¹ Aye! kurhi okw'obu! Ci ecishagala c'e Yewrusaalemi cirhaciba mwo nndi N'obu bantu banji babâga mwo! Yerusalemi wakengagwa kulya omw'igulu Ci akola ali nka mukana wani! Owali orhegesire ebindi bishagala, Lero kw'akola ali aolêsibwa nka muja. ² Bulya ali akâlâla alaka, anahumbulukîrwe, Abâli bisîmire Yerusalemi boshi Nta muguma wamurhûliriza, Abâli bîra bage boshi bamulesire bakola baba bashombanyi bage. ³ Ci abayuda balulizîbwe na mîra babalembagya. babakolêsa emikolo y'obukûkuru. Babahira omu malibuko. ⁴ Dolaga okw'enjira z'e sayuni* zashasire, nta muntu ocigera mwo aja okw'idinye ly'ensiku nkulu, Engombe z'oku mihango zoshi zashasire. Abajinji* b'omu Yerusalemi bali balumba, Ensûli z'abanyere mulenge ziri mwo. Ebyo byoshi biri bya kulasa Sayuni! ⁵ Ebwa kuba abashombanyi bage bamurhambire Erhi barhanali kwo ibombe. bulya nyamuzinda anahanyire sayuni erhi bunji bwa byaha byage burhuma. Abashombanyi bagwasire abana bage mpira, banabahêka buja. ⁶ Forhama sayuni abakukengêsa bagenzire, Abarhambo bawe kwo bakola bali nka rhushafu rhwabuzire olwabuko, Rhukola rhwayisha rhwataganya rhwayisha rhwayaka abahîvi na nta misi. ⁷ Gamugogêra amalibuko muli ezo nsiku, yerusalemi akengêra ebivindivindi agwerhe embere. Erhi olubaga lwage lugwarhwa n'abashombanyi n'erhi bacibona ntaye ol'imurhabala abashombanyi bage bacishingaga we erhi babona amahimwa. ⁸ Habonekana okw'ebyaha bya yerusalemi byaluzire, Co cirhumire enshonyi zimugwarha. Abâmukengaga boshi bakola bali bamugayaguza, bulya bamubwîne ebi ayambalira kwo. yerusalemi ali alumba erhi anayisha atundiranya. ⁹ Izinga lyali lyahemwire omwambalo gwage, arhamanyaga erhi hali oku byakaciba buzinda. Okuhimwa kwage kwali kwa kusômeza, Arhanabonaga owayish'imujûhiriza. erhi omushombanyi ahima yerusalemi, ahûna nyamuzinda mpu amurhabalage. ¹⁰ Yajewe! Abashombanyi bahagula ebyali birugu byage byoshi, byo byali, birugu byage by'okumusîmîsa. Abona abo bapagani bakânyakânyira omu ka-nyamuzinda, N'obwo wali walahire nyamuyzinda mpu irhondo barhapandaga olushando omu ndeko yawe. ¹¹ K'abantu b'omu yerusalemi boshi, Arhali kulaka bali balakira ibiryo, bahânyire ebirugu byabo byoshi bajira mpu iyo babaha ebiryo balêrha mw'amarhi. yerusalemi ahûna nyamuzinda aderha erhi: ''Mâshi olole obone oku nkola mugayaguze.'' ¹² Lolagi kuli nie mwe muli mwagera, mundolêreze. Nta malibuko gakagererwa kuli agâla ndi mwo; Aga malibuko nyamuzinda wagampaga erhi omutula gumugwerhe. ¹³ Malibuko andekire mwo nsiku zirhali nyi nyamuzinda antumîre imuliro Gwahona emalunga gwansingonola. Antega obusirha bwampirimya okw'idaho, Andekera omu malibuko nsiku zirhali nyi. ¹⁴ nyamuzinda aja akengêra amabi gani goshi, agaheba haguma agambarhuza, n'ogwo muzigo gwanyabira andîkira abashombanyi balya ntâkaja omw'irwe. ¹⁵ Omurhwe gw'entwali nagwerhe nyamuzinda aguhimîsa ahuluza engabo mpu zindwise, zayirha emisole yani. nyamuzinda atuntuma abasntu bâni b'abayuda nka kula bakanda omukenzi gw'emineke. ¹⁶ Mpimirwe kwo kurhumire ndi nalaka emirenge nanahumbulukîrwe. Nta muntu oli ampulisa, ntanacibonaga ow'okuntûliriza; abantu bâni babankûzire kwo bulya omushombanyi ampimire. ¹⁷ Arhega amaboko gage sayuni mpu asengere nyamuzinda cikwone ntaye wamuyumvîrhe. nyamuyzinda ahuluzize abashombanyi kurhenga enyunda zoshi mpu bamulwise. Yerusalemi akola ali abomeka emun da bali nka kantu kahumanyire. ¹⁸ sinza oku nyamuzinda y'ogwerhe ecâzo, bulya nagomîre amarhegeko gage. mwe bantu mweshi mmunyingizire munyumvêreze, mulole amalibuko ndi mwo. bâli bâni na bagala bâni balulizîbwe. ¹⁹ Tola oku nahamagala abira bâni nti bantabale, cikwone bacîlahirira. Abajinji* n'abagula* bâni, bafîra amu cishagala, amango bakag'ilonza ebiryo bagalula mwo amarhi. ²⁰ Lukogo mâshi nyamuzinda ondole nko mâshi ndi omu malibuko n'omu maganya, bulya omurhima gwani gurhadêkerîri okubona nakugomîre. itumu lyahulîrhire abana bâni omu mpandagazi, omu nyumpa yani mukola nk'omu mw'emifu. ²¹ vûluluka oyumwe oku ndi nalaka ciru na nta muntu oli ampulisa. abashombanyi bamanya boshi bashagaluka mpu kwenge ondibuzize; ohisagye lulya lusiku walaganyagya, abashombanyi bâni nabo balibuke akâni. ²² We! obanêke bwinja erhi byaha byabo birhuma. obahane nka Kulya wampanaga Nani erhi byaha byani birhuma. obwine gurhi ndi nalumba n'omurhima gurhaciri gwani.