¹ Mw' ekuruke mmo, mweshishirishe oanda rusira nkene, ² Busondori emomba ubesi, n' er' ondo iyeta buri mpafa, busondori butangeya ebusubuke bwa Mukota kuri b' anu, busondori er' otu rw' ebusubuke bwasuma bwa Mukota bubw' ehii. ³ Banu b' ati musondekanye Mukota ebarongu b' echuo, imbi b' emisa ebihuno byae, Musondekanye er' eira, Musondekanye ekwehicha , Muriba mumurama mor' otu rw' ebusubuke rwa Mukota. ⁴ bushwa ku Gasa kusesierwa , na Asheroni rusebesa bweru, Ashdodi rusebesayo iyoyoro, Ekroni rusekuranyi wayo. ⁵ Bonso mo bisa emutiri w' enyansa, bbisa ku kereti! Mukota wakukutiko, Kukanaani chuo cha bafiristini! Nsekukakura, utabesiyo tu mo bea. ⁶ E mitiri y' enyansa isebesayo nnkero buriki bwa basumba, na buriki bwa maimba a bituana. ⁷ E mitiri yae isebesayo y' ekebe chasiya ch' enumba ya Yuda: Inko ngi kuserishiyo bo; baserikayo mwiyorioro mo manumba a ku Ashkeroni, bushe Mukota, Ongo wabo, utaseriyo bo, n' usekuruchayo ebasetingirwayo. ⁸ Narikwerukira esankambao sa Mmoabu, n' eronsense rw' ebana ba Amoni, Barekia bakambang' ebea b' ani na kw' itate ebyati by' abo n' eyume. ⁹ Ngy' asingwa, nabesa ho, ngweba Mukota mine bichiri, e Ongo wa Isiraeri, ku Moabu kusebesa buri ku Sodoma n' ebana ba Amoni buri ku Gomora, buaari burisere menke, kiribu cha mukwa, bweru ematu ati. Ebea bani basia baseshokorayo bo, Ebasiya mor' oanda rwani basesimanire bo. ¹⁰ Icha ch' ehiyenga bo bush' erume r' abo, bushwa barikamba n' ienja bo mu maa ebaba Mukota mine bichiri. ¹¹ Mukota usesuma kuri bo, bushwa useshhiria e baongo bati b' echuo na kinsi uma usehita hamakakko nae mo chuo chae, mo bisanga biti by' esanganda. ¹² Na b' anu hotu bisa ku Etiopia, mukushiriwa mu mwere. ¹³ wasesimanya emwine 'ae mor' oharo rw' ekwabume, useshiria bisa ku Suria, Na kuninawi useronjako itongo, chuo buri bweru. ¹⁴ Maimba a nyansa asebunda munkati na ro ; nyama sa kinsi bususe , etukutu na bana mpake baserikayo kubasirw' e sankuso. Mirenge iserikirwayo mosandubi nkeke-nkeke; Kubasirw' emitambi kusekiya iroro, bushwa wamakindishea emurimo w' emiti. ¹⁵ Sunga run' obungu rwakokoma, rwaruhuka hima na kirinso na rwebange mo mutima: ani nakusira wandenga! Buni! rwariribana, iro iye buriki bwa bananyama! Ebati baseetayo wendende naro baseshuunda yo n' ikaso mo mine.