¹ Er'otu rw'epentekoste, bhabhesanga nti bharikire na mutima uma-hima. ² Mu 'nko kashangi kwahita okindo etuk' ekwiyo buri eyuhu reya na maa rarisiy'enumba yabhesanga iri mo 'bho. ³ Hasungwa kuribho mansense bhuri akasha ahite mukinsi uma. ⁴ Bharisiwa ebhati Mutima Mushasha bhabhucha iyebha mu myebhe mishasha, imbu wakianga e Mutima wabhunduranya bho e rwami. ⁵ Abhesenga bhari ku Yerusaremu bhayuda ntibariko, bhea bh'eira, ituka mu sanganda siti sa muncho chuo. ⁶ Mor'okindo rwabhesanga mpo warukirwa e bhikembe byakumanananga mpo,byashishara bhushwa kira mweya worukira ntiye bhebhange momwebhe wae. ⁷ Bisarima ebhati, bhashishara bhashishana: e bhatimbi bhebhange nti bhisa ku Gariraya? ⁸ Kiribhuni-kino bhate tworukira kinsi mweya webhange mo mwebere witu we ributwa? ⁹ Baparti na Bamedi, na Baelamu, nambi barikanga ku Mesopotamiya, Yudea, na Kapadokia-Ponto na ku Asia. ¹⁰ Furukia na pamufiria, ku Misiri na muruharo rwa ku Ribiya kwihi na ku kirewe, na ku Roma bheni-BaYuda, ne n'ebashasha. ¹¹ Bhakerete, ne bhaarabhu; tworukira bho bhebhange mo mwebhe witu. kengeko kakiri ka Ongo. ¹² Bhisarima e bhati bhatingirwa na koha, bhashishana inki e kinwa kino? ¹³ E bhampe bhakia bhuhaka, nti bhebhange: bhamatamira mau a mashasha. ¹⁴ Himpo Petero wasimana ne bhampe ikumi na uma. warekera emurenge, were bho: bhanu bhabhume bha ku Yuda na bhanubhati, bhanu emurikanga ku Yerusaremu: e kinwa kino kisibwe kuri bhanu, morikire e bhinwa byani. ¹⁵ Ebhea mbi ntibhake mau, ebwanikirange bhanu, bhushwa ntambi shatu sa mukomakomansi: ¹⁶ Ina kinwa kino ngi ch'ebwanga ne mutahwa Yoeri. ¹⁷ Rabhindukeyo mo matu ehende, Ongo webha, Nseritayo e Mutima 'ni mo bhea bhati, ne bhana bhinu, ne bhitasa bhinu byebhayo bhutahwa, Ne misike yinu yaasheiwayo, Ne bhakungu bhinu bhanontayo nsori. ¹⁸ Na munkati ne matu iyayo na kubhurayo e mutima wani-hambasiro n'e santumwa sani bhabhume n'ebhomina nabhobhebhayo bhutahwa. ¹⁹ Nasheayo bhishisharo ekwiyo mo mbingu na twengeko mo chuo ekwansi. nchama, kasha n'otundo rwa mwiki. ²⁰ E mwishi wabhundukayo mwerimya ne mweri bhuri nchama. Bhusondori rubhererere erotu rwa Nyerekuritu, otu rukiri rwabhishisharo. ²¹ Na rabhindukeyo kinsi mweya usebhikir' erina ra Nyerekuritu wooshukarayo. ²² Bhanu bhabhume bha Isiraeri, morukire e bhinwa bhino: Yesu wa ku Nasareti, mwea washeiwanga kuri bhanu na Ongo mu mikorere ya bhishisharo, twengeko, na bhiteerere byakoranga Ongo mo mombo wae munkati ninu, bhanu bhesine musi, ²³ Uno wakutingirwanga ninu, mu nama yakuminwanga, na murisiba ra Ongo itukire kare, na bhanu mumunubya, ni muya mo mine ye bhea bhema. ²⁴ Ina Ongo wamufura, n'emutunja mo bwae werikwa, bhushwa abhesenga ritamukocheka watingirwe naro. ²⁵ Bhushwa Ndaudi webha kuri we: nasunga Nyerekuritu ekubhusondori e matu ati bhushwa uri mumombo wani wekwabume kongo kiro nanubha. ²⁶ Murira, E Mutima wani washima, e rwami rwani rwamoa: Ne mubhi wani warika mu mwinyihiro. ²⁷ Bhushwa utusiiyo e Mutima wani erotu rwe rikwa ekwerunga, Naha utungasianga e mukomenwa wabhe wabhishiwe. ²⁸ Umanishea ense ye karamo undisiya ngoa ha mbaso yabhe. ²⁹ Ebhanakitu mundeki nt'ebha anga bhobha bhusondori ninu, e myasi ya tita mukwakare, Ndaudi, mwiyeba, wakwire, watawa, ne risinda rae ririkirekuri bhate runotu. ³⁰ Himpo bhushwa abhesanga mutahwa, wasiba mbu Ongo wamwirenga irai, wasere, mbu munkati nkumo yabhe bhura wabhe, mwasimanayo Mukota warike munkati ne kitumbi ch'abhe che bhubhake. ³¹ watangira isunga ebinwa bhino, webha e myasi ye rifuka ra Yesu, mbwe bhuingo bwae ntibwasiarwang' e kwerunga, ne mubhi wae n'tiwabishiwanga, nti wabhonga. ³² Ingo Yesu Ongo wakumufura na bhate bhati kariho. ³³ Himpo wamakindi itarishiwa mu mombo we kwabhume wa Ongo ni angirira kwa Tita e ndani ye Mutima mushasha ungo wamakubhura echamasunga bhanu n'iyorukira. ³⁴ Bhushwa Ndaudi ntiwatayanga e kwiyo, In wesine webha; Nyerekuritu webhanga kuri Nyerekuritu, Rika mu mombo wani w'e kwabhume. ³⁵ Iya mo 'ero ntariy' ebharenda bh'abhe kwansi ne mindi yabhe. ³⁶ Kongo bhaisiraeri bhati bhasibha mor'eira mbu Ongo wamatunganya Yesu ingo wanubhiwanga, Wabhinduki Nyerekuritu na mubhake. ³⁷ E ntambi yorukiranga bho ebhinwa mbyo, bhashire mo mitima y'abho, bh'ere Petero ne simpe ntumwa; Bhanakitu tukie bhuni? ³⁸ Petero werebho; mubhunduke, murubhikwe morina ra Yesu Mukota. ³⁹ Bhushwa endani ino bhushwa bhanu ne bhana bhinu, na mo bheya bhati ebhari kore, ne bhati bhabhikirwayo na Nyerekuritu Ongo witu. ⁴⁰ Werebho mu bhimpe bhinwa bhingi n'ihana bho, w'ebha; mwiramye bhanu bhesine ne ruanda runo rwarimina. ⁴¹ Nambi ebhangiriranga ebhinwa byae ne sangoa bharubhikwa; n'er'uto ru'ro kwabhinduke kikembe cha bhea bhihumbi bhishatu. ⁴² Bharikanga nti bhari munkati ni hanwa bhinwa ne santumwa, na munkati na bhunakima, na munkati n'ekibhimbi ch'erisa etubhonsa nihema. ⁴³ Himpo ebhobha wakime kinsi mwea; na bhishisharo, na twengeko twingi twaronjiwa ne santumwa. ⁴⁴ Ne bhati ebhasimiranga bharika hima, bhabhinduke n'ebihkai, bhiti mu bhunakima. ⁴⁵ Bhachuya ebhiti byabho, bhabhanya ebhiti byabho imisanya ne mirao ya kinsi mwea. ⁴⁶ N'otu m'otu bhabhesanga mu mwanikiri uma bhakime mw'irameso, mw'irameso ekibhimbi numba mu numba, n'iangirira ebiyo byabho mu ngoa, na mumutima uma. ⁴⁷ Bhatata Ongo, ne bhea bhati bhashima, na Nyerekuritu warisiya erirameso kirotu imbo abhesenga bhoshukarange.