¹ Enyuma ly'ebo nabona owindi malahika ohanoka kurhenga e mpigu. aali gweerhe obuhashe buneene, n'obulangashane bwaage bwa moleka igulu lyoosho. ² Ayakuuza n'izu lineene erhi :" ahirimage, ahirimage olya Baabeli mukulu! buno akola ali hantu abazimu babera, na bwaakiro bwa ngasi bazimu babi, ngasi rhunyunyi rhuzizire rhunakarhwa ho rhuna yubake ho. ³ Bulya anywesiize embaga zooshi amanvu gaage, manvu g'okugona kwaage kubi bweneene. Abaami b'en'igulu bachiishweekiire oku kugona kwaage bwooshi naye, n'okulimba kwaage kurhagweri lugero kwagazize abarhimbuuzi bw'omu igulu. ⁴ Enyuma ly'aho, nayumva elindi izu lyarhenga oku nkuba lya derha mpu: " rhengi omu kaagarhi kaage, ewe mwe lubaga lwaani, lyo murhaag'ishangiira ebyaha byaage, lyo murhag'inaba n'omwanya oku mahanya gamuhana. ⁵ Bulya ebyaha byaage byajiire byachilundika chiru byaliinda byahika oku nkuba, na Mungu ana kengiire ebiro byaage bibi. ⁶ Koleri ye nkoku amukoleraga mumutuhe kabiri k'ebi ajijire. Echikome chaage muchi bumbe kabirhi. Muchibuumbe manvu makali beneene kulusha agamujiriraga. ⁷ Mumurhindibuze n'oku lagiriza nka kulya anakaag'ichikuza omu bugale bwaage n'omu kulimba kwaage. Akachibwiirw yene emurhima erhi: Ntamiirage hana nkaa mwamikazi, ntali mukana, nanta mango naashiibe. ⁸ Cho chirhumire amahanya abikiirwe gooshi gamuhana lusiku luguma: endwaala, n'emishiibo, n'echizoombo. omuliro gwamushereeza. bulya Nnahamwirhu Mungu wamutwiraga olubanja, aba wabuhashe. ⁹ Abaami b'en'igulu balya baalichiishweekiire oku ku gona byooshi naye n'olimba booshi naye balaka, babanda n'endulu erhi echo chishagala cho chirhuma, hano babona omugi g'oku hya kwaacho. ¹⁰ Bayiimanga erhali hofi erhi kuyoboha amalibuuko chabona okurhuma, babuli ka derha mpu:" Yoo! bebeli wee! chirya chishagala chineene na chabuhashe, rhwamahanyagala waani! leero buhanya buchi obu! k'ensa nguma yoone yoone yamanahasha oku kuhana waani!. ¹¹ Abarhimbuuzi b'en'igulu nabo balibalaka n'oku banda enduulu erhi ye rhuma, bulya ntaaye ochiri wabagulira ebirugu byaabo. ¹² Ennooro n;ebyuuma by'enfaranga, n'amabuye g'engulo ndaarhi, n'amagerha; emishangi minja y'echitaani, ey'omuko n'eyakanyiki n'eshusha omuko, n'eya swa, ngasi mbero za mirhi yooshi erhabonekereera, ngasi mbero z'ebintu babiinja n'ihembe, n'omu mirhi y'engulo ndaarhi, n'omu muliga nudukula, n'omu chuuma, n'om'ibuye liderhwa Marbre; ¹³ N'omurhi gw'omudalasine, n'enuungo edrhwa iliki, n'obuku, n'amarasi, n'enshaangi n'amanvu namavurha, n'enshaano n'engano, n'enkafu, n'ebibuzi n'enfarasi, n'engale n'abaja, chiru n'obuzine bw'abantu. ¹⁴ Abo barhimbuuzi bali babwiira echo chishagala mpu: "Ngasi b intu byooshi walonzagya okubona byakuhezire kwo,obugale bwaawe bwooshi, omulimbo gwaawe, gwakuhezire kwo, orhanakachibibona chiru n'ehitya!" ¹⁵ Abarhimbuuzi bagalaga omu kukaarhimbuulira muli echo chishagala bayiimanga erhali hoofi erhi kuyooboha amalibuuko kurhuma. Balaka, babande n'enduulu. ¹⁶ Bakaaderha mpu: "chamahanyagala chino chishagala chinene waani! Lero buhanya buchi buno bwamabeera echi chishagala wee! Obone oku chayambaalaga emishangi minja y'echitani, n'emishangi y'akaduku, n'eshusha omuko. Chayambalaga ebisikiyo by'ennooro, n'amabuye g'engulo ndaarhi n'amagerha. ¹⁷ K'ensa nguma yoone yoone yamamana hasha okuheza ebi birugu byooshi waani!" ba kabiteni b'amashuwa booshi n'abantu baalidwiirhe, abadubi booshi n'abakolaaga omu nyanya, bakayimanga erhali hofi, ¹⁸ Babuli ka yakuuza erhi babona omugi n'engulumiira yacho. baka derha mpu : nta chishagala chisaangi ba en'igulu chankageriirwe kuli echi chishagala chineene!" ¹⁹ Bakaachikweba akatulo oku irhwe, baka laaka, baka banda n'endulu, 'b'anakayakuuza mpu:" Leero buhanya buchi buno! chamahanyagala echishagala chineene chineene waani! Chi bugale bwaacho bwo bwagazagya ngasi bajira amashuwa omu nyaanja booshi. n'ensa nguma yoone yoone yamanahasha okuheza byooshi byooshi muli cho. ²⁰ Ewe mwe bw'oku nkuba, mushagalukirage oko kushereera kwaacho! chishiingi mwe b'omulubaga lwa Mungu, entumwa n'abaleebi baage! bulya okubi chamujijire kwo kwa rhumire Mungu aderha oku chiyaazire!. ²¹ Ago mango malahika w'obuhashe arhola enkagasi. Eyo nkagasi yaali y'oku luusho luneene lwa kushweera ngano. Ayikweba omu nyanja abuliderha erhi: " Ntya kwo chilya chishagala chineene chiderhwa mpu babeeli chashangulwa idako oku liguma, chirhanakachi boneka chiru n'ehitya. ²² Emwawe erha naka chi yumvikaana omulimba gw'enanga chirhu n'ehitya erhi n'abazihi, n'abazihi b'akarheera n'abachiroro. Erhakaachi bonekena chiru omufundi omanyimire bulenga bulebe. Erhakaachi yumvikaana chiru n'izu ly'olusho luli lwashwa engano. ²³ Obumwoleeke bw'itara burhakaachi mwoleka emwawe chiru n'ehitya. Erhakachi yumvikaana chiru iizu lyoolya mulume n'elyo lya mukazi. Bambaali baawe bakag'irhibuurilira bw'obalumehaga kuulusha abandi booshi omw'igulu. N'omu kukoleesa oburungu bwaawe kw'o warhebiire mwo embaga zooshi. ²⁴ Baabeli ahanyirwe bulya bayabonekii oku muli echo chishagala mwa fiirire abalebi ba mungu n'abantu boomu lubaga lwaage, omuko gwa ngasi wayiisirwe en'igulu.