¹ Buha mo kahanda ku Sayuni. E byako mor' ou rwashuururwa rw' ani. Ebarika-butaka bati bakaki, Bushwa er' otu rwa Mukota rweya, ² Otu rwasiro na rwa mwerimya, Otu rwa rukungu na rw' otundo, Weyange buri mu rangaranga mw'eyange kubasirw' esangu. ³ Kubusondori nae kasha k'esisima, Na kuruma nae, Omini rw'eshika, E chuo chabeseng' eraroso buri ishwa ra Edeni. N'etukire 'mpo, iye bweru bw' esubahya, Kusira kimutianange. ⁴ Mor' isunga bo, Mwam' eba mbu farasi, Na bakanyaha nge buri ba shempunda. ⁵ Mor' iyorukira bo, mwameba mbu okindo rwa tuti bita twa bita, Kubasirwe s'angu komeraengi to, mwam' eba mbu omini rwa kasha rw' okange. E ntambi 'shikange ro ebisu, umw' eba mbu kichiri kirina bunkangwe, Ch'etunganyange mu mbua. ⁶ Kubusondori n'abo, ebeya bakakengi, Esembaso siti sasubahya. ⁷ Birekerange buri bakwani, Batayang' ebisusu buri beya ba mbua; Kinsi uma w'endange mu 'nse yae, na kusir' er' imina ense. ⁸ Batanga himirana, Kinsi uma warang' ense yae, Bakanyahange mosa 'nse s'abo angi 'bonga er' oendo rwabo. ⁹ Bansansabanange mor' obungu, Bakanyahange mo sankumbu, bakambengi mo manumba, Bakimengi mosandubi nkeke-nkeke buri bibi. ¹⁰ E kwetange bo echuo kikakengi, e mbingu s'ishisharange, E mwishi n'emweri bibesange mwerimya, n' esa nkekeni s' ikuruchang' echaka ch' abo. ¹¹ Mukota worukirishange 'murenge wae hamakako ebichiri byae; bushwa enkambi yae nkiri, n'emuberershii w'ekinwa chae uri na bunkangwe; Bushwa er' otu rwa Mukota rukiri, rw'eshishaya: Inye ng' wa mumutinge? ¹² Enompena tu, ngw'eba Mukota, Munikuriki mo mitum' inu iti, hima na mahemo asir' erisa, mukiro na mirakasao. ¹³ Muberae 'mitima y'inu ina nty' esanchangi, Na mukuruki Mukota, Ongo w'inu, bushwa murongu na wa bonso, nti wesibuka tete n' orisere boongo, n' ubundukanga mo bubi wamasibura bo. ¹⁴ Inye ng'usi kuba utakuruki n'ebunduka, n'utatuninki mukira, ohembo na bisinso kuri Mukota, Ongo w'inu? ¹⁵ Mubuhemo kahanda ku Sayuni. Muture mwasi wa mahemo asir'erisa, ebikirana r'ebati. ¹⁶ Mukumanye 'bea, muronje bunakima bwashuururwa. Mukumany'ebakungu, Mukumany' ebana, n'etubonsobonso eture mo mabere, E wabume wasae mo mwae n' emomina mor' echumbi rae. ¹⁷ Munkaty' ebutara n' ebutanda bw' erirango bari ebashebakungu, bakori ba Mukota, Na b'ebe: E Mukota, rang' ebea b'abe. Kiro sierere e mwandu wabe mo sankene, munkati esanganda. Buni bwebe bo munkaty' ebea : kuni ngi kuri e Ongo w'abo? ¹⁸ Mukota warisa mono bushe echuo chae; Na warang' ebea bae. ¹⁹ Mukota wasako, w'ire bea bae: Nsebuninka buhi, nshano na mawese, na mukusikuta byo, na ntabusii tu mo sankene munkaty' esanganda. ²⁰ E murenda winu wa mor' oharo rwa kubusondori, nse murekera kore. Nsemuhensa mu chuo cha keme na cha bweru, Ebasondori bae mo nyansa y'ekwabume, Ebasii ba kuruma mo nyansa y'ekurembe; n'ebukoni bwae busensansabana, ebumba bwae busensansabana mo mwanya, Bushwa wamakora bikai bikiri. ²¹ E chuo, kiro 'subaha, besa mu ngoa na ukokome, Bushwa Mukota ukorange bikai bikiri-bikiri. ²² E nyama s'ebusara kiro musubaha, bushe er' okero rwa mo bweru rwamashuira, bushw'emiti isebuta byuma , e museituni n' emutini biseshaish' ebutumba bwabo. ²³ Na b'anu, bana ba ku Sayuni, mukokome, mubesi na ngoa kuri mukota, Ongo winu. Bushwa wabuninka mbura mo kashangi k'ayo. Wasebureka embura ya roso n'eyahemde n'ekiranga, bury'erisondori. ²⁴ Emaari aserisa buhi, n'etutiri tuserisa tu nchano na mafuta. ²⁵ Nsebubunduranyie 'myaka eyakuriwanga n'esansie, n'ebihuka, esansie n' esansuru, Ekichiri ch' ani kikiri chatumanga 'ni kuri banu kabukwanya. ²⁶ Mukurisa na mukusukuta, Na muku moe 'rina ra Mukota, Ongo winu, Ewakubukorenga tushingishiro, n'ebea b'ani batabesiyo tu mumitikotiko. ²⁷ Na nti musiba mbu n'iri munkati na Isiraeri, Ani ngi Mukota, Ongo winu na kusira umpe; N'ebea b'ani batabesiyo tu mu mitikotiko. ²⁸ Kuruma na 'mpo nsekubureyo e Mutima 'ni mu kinsi mweya, Ebasike n'ebikumi by'inu bisehurukwaayo, ebakungu b'inu base nontayo nsori, n'ebasike b' inu basekaireyo kore. ²⁹ Na mo bakori b'ebabume n'ebakori b'ebomina; mo matu ngo nsensansayo e Mutima 'ni. ³⁰ Nseshaishayo tushingishiro mo mbingu na mo chuo, Nchama, kasha na nkuso sa mwiki. ³¹ E mwishi usebundukeyo mwerumya, n'emweri usebundukayo nchama, Busondori eriya er' otu rwa Mukota, Mu 'ndo rukiri, na rwasuma. ³² Himpokinsi ng' wabikir' erina ra Mukota nt'woshukara. Enchukayo isebesa mor' ou rwa Sayuni na ku Yerusaremu, Buri 'mbu bwar'eba Mukota. Na munkati ebamoshukara basebikirayo Mukota.