¹ E Teofire, n'ebhanga mo karisi k'ani ka 'roso, ebhiti byakoranga Yesu n'ihana etukire mo ntangiro; ² Iya mor' otu ndo rwakukumwanga we nt'wamakind' eninkana e myomba e mo Mutima Mushasha kuri e santumwa sarondoranga we. ³ Kurum' er' inubiwanga rabho matu makumi anye, W'ebha nabho bhikai byakae 'bhubhake bwa Ongo. ⁴ Nampo wakumanana nabho, were bho kiro mutuka ku Yerusaremu, murindire erirai ra tita rorukiranga bhanu kuryani. ⁵ Bhushwa Yohana warubhikanga mu mecha ina bhanu mukurubikwa munkati ne Mutima washuururwa kuruma na matu nti mingi. ⁶ E ntambi ya kumanananga bho bhamushisha: Nyerekuritu, ukuruchie e bhaisraeri e bhubhake wabho mo matu ano? ⁷ Werebho; nti bhinwa bhinu isibha e matu, n'ebhiranga bhikai bhirikire mo bhunkangwe wae. ⁸ Ina mukuninkwa bhunkangwe e Mutima Mushasha usekia wamabhuhite, na mubhinduke kariho kani ku Yerusaremu, na ku Yudea kuti, na ku Samaria, iya na mungendero ye chuo. ⁹ Mor'ekind'iebha we 'bhinwa mbyo, wakukumwa, na nti bhamusungange erutundo rwamwangirira ituka mo meso abho. ¹⁰ Bharekiya bhasumye meso ekwiyo warekiya weirengi; bhea bhabhi, bhari na myambaro isanange bhasimama kwihi nabho. ¹¹ Bhebha: bhanu bheya bha ku Gariraya bhushanki mumasimana. Murikae ekwiyo? ingu Yesu wamakukumwa ituka kuri bhanu ni taya kwiyo, wiyayo hotu mo bhususe bhubho bhubho bwamasunga bhanu murienda rae ekwiyo. ¹² Himpo bhakuruke ku Yerusaremu ituka murou rwabhikirwa Seituni ruri kwihi na ku Yerusaremu chunda ch'oendorwa Sabato. ¹³ Bharekiya bheya bhakime murichumbi rekwiyo ngi kwa rika Petero, na Yohana, na Yakobo na Anderea, Firipo na Tomaso Bartoromayo, na Matayo, Yakobo musike wa Arfayo, na Simoni-Serote, na Yuda musike wa Yakobo. ¹⁴ Ebhati-mbo bhabhinduke ntibarihima munkati n'ihema Ongo mu muhaki uma; hima na bhomina, na Maria nina wa Yesu na bhasike bhabho. ¹⁵ E matu-a,wasimana Petero munkati e bhemisa, abhesenga iyana na makumi abhi. ¹⁶ Webha:bhanakitu bhabhume: rarengekana e mutiro ubhererere echebhanga e Mutima mushasha webhanga kare,mo bhunu bwa Ndaudi,bhushwa Yuda murisondore ebhendanga katinge Yesu. ¹⁷ hBushwa bhamwansa hima nitu waninkwa na muhango muno murimo. ¹⁸ Himpo e mwea uno waninkana mbai mwishwa mu bhehe bhubhi bwa. Wabhereka, emishoro iti yae yarongoka. ¹⁹ Chasibwa ne bhea bhati ku Yerusaremu ne rishwa rabhikirwa mo mwebhe wabho Akeldama ng'er'iebhambu ishwa ra nchama. ²⁰ Bushwa chatiranyiwa murwandiko rwe Saburi: e buriki wae busiye mukunguru na butarikiyo mo mweya umpe watingi ehakorengi rero we. ²¹ Himpo munkati ne bhea atuka bhemisanya nitu mu kinsi kashangi kakubhesanga bhate na Nyerekuritu. ²² Itukire ebhurubhike wa Yohana iya na murotu rwatarishiwa ngae, murituka munkati n'itu rakomenwa uma wabhinduki kariho ke rifuka rae munkati nitu. ²³ Bhashea bhabhi, Yosefu wabhikirwa Bharisabha, waninkwanga rina ra Yusto, na Matia. ²⁴ Bhahema, bhebha: ongo Nyerekuritu usibirira emitima ye bhea bhati; tushee inye ng'warondora ongo munkati ne bhabhi. ²⁵ Watinge emuhango wae mobhufuku bhuno na ntumwa mundikaro yamasia Yuda, watingiyo. ²⁶ Bhakubh'esambai, esambai sake kuri Matia, hima ne santumwa ekumi n'enima.