¹ Amebhese nti murifuka hima na Kirisitu musondekanye bhinwa by'ekwiho inko kuri Kirisitu warika mo mombo w'ekwabhume wa Ongo. ² Mushime ebhikai by'ekwiyo, na nti mumbi bhiri hano hansi. ³ Bhushe mur'ekind'ikwa, n'ebhuingo bwinu bwabhiswa na Kirisitu kumunda na Ongo. ⁴ Entambi Kirisitu, ngi bhuingo bwinu, wasekiya wasungwa , muusungwa hotu hima nae mo bhusime. ⁵ Muye ebhitambo bhinu bhiri mo chuo, bhusingirani, bhubhi,karawa kema, myanikiri yema, erikweshima, ng'empero y'etuhombo.. ⁶ Bhushe nambyo ngi chasingw'ebhusubhuke bwa Ongo bweya kuri ebhana b'ebhukwemi. ⁷ Munkati nabo abhesenga ngi muri bhanu eraroso, mubhesenga bhanu mukiri mo bhubhi. ⁸ Ina matu ano, mureky'ebhikai bhiti mbyo, mo bhusibhuke, mo kamungomungo, mo risua nguru, mo katere na mo bhinwa by'enkene ebyamusaa mo monu inu. ⁹ Angi mw'erane bhushukishuki, bhanu mbi murekindi kungura emwea wa karekare n'emikorere yae; ¹⁰ Na mumbara emwea mushasha, inguronjange mushasha mor'isibhirira, etukana n'ebhususe ing 'wasingwanga bhabhe ho. ¹¹ Hasira hano ari mugriki ari muyahudi, ari ngw'enda ekotende nangu ntw'end'ekotende mweni n'entw'asimira, ari mufuku ari nti mufuku; eina Kirisitu ng'ebhiti munkati n'ebhiti. ¹² Nampo, bhuri bharondorwa bha Ongo, bhakomenwa na bhashimwa, mumbare nsasi, bwongo na kwehicha na bhurongu na kirinso: ¹³ Musakani, musasirane na amabhesa hari uri na kinwa ch'obhangu kuri eumpe, musasirane bhanu mu bhanu, Imbu wakianga Kirisitu wabhusasira hotu. ¹⁴ Eina hambasiro nambi bhiti mumbar'enchime, ng'emuri w'erikocha. ¹⁵ N'ebhuhoro bwa Kirisitu, imbu bwabhikirwanga mo bhanu mw'ironja mubi uma, bhusime kuri mo mitima y'inu. Na mubhese n'iteerera. ¹⁶ E kinwa cha Kirisitu kirike kumunda mo bwingi muhanane n'isakane bhanu mu bhanu mo bwenge ebhuti, mu numbo, mu numbo sa mutima, mwesimbe Ongo kumund'emitima yinu munkati n'enchumo; ¹⁷ Na kiro muronja, mu kinwa ari mu mikorere , muronje ebhiti mo rina ra Nyerekuritu Yesu, mw'emukuruchie itatwa n'eshima kuri Ongo Tita. ¹⁸ E bhomina, mwehiche kuri bhake bhinu, bhuri bwakomenwaro kuri Nyerekuritu. ¹⁹ E bhabhume, mushim'ebhomina bhinu, n'akiro mubhesa na bwae kuri bho. ²⁰ Bhanu bhana morukiri ebhabhuti mu kinsi kikai, bhushe ncho charengeka kumunda na Nyerekuritu. ²¹ Bhatita, kiro mushosha e bhana bhinu, mw'isubhaha bhamukuruk'ekuruma. ²² Bhafuku, morukiri mukinsi kinwa bhanyerekurinu etukana n'emubhi, nti mo meso abho ho bhuri mw'imoesha bhea ina hima na kwehicha mo mutima mu bhobha bwa Nyerekuritu. ²³ Ebhiti bhikiange bhanu, muronje byo mu mutim' akonda, bhuri kuri Nyerekuritu ina nti kury' ebhea. ²⁴ Mw'isibha mbu muninkwi na Nyerekuritu mwandu m'ohembo. Mukori Kirisitu , Nyerekuritu. ²⁵ Bhushe eukorange bhubhi waninkwayo etukana n'ebhubhi bwae na utamusimirwa.