¹ Olya malahika anyeeraka n'olwiishi l'uba mwo amiishi g'obulamu, olo lwiishi lwakaag'ilaza nka shangabuye. lwakkag'irhenga aha ntebe ya Mungu, yo na y'Omwaanabuzi. ² Lwakaahulula omukagarhi k'ibarabara ly'echigala. Ngasi burhambi bw'olo lwiishi, y'aali omurhi g'obulamu, gwakaag'iyeera kali ikumi nakabirhi omu mwaka, ngasi mwezi liguma. Ebyaasi by'ago byakaagi kolesembwa okufumya embaga. ³ Harhakachi ba chiru n'akantu kaguma kaagwarhwa n'obuhehereere bwa Mungu. Entebe ya Mungu n'ey'Omwaanabuzi waage yaba omu chishagala, na abambali ba Mungu ba mu ikuumba. ⁴ Babona amalanga gaage, n'iizino lyaage lya yandikwa emalanga gaabo. ⁵ Murhakaachiba budufu, barhanakalonza chiru obumoleke bw'itara, erhi bw'izuuba, bulya Nnahamwirhu Mungu abalumiza kwo obumoleke bwaage, n'abo bayiishiima ensiku na mango. ⁶ Enyuma ly'aho, olya malahika ambwiira erhi:" Ebi binwa biri byokuli bina kwaniine okuchikubagiirwa. Nnahamwirhu Mungu oha abaleebi baage Muuga waage, arhumiire malahika waage mpu oyo malahika ayereeke abaambali ebi gwasirwe okuba bunobuno." ⁷ Yesu adesire erhi:" Yumva, naiisha bunobuno! bali b'iragi abayumvirhe banajijire oku ebinwa by'echi chitaabu chilebire bidesire!" ⁸ Niene nie Yohana, nayumviirhe ebi nana bibona, n'erhi nyuusa oku yumva n'oku bibona, nahirima aha magulu gy'oly malahika wabinyereekaga nti mw'ikuumbe. ⁹ Chikwoone ambwira erhi:" Omanyi irhondo orhachijiraga ntyo! ndi muntu wakasi akawe, nandi muguma w'omu barhabaala bene wiinyu Bakristu, balya balebi ba Mungu. kandi nandi wamuli balya booshi bayumva ebinwa by'echi chitaabu chilebire n'okujira oku chidesire, ochikumbe Mungu! ¹⁰ Enyuma ly'ahon ambwiira erhi:" Orha fulikaaga ebinw echi chitaabu chilebire, bulya akasanzi Mungu atwiiraga ebi byooshi kakola kali hoofi. ¹¹ Maashi oba n'omurhima mubi agendereere okuka jira amabi, n'oba muchafu agendereere n'okuba muchafu. oba mn'omurhiuma mwinja agendereere n'okukajira aminja, n'oba mwimana agedereere n'okuba mwimana. ¹² Yesu adesire errhi:" Yumva naiisha bunobuno! Naaiisha ndwiirhe oluhembo lwaani nakaha ngasi muguma nkakulya anayiishiba akozire. ¹³ Niendi Alfa na Omega, nie waburhanzi nawa buzinda, omurhondeero n'obuzinda." ¹⁴ Baali b'iragi abafuzire amakanzo gaabo, cho chirhumirage bagweerhe obuhashe bw'okulya ilehe lya gulya murhi gw'obulamo n'okugereera omu muhango baje omu chishagala. ¹⁵ Chikwoone enyuma ly'echi chishagala eri abantu b'emirhima mibi n'abajiira obukurungu, n'abagona, n'abiisi ba bantu, nabachikuumba ensanamu, na ngasi bashuumi booshi, omu binwa n'omu bijiro byaabo! ¹⁶ " Niene nie Yesu narhumiire malahika waani nti amushambaalire ebyo byooshi omu mirhwe y'Abakristu muba b'omu buuko bw'omu mulala gwa Daudi, muba Ntonde elangashana erya y'esezisezi." ¹⁷ Muuka gwa Mungu boona omuhya badesire mpu:" Yiisha!" Oyumvirhe ebyo maashi naye aderhe erhi: " Yiisha!" maashi, ogwerhwe n'enyoorha aiishe. Owa lonza amiishi g'obulamu agahiirwe buzira kugula. ¹⁸ Niene nie Yohana, nie mbwiizire abantu booshi eri ihano likulu. Mbwizire abo bayumvirhe ebinwa echi chitaabu chilebire nti omuntu yeeshi yeeshi wanayushuule kwo akantu, Mungu amu yushuulira obuhane. Obo buhane abuhira kuuli galya mahanya galimayandike muli echi chitabu. ¹⁹ N'erhi hankajira owakula akantu kamuli ebi binwa echi chitaabu chilebire, Mungu amukuula echigabi ch'oku malehe gagulya murhi g'obulamu, n'echaage chigabi ch'echishagala ch'imana. Ebyo byoombi bili biyandike omw'echi chitabu. ²⁰ Oyo odesire ebyo byooshi obudima, adesire erhi: " Neechi, nyiishire bunobuno!" Yoo! Maashi, bibe ntyo! yiisha Nnahamwirhu Yesu! ²¹ Maashi, obugashane bwa Nnahamwirhu Yesu bubeere haguma n'abantu booshi.