira, "Kulwarero, nga mung'onva e murenge waye, mutayiraa e mitchima yenyu kuba yisibu." ⁸ Kwa bushi, nga Yoshua angabawere e bushaa luke, atangatetchire elundji lusiku e nyuma. ⁹ Na batcha, kwera kushibire e bushaaluke bw'e lw'e sabato era mwe bandju ba Ongo. ¹⁰ Kwa bushi, ola w'engire mwa bushaaluke bwaye, era atamukire yeyine mwa mikolo yaye, ngokula Ongo naye atamukaa mwa kakatchi k'e mikolo yaye. ¹¹ Na batcha, tchube n'e bushiru e kwingira mwobwo bushaaluke, ilyi kutabaa e mundju woshi woshi ola ungakumbaala kw'oyo muanyi w'ekutemera. ¹² Kwa bushi e mwasi wa Ongo alyi mw'e kalamwo, katchi w'et'emisi, kandji w'et'ebukalyi nga bupanga bw'ekwishira abilyi, kandji w'ende w'otcha tchiro n'ekubaanya e muka n'e mubilyi, n'e binga kwa mafuta malyi mwanda sabye; kandji oyo mwasi alyi wa lubiro ekumenya endanya n'ekuhonda kw'e mutchima. ¹³ Na tchiro kutalyi etchiremwa tchitalyi wazi ilyi tchibishirwe e muho ndo saye, si kweyine e bindju byoshi bifunurwe n'ekuba buhunzi ilyi busira kuba ka kandju kwoshi mwa meho maye oyo w'et'ebindju byoshi. ¹⁴ Na batcha, nga tchwete oyo mudjindji muku lu w'engiraa mwa mbingu, yi Yesu, mwana wa Ongo, endonga s'oko, tchube tchusesise busibu e maungamwo metchu. ¹⁵ Kwa bushi, kutalyi eundji mudjindji mukulu ola ungaala kuba alauma netchu mwa kwabirwa kwetchu; si kweyine yeke era kutangulwa kuuma netchu mwa kakatchi ka byoshi, busira kuyira tchaa. ¹⁶ Batcha, tchusheerere etchifumbi tch'e lukoo kwa mutchima ushingenene, ilyi tchuala ekweresibwa e bwondjo, n'ekubwona elukoo lw'ekutchutabala ekashangi k'ekutchifindja ilyi kutchaanyira.