1 Bhushwa nancho, ani Pauro, mwea 'minwa wa Kirisitu kuri bhanu 'mbi nti musimira... 2 Amabhesa murekwerukira bhuni bhuri ani mo nchumo ya Ongo eyareninkw' ani bhushwa bhanu. 3 Mw' isheiwa ngi mwasibhireng' ani e nama 'nji yatuk' etirany' ani mu bhinwa bhikeke. 4 Mor' isisirisa byo mumukocha kw' ishea ebwenge bhukwengy' ani mo nama ya Kirisitu. 5 Nti byaresheiwa mo bhana bh' ebhea mo bhimpe bhiranga, bhuri bwasheiwa byo enompena mo mutima mo bhashuururwa, ntumwa n'e bhatahwa bha Kirisitu. 6 E nama njo, ng' iebha mbu entibasimira bhari mo mwandu bhabhesa mubhi uma, na bhakime mu 'ndo irai kumunda na Yesu Kirisitu mo mwasi wakonda. 7 Ng' warekiarw' ani mo mukori etukana n' emuhango w' enchumo, eyareninkw' ani mor' ikonda r' ebhunkangwe bwae. 8 Kuri ani ngu mwanunke mumbi bhashuururwa, enchumo njo yaninkwa y' etura mo ntibhasimira e bhutumba mbu bwasum' iyorukira bwa Kirisitu. 9 N' eria mo chaaka ense y' erishea e nama yabhiswa y' ebirang' ebhiti kumunda na Ongo ing' waronjang' ebhikai bhiti. 10 Ngy' asingwa n'e mabhake n'e bhukakare mo bhuari bw' ekwiyo mw' ikoch' esibhirira runotu iyeter' er' irameso r' ebhuteesa bwa Ongo 'mbu bhusira hende, 11 Etukana n' er' isasa rae r' ematu ati n' eati raterekanga we r' ironjiwe na Yesu kirisitu Nyerekuritu. 12 Kumunda nae etukana n' er' isimira kuri we twashee nchumo y' isaa kwihi na Ongo anga mitikotiko. 13 Nabhukonga hotu , angiriminya e muho bhushwa n' eminubho yani inji yasisinya mw' ani bhushe bhanu: iyo ng' ebwime bwinu. 14 Bhushwa ncho, nakome maru hamakako na Tita. 15 Etukana nae kinsi kisasa mo mbingu na mo chuo ngi mwatunjie bo 'rina rae. 16 Kongo wabhuninka, itukire mo bhutumba bw'e bwimwe bw'ae, mushei kaara mo Mutima wae mo mwea w' ekumunda. 17 Muisunga Kirisitu warike kumunda ne mitima yiinu mor' esimira, mw' ibhesa n' esimika n' ironjiwa mo nchime, 18 Kongo mukochiyorukira hima n' ebhashuururwa bhati, bhuni ng' ebhukikane, ebhore, er' ehita n' erohando, 19 N' esibh' enchime ya Kirisitu, injy' arenga kinsi bwenge, kongo murisa n' esungirwa r' iti ra Ongo. 20 Nakubha, muungu wamukoch' ironja, mo bhunkangwe mbu bhukorange kumunda niitu, bhusira hende mo bhiti bhikongange bhate n' ihaka. 21 Kuriwe kubhese bwime mor' irameso na kumunda na Yesu kirisitu mo sambuto siti, mo bhiranga n'e bhiranga! Bhibhesi mbo!