¹ Otu'ma wakiya uhanange e bheya mwirameso n'itura 'ngu mwasi wakonda, bhashe bhakungu n'e bhandiki, hima n'e bhakungu, bhamwehie. ² Bh'ebha: utushishanga, ani maa ng'asingwa ukorambi? n'anye ngwa kuninka ngo maa? ³ Wakia wasubya, w;erebho: nani nta bhushisha kinwa kima; munchishanga. ⁴ endubhiko ya Yohana, y'atukanga e kwiyo ari kuri e bheya? ⁵ Bhahakanyana bhesine m'otuhwehwe: twamasubya mbu e murubhuko watukanga e kwiyo , iwe nti watuhakanya mbu nki nti mu musimira? ⁶ Eina twamebha, mbu endubhiko yatuka m'obheya; e bheya bhati bhaturekeraa makoi bhasimira mbu Yohana wabhesanga nti mutahwa. ⁷ Bhasubya mbu nti bhasi e kwakutuka yo. ⁸ Yesu nae n'iwerengi bho: nani nta bweri e kwatukae maa eakorangena 'ni mumbi bhinwa. ⁹ Wabhuch'iere e bheya uno mwani: mweya uma w'eka ishwa ra misabhibhu, wasombyayo e bhahingi nae n'iweirengi kimpe chuo, wamanako matu mingi. ¹⁰ E mirime y'akiya y'ase, watuma ntumwa kuri imbo bhahingi, mw'isonda bhamuninke mw'injo mirime; eina e bhahingi bhahumba njo ntumwa, n'imurikitanya; anga nanki. ¹¹ N'utumange umpe, nae wasahurwa n'imukambaa, n'imurikitanya, anga nanki. ¹² Watuma w'emeta ashatu, bhamu bhabhaya, n'imurekera ekubutara. ¹³ Sh'emine ngo mashwa w'ebha; bhuningi bwakia ani? Nitume emwan'ani, shimwa wani, kuti bhamumuninka utunda. ¹⁴ Eina e bhahingi bharekia bhamusunga bhashishana n'iebha: ingu ngi mine e mwandu, tumuye kongo twasiya n'e mwandu. ¹⁵ Bhamurekera kore n'erishwa, n'imuya. Minengo ngo mashwa, wakiyabho bhuni? ¹⁶ Wakia w'iya n'ikonora mbi bhahingi , n'ando ishwa ntwaninkaro bhampe. Bhakia bh'orukira mbyo bhinwa b'ebha: tut'amana mbyo bhinwa , kusira. ¹⁷ Wasindera bho, n'iebha: imbi bhinwa by'ebha bhuni? Er'ikoi rarahurwanga n'ebhimbi nge rira raba ikoi ikiri r'enkuso. ¹⁸ Kinsi mweya ngu wasitara m'undi ikoi wanechaa, n'angu mweya warisirwa n'aro, ramubhungura. ¹⁹ Bhashe bhakungu ne bhandiki bhasond' imutinge munjo ntambi; bhasubhaha e bheya bhushwa bhasibha mbu werenga bho ingo mushumo. ²⁰ Bhamusisirisa, n'imusonde bheya bh'imutea bhinwa mw'isonda i mwekenya kongo waminwa n'ebhakakare. ²¹ Bhamwere: e Nyerekuritu, tusi mbu imbi bhinwa eby'ebhange ongo mw'ituhana, byeira, bhushwa mbu ongo webhange byo anga bhobha, eina mor'eira ongo hanange inji nse ya Ongo. ²² Mbe rakonda bhate ininka Kaisari e muturo wae ari anga? ²³ Eina wasibhirira e bhukongobhanya bwabho, w'ere bho: bhushwa nki bhanu munchoshange? ²⁴ Nchee e bhutea. nsusanya yanye nji na mituro yanye? Bhamusubhie mbuya Kaisari. ²⁵ W'ere bho: muninke Kaisari e bhikayi bya Kaisari, na Ongo e bhikayi bya Ongo. ²⁶ Eina bharuka binwa imbi bya mumwekenya m'obo, bhashishara mo musubyo wae n'ikobha. ²⁷ Kuruma naha, bhampe Bhasadukayo imbi e bhebhange mbu kusira ifuka, bhamwehiye. N'imwere: ²⁸ E Nyerekuritu, Musa waritutiranyie mbu ingu wakwirirwa na munachabo, na wamasiya mushumbakari ingu ntw'abhuta motwae watingi ngo momina, waninke mukwae ubhuto. ²⁹ Kwabhesanga myoshukira irinda irinda, e waroso wabhinga, wakwa nti ti wasiya anga na mwana. ³⁰ W'emet'abhi nae wabhinga ingo mushumbakari, wakwa anga bhana, ³¹ W'ebhashatu wamubhinga, iya na mungu w'e bharinda anga na bhana. ³² N'emomina nae wakwa. ³³ Bhakiyayo bhafuka inye mubo ngw'abhi mine ngo momina? Bhushwa mbu e bhati bhabhesanga nti bhama mubhinga. ³⁴ Yesu werebho: e bheya bh'ematu ano bhabhingange n'ibhingwa. ³⁵ Eina imbi bhasekomenwayo ibha na muhango mo bhubhake e bwiyange n'ifuka bhatanga bhingana tu. ³⁶ Bhatakwiyo tu, bhushwa bhasusanayo na ngashani, na bhabhesayo nti bhana bha Ongo, imbi bh'erifuka. ³⁷ Musa nae washeanga 'mbyo bhinwa, e muti wakiya usakange, w'ebha mbu e bhakwire bhafukayo, wakiyanga washa e mubhake mbu ngi Ongo wa Ibrahamu, Ongo wa Isake, na Ongo wa Yakobo. ³⁸ Bhushwa Ongo nti w'ambi e bhakwire eina w'ambi e bhashere, bhushe mbu ebhati bhari k'okwe. ³⁹ Bhampe bhandiki bhasubya: e Nyerekuritu umebah ishu. ⁴⁰ Kuruma nambi bhinwa, nti habhanga tu wamushishirishanga kinwa kiti. ⁴¹ Yesu w'erebho: bhushe nki e bheya bh'ebhange mbu Kirisito mwana wa Daudi? ⁴² Daudi w'ebha mo mitiro ya Ongo were Nyerekuritu : rika m'omombo wani w'ekwabhume. ⁴³ Iya ndo erotu rw'akiyayo naronja e bharenda bhabhesi nti nge bhinantiro byabhe. ⁴⁴ Daudi wamwashanga, Nyerekuritu; bhuni ngw'amubhesa tu we mwana we? ⁴⁵ E bea e bhati bh'orukira, imbubwerengie e santumwa sae. ⁴⁶ Mukohyanga bhanu bhandiki: imbi e washima bhanu itamba mwiishea esanganju sinu nsi esareha-reha, n'ikokome ikeiwa mo santeko, n'isungwa e kubhusondori mo marango, nampi ehari nkumanano ya mirire; ⁴⁷ Bhanonkengi mo manumba e bhashumbakari; munji mpuse y'ihema nguru ramanko. Imbo bhasifunga mbu bhashushurwayo' ndi rarengi.