¹ Otu rwa roso rwe kasembe,Maria mwisa ku Magidara wenda mo murangaranga e ku nsinda,wasunga nti e rikoi rakutunjiwa h'esinda. ² Wakanyahe kuri Simoni ngi Petero n'umpe mwemisa ng'ushimanga Yesu washisha bho: bakutunj' erikoi h'esinda ra mukota, na nti tosi kuni kwakumuria bho. ³ Petero ne bhemisa bhampe bhasaa n'ienda h'esinda. ⁴ E bhabhi bhakanyaha. Ina uma mubho wakanyaha tete irenga Petero,n'iiya wa roso h'esinda; ⁵ Mwikumbakumba, wasunga esanchangi e kwansi, nt'wakime. ⁶ Simoni ngi Petero, wabhesanga uri kuruma nae,weya n'ikime kumunda,wasunga e sa nchangi e kwansi, ⁷ ne cheeri charierwanga ha muntwe wa Yesu;mushi n'esanchangi, eina yakunyiwa mu uharo rumpe. ⁸ Himpo e mwemisa ngu weyanga raroso h'esinda nae wakime n'isunga,wasimira. ⁹ Bhushe nti bhasibhanga neki mbu Yesu wakomenwa ifuka mumbi bhakwanga. ¹⁰ Ne bhemisa bhakuruke ku kwabho. ¹¹ Himpo,Maria nt'iuri kumushi n'er'esinda nti urengi. Mor'ire rae wa windama mwikae kumunda ner' esinda; ¹² Wasunga ngashani sibi, uma hamuntwe ne umpe e ku mindi. ¹³ Bhamwire : momina; ongo rirengi nki? wasubhie bho: bhushwa bha kukuto mukota wani,nti n'osi kuni kwakumuria bho. ¹⁴ Mwiebha mbo,wikebhera,wasunga Yesu wasimana;iina nti wasibhanga mbu ngi Yesu. ¹⁵ Yesu wamushisha:mumina;oongo rirengi nki? oongo usondang'inye? wahaka mbu muhingi wando ishwa,wamusubhie: mukota;kubha ongo ng'ukumuria,nishee kuni kwakumuria ongo,na nendi nae. ¹⁶ Yesu wamushisha:Maria!wakae kuruma n'imushisha mu kiebrania: Rabhuni,nge riebha mbu;muhani. ¹⁷ Yesu wamushisha;ang'intinge mo bhushwa mbu ntinenki nataya kwa tita. Iina,enda kuri bhanachani n'iire bho nataya kuri tita na tita wiinu,kwa Ongo wani na winu. ¹⁸ Maria wa ku Magidarena wenda kature ebhemisa mbu wamasunga mukota,n'ebyamamw'ire we. ¹⁹ Mo murisisi we rotu ndo,rwa roso rwe kasembe;e sa ndubi sa'mpi habhesenga e bhemisa nti sarindikwa,muisubhaha e bhayahudi,Yesu weya,wishea munkati naabo n'ishisha bho: mubhesi na bhuhoro. ²⁰ N'ekinda iebha mbo, washea bho e makasa ae n'er'okanga rwae. E bhemisa bhabhese na ngowa murisunga Mukato. ²¹ Yesu washisha tu bho: mubhesi na bhuhoro! bwakianga tita wantuma,nani hotu nabhutuma. ²² Kuruma ne bhinwa mbyo,wabhuhe bho muka n'ishisha bho:mushei Mutima mushasha. ²³ Bhimbi bhasasiri bhanu e bhubhi,bhaa sasirwa yo;naambi bhaansirwi n'inu e bhubhi,bhaansirwayo bho. ²⁴ Toma,wabhikirwa mbu Iyasa,uma morikumi n'ebhabhi ntwabhesenga ho murisungwa ra Yesu. ²⁵ Bhampe bhemisa bhamushisha: twamasunga mukota. Iina washisha:kuti ntinasunga nkoru ye mishoma mu makasa ae n'iiriya e murimba mu nkoru yamor'okanga rwae,ntakoch'isimira. ²⁶ Matu munani eta,e bhemisa bha Yesu nti bhari tu kumunda na nyumba,na Toma nt'urinabho. Yesu weya,ne sandubhi ntisarindikwa,wishea munkati nabho,w'ebha:mubhesi na bhuhoro. ²⁷ Weba na Toma:risha e murimba wabhe na sisirisa emakasa ani;risha ne rikasa rabhe n'urie ro morukanga rwani,nangibhese mwea nti wasimira,eina usimire. ²⁸ Toma wamusubya:mukota wani na Ongo wani! Yesu wamwire: ²⁹ Usimira bhushwa umansunga. Bhakasanirwe imbi nti bha kusunga na bhasimira! ³⁰ Yesu waronjanga tu bhishisharo bhiingi ne bhemisa bhae nti urinabho,bhimpe bhishisharo bhiingi nti byatiranyiwanga mo karisi kano. ³¹ Iina e bhiti mbi byatiranyiwa bhushwa musimire mbu Yesu nge Kirisitu,musike wa Ongo,na murimusimira mubhesi na karamo mo rina rae. Amina.