¹ Kwa bushi n'oko, bitchwemire e kutchumbikisa busibu ebye tchwonvire, emwe mwana wa Ongo, tchungesha kubiyina. ² Kwa bushi, nga ola mwasi watetchibwaa ne ba malaika ba Ongo, emwe bana b'e Israeli abaa w'e kunalyi, na ngasi bubi n'ekuayisa, wangilyire e lwembo lwaye, ³ tchubano kute! Tchukaala e kufuma, nga tchuta tchikubayilyire e butchunguke bunene ilyi bukulu bulyi ngo buno? Obwola butchunguke bu bwatangaa kutetchibwa n'enawetchu, businda bwera kuyikilyira e mwetchu e mwa bala bwonvaa. ⁴ Ne Ongo naye, era kwamilyisa alauma nabwo kwa bitangasa n'e bisomerene n'e misi ya mbero sinene, na kwa kuaba kwa muka mweru, ngoko Ongo yeyine ahondaa. ⁵ Kwa bushi, atabikaa e masina ma ba malaika obwo butala tchulangalyire, ilyi bwesha, obwo tchwendjire tchwateta, si kweyne mundju muuma aamilyisise batcha, andju auma n'ekuteta : ⁶ "Mwenye mundju alyi nde ilyi umukengera, Ilyi e mwana w'e mundju, ilyi umutchwumbikisa!" ⁷ Wamuyilyire mueke kulusha busibu kulusha malaika, Wera kumwimbasa e hungwe ly'engulu n'e bukenge, Wera kumubika e mangire e mikolo y'e maboko mawe. ⁸ Wera kubika e bindju byoshi e masina m'emaulu mawe. Kwa bushi, mwa kubika e bindju byoshi e masina saye, kutashibaa e kandju katabikwaa e masina maye. Si kweyine batcha, mutasa kulola e bindju byoshi byabikwa e masina maye. ⁹ Si kweyine tchulolyire oko, oyo wayirwaa mueke busibu kulusha ba malaika, yi ulyi Yesu, kwa bushi n'emalumwa m'elufu, era kwimbasibwa e hungwe ly'e ngulu n'e bukenge, ilyi kwa lukoo lwa Ongo, atangule ilyi onve kwa mutondero w'elufu kwa bushi na ngasi mundju. ¹⁰ Kwa bushi, bi mwemire yeyine, yi kwa bushi naye n'oko ndjira yaye, e bindju byoshi byayilyirwe, era kureta bana banene bayikilyire e ngulu ilyi bukuse bwa Ongo, kumuyikilyisa e mukulu w'e butchunguke bwabwo kwa ndjira y'e malyibuko. ¹¹ Kwa bushi oyo wende watchesa nabwo bwoshi batchesibwa, bwoshi batengire e mwa muuma. Kwa bushi n'oko, Yesu atetehonyi e kubabalangira benyewabo. ¹² N'ekuteta: "Nyingeyilyisa esina lyawe e mwa benyewetchu. Mwa kakatchi k'e kanisa nyingakwimbira e mutongo." ¹³ Na kandji, nyingaba nyimulangalyire yeyine. Na kandji, lolaa, Yesu atetchire kwa: "Nyono nyily'ano, alauma n'e bana neresibwe ne Ongo." ¹⁴ Na batcha, kwa bushi, e bana bera balyi basha ngire e mikira n'e mubilyi, naye, kunoko era kusha ngira e byera, ilyi kwa ndjira y'elufu, asherese oyo wabaa wet'ebuashe ilyi misi y'elufu, yi ulyi, Ibilyisi (ilyi shetani). ¹⁵ Ne Yesu yeyine, ilyi aala kuba bwoola abwo bwoshi e kalamwo kabwo kwoshi kwa ndjira y'e bwoba bw'e lufu babaa balyi nga bakobe. ¹⁶ Kwa bushi n'oko, e kunalyi atatolaa e shushanyo ya ba malaika, si era kutola e shushanyo y'e mubutchwa ilyi mwana wa Abrahimu. ¹⁷ Na batcha ku bimwemire e kushu shanyisibwa ne benyewabo mwa kakatchi ka byoshi, ilyi aala kuba e mudjindji mukulu w'e bwondjo, mwemeresi mwa bya Ongo, ilyi aala ekuyira e mababalyire kwa byaa by'e bandju baye. ¹⁸ N'ekuba yeyine alyibusibwaa, ilyi atangulwa, kunoko ana ala ekutabala abwo batangurwe.