¹ Bhushwa nancho, bhanu mbi mushimwa na bhanakitu, bhanu mbi ngoa sani n'ekembo kani, murike mwesimiki bhumbo kumunda na Nyerekuritu, bhashimwa bhani. ² Nihanange Ewodia na nihanange Sentike bhabhesi na mwanikiri uma kumunda na Nyerekuritu. ³ Na ongo, mirani wereira, eira, nakuhema isake bho, nambo bharekwana mo mwasi w'ekaramo hima nani, na hima na Kerema n'ebhampe bhatindikiri bhani mo murimo imbi eminabho ari mo karisi k'ekaramo ⁴ Mukokome ematu ati kumunda na Nyerekuritu, na nebha tu cho, mukokome. ⁵ Ebhurongu bwinu bhusibwe n'ebhea bhati, Nyerekuritu uri kwihi. ⁶ Angi mwenubya mu kitikiti, ina mu kinsi kikai musheecho kuri Ongo ietere mahemo na kw'itondoora hima n'itata. ⁷ N'ebhuhoro bwa Ongo imbu bwarenga kinsi bwenge, bwaarang'emitima yinu n'emyanikiri yinu kumunda na Yesu Kirisitu. ⁸ Kuruma nampo, bhanakitu, mo bhiti mbi byarengekana, bhiti byeritatwa, bhitimbi byeira, bhitimbi byashuururwa, ebhiti byashimwa, ebhiti mbi byakomenwa esimirwa, ebhiti bye bwongo mbi byakomenwa itatwa byabhesenga bhinwa by'emyanikiri yinu. ⁹ Imbi byarehanwa bhanu, mwangirire byo n'iyorukira byo kury'ani, nambi byaresunga bhanu kuri ani, mukore byo. na Ongo w'ebhuhoro waabha ninu. ¹⁰ Nakushea ngoa ningi kuri Nyerekuritu mu mbi byakukocha bhanu mwironja bhishasha mo myanikiri yani, mwanikiranga byo ishu ina muruka kashangi. ¹¹ Nti bhushe bwe mirao yani ngyasingwa nebha mbo, bhushe narehanwa mw'ibhese na ngoa mukinsi ngerero eyakumanwa mwami. ¹² Nisikwehicha, na nisi erika n'ibha mo mukene mo bhiti n'ekuti narehanwa esukuta nibha na rwaka n'ibha mo mukene n'ikeherwa. ¹³ Namukocha ebhiti kuringu wambese bhunkangwe. ¹⁴ Nampo mukukiya shu murinsake munkati n'eminubho yani. ¹⁵ Bhanu bhesine musi, bhafiripi, morebhucha erihana emwasi wakonda mo ntangiro y'er'ibhuchi emwasi wakonda moriendani ku, Makedonia, hasira anga n'irameso riti indi rabhese hima nani mumbi abesenga ebininkanange bho n'ebhisheengi bho. ¹⁶ Abhesenga nti banu bhesine mw'ikora byo, bhushe mundebhekanga ku Tesalonika mu mbiso sibhi morisake emirao yani. ¹⁷ Nti bhushe nisondange mihango kuri bhanu, ina nsondekanyange ebyuma abyarisa mo haro rwinu. ¹⁸ Na reshee ebhiti na niri mo mukene, narerisiwa na bhikai bhingi moriangirira bhanu bhuri rungo, ohembo rwangirirwa na Ongo, n'ebyashimwa nae. ¹⁹ Na Ongo wani waasubhia ngo mo mirao yinu etukana n'ebhutumba bwae, hima n'ebhusime, kumunda na Yesu Kirisitu. ²⁰ Kwa Ongo witu na Tita kubesi bhusime ematu ati n'eati! bhibhesimbo! ²¹ Nkerei ningi kuri ebhashuururwa bhari kumunda na Yesu Kirisitu, bhanakitu bhari hima nani bhabhukea. ²² Ebhashuururwa bhati bhabhukea irengeresha bhe numba ya Kaisari. ²³ Enchumo ya Nyerekuritu Yesu Kirisitu ibhe hima n'emitima yinu.