¹ Amabhese nti hari ibhongwabhongwa rikeke kumunda na Kirisitu, amabhese ibhonganywa rikeke mo nchimi, amabhese hari bhunakima bwa mutima, hamabhe bhonso na musasiro. ² Byaronja ngoa sakonda kuri ani, mumabhe na mwanikiro uma, nchimi nima, mutima uma, mwanikiri uma. ³ Angi muronja kiti mu mutima wabhuhaka ari mu mwetunduriko, ina erikwehicha ribhushee ikae bhampe bhuri bhabhukangame. ⁴ Kinsi uma mu bhanu, erekiya wasunga myengerero yae wesine, wasunge tu ye bhampe. ⁵ Mubhese n'emwanikiri ngw'abhesenga na Yesu Kirisitu. ⁶ Ingu uriho wabhususe bwa Ongo, angi kae bhuri chambo ch'ibhaka mw'irengekana hima na Ongo. ⁷ Ina wekungura wesine mw'itinge bhususe bwa mukobhe mwibhesa we bhuri ebhea, na weya bhuri mweya wabhusabhusa. ⁸ Wehichanga iwe wesine, wironja mweya wakwehicha n'erisiy'eroku, iya morotu rw'eriyango. ⁹ Ngyasingwa Ongo wamutumbiy'ekwiyo na wamuninka rina rareng'emina eati. ¹⁰ Kongo mo rina ra Yesu kinsi eru rikunyiwe mo mbingu, mo chuo n'ekwerunga. ¹¹ Na kinsi rwami rusimire mbu Yesu Kirisitu ngi Nyerekuritu, nguri n'ebhusime bwa Ongo Tita. ¹² Nampo bhanu mbi mushima, imbu bwehichanga bhanu ematu ati, mukore enchukaro yinu hima na koha n'ikake, nti bhushwa ho niri ho, ina rahunda nguru amabhese nti niri ho, ¹³ Bhushe Ongo ngurishange kumunda ninu erisasa n'erikora etukana n'ewasasa we. ¹⁴ Muronje kitikiti anga byomumo, na mitikotiko. ¹⁵ Kongo mubhesa mukoma na bhashuururwa bhana bha Ongo bhasira bhubhi munkati n'esua, munkati nabho bhanu musakange bhuri kasuku mo chuo. ¹⁶ Bhariy'ekinwa ch'ekaramo, na mwitata mo rotu rwa Kirisitu mwibhesa nti narikangane bhusa n'ikore bhusa. ¹⁷ Nakiro mbu naterekwa habhasirwa n'erohembo na mo murimo w'eresimira rinu, nakokome byo na nakokoma hima ninu. ¹⁸ Nabhanu hotu, mukokome bhumbobhumbo na mukokome hima nani. ¹⁹ Niri na mwenyihiro kuri Nyerekuritu Yesu ibhurebheka Timoteo, kongo n'abhunduke na changu kuri ani sine mwiyorukira ebyabhukae. ²⁰ Bhushe nsira mwea hano inguri nani mwanikiri uma ewamutinge ebhinwa mw'eira. ²¹ Ebhati bhasondekanyange myengerero yabho bhesine, ina nti ya Yesu Kirisitu. ²² Bhanu musi mbu wasierwanga mumwereko, moriterekwae mo murimo w'eretur'emwasi wakonda hima nani, bhuri mwana hima n'ishe. ²³ Nenyihire ekurebheka we nsekiya norukira namakindi iteerera ebwasus'ehary'ani. ²⁴ Na niri n'eresimira kuri Nyerekuritu mbu ani sine hotu niyange. ²⁵ Nakusunga nti rarengekana ibhurebheka munakitu Epafrodito, mwemisanyi wani w'emurimo na mo mbua kuri ngu wandishienga bhanu wandishienga ebhikai by'emirao yani. ²⁶ Bhushe abhesenga uhunange ibhusunga bhanu bhati na abhesenga munkangwe itukirembi byerukiranga bhanu mo makoni ae. ²⁷ Abesenga mukoni, kwihi n'ikwa, ina hotu nani, kongo nitabhundukingi na bhonso mu bhonso. ²⁸ Namushishanga mbu wendi hima na muho kongo mubhese na ngoa moremusunga nani sine ntabhundukingi na bhonso. ²⁹ Mumukoki munkati na Nyerekuritu hima na ngowa ningi, mubhesi n'osubhaha mo bhea bhambu bhususe. ³⁰ Bhushe n'emurimo wa Kirisitu, wabhesanga uri kwihi n'eroku, mweshia ebhuingo bwae, bhushe ererumisha moreruka rinu mo murimo abhesenga unikorengi bhanu.