¹ Bhusondori e r'otu rukiri rw'e Pasaka, Yesu wasibha mbwe ntambi yae yamiya ye rituka mo chuo niyenda kw'ishe, washimanga bhanarwae mu chuo, iwe washima bho. ² Ne ntanbi se bhiyo bya murisisi na mushumba nt'wamarisia Yuda Isikariote, musike wa Simoni mutima wi mushura. ³ Yesu webhesanga usi mbwishe waremuninka bhiti mo mine y'ae watukirenga kwa Ongo, n'ikurika tu kwa Ongo. ⁴ Watuka mu bhutanda, wakuto e sanchangi sae, n'itinge kikonorero n'emina cho mu mangati. ⁵ Kuruma warita micha mutengi, wabhucha ishuwa e mindi ye bhemisa bae, n'ikono ne kikonorero e minkonsi ye santumwa sae. ⁶ Himpo wiya hari Simoni, Petero, na Petero wa mushisha; Ongo Nyerekuritu, unishuwa e mindi ani! ⁷ Yesu wasubya: e kikorangy' ani, utumusibha neki cho, e ntamb' ino, ina ukusibha cho kuruma. ⁸ Petero wamushisha: inga, ongo utumunshua e mindi. Yesu wamusako: kubha nti nakushuwa e mindi nti ongo sira bhunakima nani. ⁹ Simoni Petero wamushisha: e Nyerekuritu nti e mindi ho, ina ne mabhoko, ne muntwe. ¹⁰ Yesu wamusako: ingu wamakindi kwishuwa uri ho na murao w'ishua e bhisando kongo wakond'emubhi uti na bhanu mumashuurukara ina nti bhanu bhati. ¹¹ Bhushwa wabhesanga usi ing'waamusibhura, chasingwa weba: nti bhanu bhati mushuurukara. ¹² Wakia wamakind' ishuwa e bhisando nimbara esangombe sae, warika tu mo bhutanda, washishabho: mbeti mu masibha e byamabhukore ani? ¹³ Bhanu munibhikirange, muhanisi, na Nyerekuritu, bhanu mwebhange ishu bhushwa' ani ng' iwe. ¹⁴ Kubha nakubhushuwa e mindi ani Nyerekurinu, muhanisi, na bhanu rakomenwa ishuana e mindi bhanu mu bhanu. ¹⁵ Bhushwa namabhuninka mushinga e buri ani mukore na bhanu bhubhobhubho. ¹⁶ Mor'eira, nibhushishange, e mweya we murimo nti mukiri irenge Nyerekurwabho. ¹⁷ Kuti mumasiba bhino bhinwa, mukubhesa na ngoa mumakora byo. ¹⁸ Nti nebha mubanu bati, nisi ebharondora ani, ina emitiro ikoche ibhererera. Eurirengi hima nani wanibhunduke. ¹⁹ E ntambi ino, ni bhushishange ebhinwa bhisae ibhere kinwa kisae, kongo entambi bya saa mubhesi n'esibhirira mbw'ani nge ungo. ²⁰ Muriira, ni bhushishange, ing'wakoke ewakuntumanga, nti wamanikoke nangu wanikoke, nt'wamakoke ing'wantumanga. ²¹ Na wakiya wamakindi iyebha mbyo, Yesu watingirwa na koha mo mutima wae n'iyebha: nibhushishange mor'eira uma mu bhanu wanisibura. ²² Ebhemisa bae bhakayane. Bhatingirwa na bhobha inye ngi utukurwange. ²³ Nahabhesanga uma mo bhemisa bhae ingo abhesanga washimwa nae, wabhesanga w'iseke mo bhukubha. ²⁴ Simoni Petero wamusime, wamushishe kubha inye ngi utukurwange. ²⁵ Wabhesanga w'iseke mo bhukubha bwa Yesu wamushisha mbeni inye? ²⁶ Yesu wasubya: ingo waninka cho ekitore. Watinge e kitore wanikacho Yuda Isikariote musike wa Simoni. ²⁷ Kuruma e kitore, mushumbu wakime kuri Yuda. Yesu wamushisha: e bhikorange ongo, korabyo tete. ²⁸ Ina anga n'uma munkati ne bhabhesenga bharisange wasibhanga e chasingwa Yesu wamw'ire mbo. ²⁹ Bhushwa bhima mubho bhahaka mbu kuti bhushwa Yuda ng'uri ne nku, Yesu usondange imushisha: wachure e byashima bho mu rotu tukiri ari wasonde e bhasene. ³⁰ Yuda, wakia wamatinge 'kitore watairire isaa bhushwa ntiye mutu. ³¹ Yuda warekia wamasaa, Yesu webha: entambi ino emwana w'emweya wamatatwa na Ongo wamatatwa kuri we. ³² Kuti Ongo watatwa ekuri we, Ongo hotu nt'watatwa ekuri we wesine na nt'wamutata tu kuruma. ³³ E bhana bhani, nasiya na matu makeke ninu. Munisondayo bhuri bwakushishanga ʼni, ebayahudi mutukochʼiya ekwenda ani. nabhushisha hotu entambi ino. ³⁴ Nibhuninkange mwomba mushasha mushimane, bhuri ewabhushima ani, nabhanu mushimane bhubho bhubho. ³⁵ Bhumbo ebhati bhaasibha mbu bhanu bhemisa bhani, kubha bhanu muri na nchimi bhanu bhisine na bhisine. ³⁶ Simoni Petero wamushisha: e Nyerekuritu, weenda kuni? Yesu wasubya: utukochi nemisa entambi ino ekwendangyani, ukunemisa kuruma. ³⁷ Petero wamwire: mwami, bhushwanki ntamukwemisa entambi ino? E bhuingo bwani naasibhura bho. ³⁸ Yesu wamusako: ukusibhura ebhuingo bwabhe bhushwʼani! nikushishange, nikwirengi, enchongore itabikiri ntumanituna mo meta 'shatu.