¹ Mokiranga ncho kwa saa momba wa Kaisari Augusto, imbu bahnse emina ebhea bhati b' echuo. ² Emwanso waroso ngo wabhesenga nti Kurenio nti ng' emukakare wakusuria. ³ E bhati abhesenga bh'endange kinsi mwea mor' obhungu rwabho. ⁴ Yosefu nae wataya etuka ku Gariraya, mur' obhungu rwa ku Nazareti mw' ienda ku Yudea, morobhungu rwa Daudi, rwabhikrwa mbu ku Beterehemu, bhushwa nti wenumba n' ekisasa cha Daudi, ⁵ Kongo wanswa hima na Maria, mukari nti neki waheruka, abhesenga nti mukure. ⁶ Bharekia bhari nko, e ntambi abhesenga y'erebhuta Maria y'eya. ⁷ Na wabhuta musike we waroso ebhutwa. Wamw' ondonda na byeri n' emuraricha mo muringa w' esankambu bhushwa abhesenga nti kusira bhuari bwabho mo numba y'ebheni. ⁸ Abhesenga kuri mumbo bhutaka, bhasumba bhari mo mashwa bhakerwa mutu mw' irangana n' emaimba abo. ⁹ Nasunga, ngashani ya Nyerekuritu wasaire bho, n'echaka cha Nyerekuritu chasaka hari bho mos' enkaro siti, bhatingirwa na bhobha bhukiri. ¹⁰ Eina engashani werebho: kiro musubhaha, bhushwa nabhurishie mwasi wakonda wabhesa mo bhea bhati kinwa kikiri cha ngoa. ¹¹ Ngi runotu, morobhungu rwa Daudi, mumabhutirwa mwoshukayi ngi Kirisitu, Nyerekuritu. ¹² Nasunga mu kani kengeko kamusibhire mo bhanu: mukusunga mwana wondondiwa mu byeri , na wararichiwa mu muringa wa nkambu. ¹³ Kuruma heya hima nango ngashani kikembe kikiri ch'e maimba a mo mbingu bhatatange Ongo n'iyebha: ¹⁴ Watatwe Ongo ko kwiyo nguru, na bhuhoro mo chuo munkati n' e bhea mbi bhasimira we. ¹⁵ E ngashani bharekia bhamasiya bho, mwekuruka mo mbingu, e bhasumba bhashishana: twendi iya ku Beterehemu na tusung' e byabhesa, e byamatushea Nyerekuritu. ¹⁶ Bhenda kotete, na bhakumana Maria na Yusufu, hima n' e kabhonsobhonso kekinde mo muringa w' e sankambu. ¹⁷ Kuruma n' imusunga, bhatura echamerirwa bho mu mwasi w' emwanango. ¹⁸ E bhati mbi abhesenga bhorukirengibo bhabhesa mu bhishisharo yambi abhesenga bhiturirwange bho n' e bhasumba. ¹⁹ Maria waranga e bhiti, n'e kuruchabyo mo mutima wae. ²⁰ N' e bhasumba bhakuruka ko, bhashimange n' itata Ongo mo bhiti byaturirwanga bho. ²¹ Er'otu rw'e munane, ngi rw'ereriy' e mwana e kotende, rwarekiya rw'eya, waninkwa rina ra Yesu, rina ndi rasheiwanga n'engashani bhusondori utangabhesa mo bhura bwa nina. ²² N'ematu er' ishuururwa rabho arekiya amarumira, etukana n'emomba wa Musa, Yosefu na Maria bamuria ku Yerusaremu, bhushe n' erimushea kuri Mukota. ²³ Mwitukana nambi e byatiranyiwa mo momba wa Nyerekuritu: kinsi abhume ntangi nt' wariarwa kuri Nyerekuritu. ²⁴ N'erisha Ohembo tumpite tubhi ari mimamba ibhi, bhuri bwarekind' etiranyiwa cho mo momba wa Nyerekuritu. ²⁵ Nasunga, habhesenga ku Yerusaremu mwey' uma wa bhikirwa mbu Simeoni. Ingo mwea wabhesenga nti w' eira na washuururwa abhesenga nt' warindirire w'eri bhongabhonga bhaisiraeri, n'E mutima wakonda nt' uri kumunda nae. ²⁶ Abhesenga nt' wamasubhukiwa n' Emutima wakonda mb' watakwiyo kubhusondori n' erisunga Kirisitu wa Mukota. ²⁷ Wiya morirameso, w'enjiwange n' e Mutima wakonda namb' wabhesenga e bhabhire bharishange e kabhonsobhonso Yesu mw' ibereresha kuru we e momba. ²⁸ Wamurembera mo maboko ae wakasanyie Ongo, n' ieba: ²⁹ Mo kashangi kano, Mukota, rek' emukori wabhe weiri mu bhuhoro, etukana n'e kinwa chabhe. ³⁰ Bhushwa emeso ani amasung' e nchukayo, ³¹ Nchukayo nji yareronja ongo mo bhea bhati. ³² Chaka ch' isaka mos' enganda , na bhusime kuri Isiraeri bhea bhabhe. ³³ Ishe na Nina bhabhesenga nti bhari mubhishisharo bye bhikai asanga byebwange kuriwe. ³⁴ Simeoni wamukasanyie n'iebha na Maria nina: sunga e mwanangu waterekwa mw'erisha ehuka n' esimana ra bhingi mo Isiraeri, n'ebhunduke kengeko karishayo bhuhaka. ³⁵ N'ekuri' ong' weine mwere wakuteanayo e mutima, kongo ehmihaki ya mitima mingi yasheiwa. ³⁶ Habhesenga hotu mutahwa wa momina Ana mwisi wa Fanueri wa mo kisasa cha Asheri. abhesenga nt' uri na myaka mingi, n' abhesanga nt' wamamana myak' erinda hima na moke itukire wabhingwa. ³⁷ Wasia mushumbakari n' eroero rwae ntiye rwa myaka makumi munane na inye, nti' utatukanga mor' irameso, na nt' ukorengi Ongo mutu na mu mwishi mu mahemo er' itin' erisa. ³⁸ Warekiya weya nae hotu, mu iya ntambi, watata Ongo, na nt' webhange kuri Yesu mo bhati abhesanga bharindire e karamo kaku Yerusaremu. ³⁹ Bharekiya bhamaheanya e bhiti byebwa n' e myomba ya Nyerekuritu, Yosefu na Maria bakuruka ku Gariraya, ku Nazareti mor' obhungu rw' abho. ⁴⁰ Nantiemwana ukongi nesumasuma. Abhesanga urisere bhutesa na nchumo ya Ongo, nt' iri kuri we. ⁴¹ E bhabhuti bha Yesu nti bhendanga ku Yerusaremu m' otu rukiri rw'epasaka. ⁴² Warekiya weya mo' ero rwa miaka e kumi na ibi, bhataya kuro, itukana n'emitondeko y' er' otu rukiri. ⁴³ N'ematu arekia amasira bhakuruka ko, e mwana Yesu wasiya ku Yerusaremu, ishe na nina bhatasibhi. ⁴⁴ Mwihaka mb' uri hima na bhabhine bher' oendo, bhakiy' otu ruma r' oendo bhamusondekanya munkati n'e bhabhuti bhae na bhana chabho. ⁴⁵ Eina bhatamusungi, bhakuruka ku Yerusaremu mwi musondekanya. ⁴⁶ Kuruma na matu ashatu wamukumana morirameso, warika munkati n'e bhakakare bh' emyomba, bhamworukirirengi na bhamushishange. ⁴⁷ E bhati abhesanga bhamorukirengi nti bhashisharange n' e bwenge bwae n' emisubyo yae. ⁴⁸ E bhabhuti bhae bharekia bhamusunga bhashishara na nina wa mwere: e mwan' ani, bhushwa nki ukwanikira mbu kuri bhate? sunga iso nani tukusondekanyange na bhonso. ⁴⁹ Werebho, bhushwa nki bhanu munisondekanyange? Nti bhanu musimbu ranihema n' ikai mo bya tita? ⁵⁰ Eina nti bhorukira inchi chakianga washisha bho. ⁵¹ Kuruma wahita nabho mwienda ku Nazareti na wabhesa wakwehicha kuri bho. Nina warang' e bhiti mbi mo mutima wae. ⁵² Na Yesu wabhese nt' woshukange mu bhutesa , na mu nchumo, hamakako na Ongo na bhusondori bw'e bhea.