¹ Nisondange mubhese n'esibhirira hareh'ebhukiri bw'ebhita imbi byabhutingirire ani, nambi bhari ku Raodikia, nambi bhati entibharesunga embaso yani mo mubhi. ² Kongo bhabhese na mitima irisere ibongwabhongwa, bhaminwa kumund'enchimi, na bhakangana munkati n'ebwenge mor'iteerera enama ya Ongo, isibhirira Kirisitu. ³ Nama nji kumunda nayo kwarebhisama ebhusoki bhuti bw'ebhuteesa n'eresibha. ⁴ Nebha ncho kongo kutabhesingi mwea uti webhuhusa mubhinwa bya nkuse. ⁵ Bhushe, amabhese nt'indi ho mo mubhi, niri hima ninu mo Mutima, moresunga hima na ngoa ebhutunganane bhuri munkati ninu, n'eresuma r'erisimira rinu kumunda na Kirisitu. ⁶ Nampo, imbu bwangiriranga bhanu Nyerekuritu Yesu Kirisitu, mwendi kumunda nae, ⁷ Mw'ibhesa bhanu na miri na muronjiwa kumunda nae, n'eminairwa mor'isimira, etukana n'emahano ngi aninkwanga bhanu, na muronje bwingi bw'eritata. ⁸ Mubhese na kw'iranga anga mwea wabhuronja chambo chae mo bwenge wae na mu manko abhusa, mukwiseke mo myomba y'ebhea mu mahano echuo na nti a Kirisitu. ⁹ Bhushe kumunda nae ngi kurikire eribhererera riti ra Ongo mo mubhi. ¹⁰ Bhanu muri n'ebhiti kumunda nae, na nge muhanga wa kinsi bhusime na kinsi bhukakare. ¹¹ Na kumunda nae ngi kwar'endere bhanu mor'otende otende ndu nti rwaronjiwa na mine, ina m'otende rwa Kirisitu, indu rw'eritunjiwa na mine, ina m'otende rwa Kirisitu,indu rw'eritunja e mubhi w'enyama: ¹² Mw'eriarwa mo resinda hima nae ietere erirubhikwa, na murifuka nae, mor'esimira kumund'ebhunkangwe bwa Ongo imbu bwamufuranga mo bhakwi. ¹³ Bhanu mbi abhesenga bhakwi mo bhubhi bwinu na mor'efund'iyeta bhanu ekotende rw'emubhi winu, waribhukuruchie karamo hima nae, mw'ituronjee nsasi mo bhubhi bwitu bhuti. ¹⁴ Warekiya wamakind'erimya emitiro nji abhesenga yatiranyiwa mw'itukere obhansa, nji yabhesenga na bhurenda ekuri bhate wabhengayo n'irandishabyo mor'iango na misomari. ¹⁵ Watunja ebhuhime n'ebhukakare, na watereka mo bwansu, mor'ehimana rae mor'iyango ¹⁶ Anga mweya wabhuker'obhansa bhushe n'ererisa ari mor'iyomo ari bhushe n'erotu okiri, mo mweri mushasha, ari otu rw'eruhuka. ¹⁷ Abhesenga nti kirimirimi ch'ebhiseya, ina emubhi uri kumunda na Kirisitu. ¹⁸ Anga mweya wa bhususe bwa kwehicha na wa mpero yangashani, utabhunyakingi mu bhusukute bwae emwengerero w'erikanyaha rinu, n'akubha nti utukange mo myanikiri yae na nt'urisere ngari ya bhusa y'emyanikiri yae y'emubhi. ¹⁹ Nti ntiwetingire mo mukakare, ingu emubhi uti wasakirwa n'etingirwa hima mo bhitambo n'emisi, byatukire mor'eninkwa byo na Ongo. ²⁰ Amabhese nti mumakind'ikwa hima na Kirisito mo bhinwa by'echuo, inki chamusingwa bhuri bhanu muri m'ochuo, muminwa nango momba: ²¹ Ang'etinge! angi rora! ang'imamata! ²² Mwebhe ngu euti wabhiha mo ntambi y'eriemisao mw'ebhishao, na uri na ntangiro yao mo myomba na mahano ebhea? ²³ Bharikire, moreira, bhususe bwa bhuteesa munkati nanchi chashea mpero y'isasa rabho bhesine, mor'ikwehicha na mor'inena e mubhi, eina risira anga bhisabho na ikokomesha e mubhi.