¹ Paulo, era kusesa e meho maye kwa bakulu b'e luhu lw'e Basadukayo, era kuteta: "Benye wetchu, kwa nyifindjo sishingenene ku nyilamire e muhondo sa Ongo kuyika kulwarero." ² E mukulukulu w'ebadjindji Anania era kubira e babaa ofi nye bamuhute kwa bunu. ³ Ne Paulo era ku mubira: "Ongo akakuhuta e tchitchumba tckabi rwe e mbembwe! Wikere kwa kunyitchindjibusa kushimbana n'emateeko, na wendjire warenga e butambi samo?" ⁴ E babaa e butambi saye bera kuteta: "Waka mbire e mutchesibwa wa Ongo!" ⁵ Ne Paulo era kuteta: Nda menyaa, benyewetchu, kwa yi mutchesibwa, kwa bushi byandjikirwe: Utatetaa kubi kwa mukulu w'elubaa." ⁶ Paulo, ilyi amenya kwa tchande tchiuma tch'e mukundamano tchilyi tcha Basadukayo, n'etchi ndji tchilyi tcha Bafarisayo, era kwirusa e murenge waye mw'olo luhu, era kuteta: Benye wetchu, nyilyi Mufarisayo; kwa bushi n'emulangalyiro n'ekufuka kw'ebafire tchi tchitchumire nyilyi mwa lubandja. ⁷ Ilyi at'ebye, kwera kuteng'elwayo e kakatchi k'e Bafarisayo n'ebasadukayo, n'emukndamano era kurukana. ⁸ Kwa bushi e Basadukayo bende bateta kwa kutalyi ekufuka kw'ebafire, na kutalyi ba malaika, ilyi muka mweru, na e Bafarisayo be mere ebye byombi. ⁹ Kwera kuba bwaka bunene, na bauma mwa Bafarisayo, bera kwimuka, n'ekuret'ekuhubanga nya, n'ekuteta: "Tchutete mwasi mubi kw'ono mundju; ngaba muka ilyi malaika yi wa mubiraa. ¹⁰ Ilyi kwaba malwa manene, e mukulukulu era kwoboa kwa Paulo ta berengwaa nabo bandju, era kwandaasa e barungu bamukule mwa kakatchi kabo n'ekumweka mwa mulungu. ¹¹ E butchufu bwa kulyikiraa, enawetchu era kuyikira Paulo, n'ekuteta: "Ube ne misi; kwa bushi ngoko wanaa e buamilyisi ku nyono mwa Yerusa lemu, binashingenene ubwane mwa Roma." ¹² Ilyi bwatcha, e Bayaudi bera kwish'elwango, na bera kulapa e kakatchi kabo, kwa batalye ilyi kumwa kuyika babe betchire Paulo. ¹³ Ebayira olo lwango babaa batchirukire makumi mane. ¹⁴ Na bera kuya kubona e bakulukulu b'ebadji ndji n'ebahosi, bera kubabira: "Tchwatchibikire ala uma kwa tchilapo kwa tchutalye tchutanamwe ku yika tcwite Paulo. ¹⁵ Na mwabo, batcha, muanyiraa n'emukulu w'eluhu, arete e muhondo senyu, nga mwa honda kunvilyisa e lubandja lwaye busibu; na tchubano, e muhondo ayike, tchu tchikubure e kumwita." ¹⁶ Muala wa mwalyi wabo Paulo, ilyi onva kwo lo lwango, era kuya mwa mulungu kukengesa Paulo. ¹⁷ Paulo era kubalangira muuma mwa balanzi, era kumubira: Eka ono mutabana e mwe mukulu w'eluhu, kwa bushi ete ebye amubira. ¹⁸ Oyo mulanzi era kumweka, era kumuyisa e mwe mukulukulu w'e luhu, n'ekumubira: "E muhwekwa Paulo anyibalangiraa, era kunyema nyi kuretere ono mutabana, ete ebye akubira. ¹⁹ E mukulukulu era kutola oyo mutabana kwa kuboko, n'ekumweka e butambi, n'ekumubusa: "Tchiye wa nyibira?" ²⁰ Era kuhusa: "E Bayaudi batchikubure e kukwema kureta Paulo asesi e muhondo s'e muku lukulu w'e luhu, nga wahonda umunvilyise busibu. ²¹ Utabonvilyisaa, kwa batchirukire makumi mane mubo bayilyir'elwango, banatchikubure, kwa biraane e kakatchi kabo, kwa batalye kandju kwo shi ilyi kumwa kuyika babe bamwitchire; na batcha, batchikubure, balyindjira e mwasi wawe."