¹ Amwo mango Sauli, atchilyi atanya ekulyibu sa n'ekwita ebaanda b'enawetchu, era kuya emwe mukulukulu w'ebadjindji, ² na era kwema e maruba kwa ma kanyisa, nyuhu s'e Damaski, ilyi akabuana emwasi muyaya, balume ilyi bakasi, aba rete bahwekirwe e Yerusalemu. ³ Abere eralyi mwa ndjira, na eralyi ofi ne Damaski, kwa lyiuma bulangare kuteng'embingu bwera kumulomekera ebutambi bwaye. ⁴ Era kukumbaala, na era kunva emurenge wa mubiraa: Sauli, Sauli, tchiye tchitchumire wanyilyibusa? ⁵ Era kuhusa: Unde enawetchu? N'enawetchu era kuteta: nyi Yesu, nyi walyibusa. ⁶ Si emuka, w'ingire mwa musi, nawe ungabirwa ebye ushinge nene ekuyira." ⁷ Ebandju babaa bamwerekesise bera kushiba bwobayire, bonvire emurenge, si batabonaa ku mundju. ⁸ Sauli era kwimuka kwa tchitaka, na tchiro angaba emeho maye mabaa mabookere, si atalolaa ku kandju; bera kumuatchilyira kwa kubo ko, n'ekumweka e Damaski. ⁹ Era kushiba siku ehatchu atabona, atalya atanamwa. ¹⁰ Yabaa e Damaski muanda muuma ubalangi rwa Anania. Enawetchu era kumubira mwa biroto, "Anania!" Era kuhusa, nyono enawetchu! ¹¹ Na enawetchu era kumubira: Emuka, ya mwa ndjira yibalangirwa kulyo, na uhonde, mwa nyumba ya Yuda, mundju ubalangirwa Sauli w'e Tarso, kwa bushi endjir'ema. ¹² Na alolaa mwa biroto, mundju muuma ubalangirwa esina lya Anania, era kwingira n'ekumubika kw'emaboko, ilyi ahuba kubona." ¹³ Si Anania era kuhusa: Enawetchu, nonvire kurengera bandju bengi emabi mwoshi oyo mundju kwa batchesibwa bawe mwa Yerusalemu. ¹⁴ Na, anet'buashe anola, kuteng'emwebakulu kulu b'ebadjindji, kuhweka ebendjire bakusa esina lyawe." ¹⁵ Si enawetchu era kumubira: Wende, kwa bushi oyo mundju alyi tchikayi nahombolaa, ily'eka esina lyanyi emuhondo s'elubaa, emuhondo s'ebami, n'emuhondo s'ebana be Israeli; ¹⁶ na nyinga mwereka ebye ashinganene ekulyibusibwa kw'esina lyanyi." ¹⁷ Anania era kwimuka, na emango ayikire mwa nyumba, era kubika emaboko ku Sauli, mwa kuteta: Sauli mwenye wetchu, enawetchu Yesu, wakwilukiraa mwa ndjira wabaaa wendjire wesha mwo, anyitchumire ilyi uhuba kubona na wihusi bwe muka mweru. ¹⁸ Mwako kashangi, byera kutowa kwa meho maye nga biamba, era kunabo na. Era kwimuka n'ekubatisibwa; ¹⁹ na, abere eralyaa ebilyo; emisi yera kumuhubira. Sauli, era kwikala siku sieke n'ebaanda babaa e Damaski. ²⁰ Na unao era kwiyilyisa mwa ma sinagogi, kwa Yesu yi mwana wa Ongo. ²¹ Boshi bamunvaa, berakusomerwa n'ekuteta: Ata yi w'endee walyibusa e Yerusalemu bala bendee bakusa ely'esina, na ateshaa ilyi abeka abahweki re emuhondo s'ebakulukulu b'ebadjindji? ²² Na batcha Sauli era kuba n'emisi busibu na busibu, na era kusomesa e Bayaudi babaa e Damaski, kwa kwerekana kwa Yesu yi Kristo. ²³ Mwa kashangi karebe, e Bayaudi bera kua nyira ilyi bamwita. ²⁴ Na oyo mufula wabo era kuyika emwa Sauli. Bera kulanga enyunvi mushi n'ebutchufu ilyi bamwita. ²⁵ Si, butchufu buuma, ebaanda bera kumutola, na bera kumwandaasa kwa tchitchumba, mwa tchitchilyi. ²⁶ Emango ayikire e Yerusalemu, Sauli era kuhonda kutchibika kubo; si boshi bendee bamwo boa, kutemera kwa angaba muanda. ²⁷ Arero, Barnaba, era kumutola alauma naye, era kumuyisa emwe ndjumwa, n'ekubabalyikira kute mwa ndjira Sauli alolaa kw'enawetchu, yi wamutetembyaa na kute e Damaski eyilyisa ekunalyi kw'esina lya Yesu. ²⁸ Endee aenda n'ekwisha nabo mwa Yerusale mu, n'ekutchibalyikisa n'emulangalyiro kw'esina ly'enawetchu. ²⁹ Endee anateta n'ekuanyira n'e Bayaudi b'etchi Yunani, si banola bendee bahonda ekumwita. ³⁰ Benye wabo, abare babyunvire, bera kumweka e Kayisaria, n'ekumuyisa e Tarso. ³¹ Eluhu lwa Ongo lwera kuba mwa bwolo kwa Yudea yoshi, eGalilaya ne Samaria, kera kwibakwa n'ekuenda mwa bwoba bw'enawetchu, na kera kukula mwa kwimangirwa ne muka mweru. ³² Na ngoko Petro endee atangula ebatchesibwa boshi, era na kuandaalira ebaa e Lida. ³³ Era kubona mundju muuma ubalangirwa Ainea, awondjere kwa ndjingo, kutenga myaka munane, olyir'ebinga. ³⁴ Petro era kumubira: Ainea, Yesu Kristo akufumise, emuka, unakunda manye endjingo yawe. Na unao era kwimuka. ³⁵ Ebandju boshi b'e Lida n'e Sharoni,bera kumubona, n'ekualukira enawetchu. ³⁶ Yabaa e Yopa mwa baanda, mukosi muuma ubalangirwa Tabita, kukuteta "Dorkasi;"endee ayira biyiro bingi bibuya n'endjulo. ³⁷ Era kulwala mw'esesiku, n'ekufa. Enyuma s'ekumwosa, bera kumubika mwa tchumba tch'e ndonga. ³⁸ Noko e Lida ilyi ofi n'e Yopa, e baanda mwa kunva kwa Peyro alyi ye, bera kutchuma babilyi eye alyi, kumwema eeshe eye balyi. ³⁹ Petro era kwimuka, n'ekuenda nabo bandju. Emango ayi kire, bera kumweka mwa tchumba tch'endonga. Ebahumbakasi boshi babaa bamusungure n'eku lyira, n'ekumwereka ebifunga n'endjimba Dorkasi endee ayira atchilyi auma nabo. ⁴⁰ Petro era kwilusa ebandju boshi, era kukom' emafi n'ekwema: na ekwerekera oyo mubilyi, era kuteta: Tabita, emuka! era kuboola e meho, na mwa kulola ku Petro, era kwikala. ⁴¹ Era kumweresa e kuboko, n'ekumwimusa. Era kubala ngira ebatchesibwa n'ebahumba kasi, era kubalosa ye asene. ⁴² Ebyera byerakumenye kana mwa Yopa yoshi, na banene bera kwemera enawetchu. ⁴³ Petro era kwikala bishangi bieke e Yopa, emwa mundju muuma w'ekulyingamanya nyiwu, ubalangirwa Simoni.