¹ Mumunsimirange kuti mo bhuashaasha bwani. Eina mumanisake! ² Bhushwe ani mwea wa mono kuri banu mu mono wa Ongo, Bhushwa nar'ibhusondekanyie wabhume uma muribhushea kuri Kirisitu bhuri kitasa. ³ Ebwakiyanga muna nsoka wahusa Eva mo mpuse yae, nasubhaha mo bwenge bwinu, kiro bwachurwa n'ebhundurwa etuka erihunda ra Nyerekuritu. ⁴ Bhushwe, kuti uma wameya kabhuhana, umpe Yesu nti 'ngu wakuhanwa nitu ari mumaninkwa umpe Mutima nti 'ngu waninkwanga bhanu, ari umpe mwasy'akonda nti 'ngu watingiriranga bhanu, nti mukia 'shu imurindire. ⁵ Nakubha n'esunganga nty'ani mukeke ireng'esantumw s'aroso nkiri-nkiri. ⁶ Kuti namurengwarengwa etukana n'emwebhe, nti 'nge bhumbo mo bwenge na nashea cho ekuri bhanu mu kinsi kikai. ⁷ Ani nakiyanga bhubhi mor'ikwehicha ani sine, kongo mukukumwa mor'ibhutur'emwasy'akonda wa Ongo busa? ⁸ Nabhesa nti ninyakange ampe marameso, mor'impa o ohembo, mw'ibhukore na nakukiya nirikire ko kwinu mo ntambi y'emirao nti narihema mweya. ⁹ Bhushwa bhanakitu mbi bhatukange ku Makedonia bhabhesanga bhariyang'emirao yani. Mo bhikai bhiti nabhesa nti n'irangange kuri bhanu, na nikiri nsekwiranga mwefundi bhuriesha emirao y'ani. ¹⁰ Mor' eira ra Kirisitu ndi ririkire kumunda n'ani, n'ebha mbu er' itatwa ntamuruka ra mor'oharo rwa ku Akaya. ¹¹ Bhushwa nki?... bhushe nti nabhushima? Ongo usi. ¹² Eina ekironjangy'ani nasekora cho, kongo nahangire ebhasondange bhuari bhatasheingi bho, bhabhesi bhuri bhate mo bhikai byitatange mo bho. ¹³ Imbo bhea bhatahwa bha manko, bhakori bhashukishuki, bh'iambichange bhususe bwantumwa sa Kirisitu. ¹⁴ Nti cheshishaya, Nyamuraire webhunduranga mu bhususe bwa ngashani ya chaka. ¹⁵ Nti bhinwa bhishasha na mo bhakori bhae mor'ikwebhundura bhakori bh'er'eira. Engendero yaabho isesusana n'emurimo ukorange bho. ¹⁶ N'ebha tu kiro mweya wansunga bhury'ani kirunge; nti 'mbo muntingi bhuri kirunge, Kongo n'ani n'etundurika rikeke. ¹⁷ Echebhangy'ani hima na mwenyihiro wa kw'etundurika, n'ebhange cho nti chatukana na Nyerekuritu, ina bhuri bhuashaasha. ¹⁸ Bhushwa kuri bingi bhitatange etukana n'emubhi, n'ani hotu nsekwitata. ¹⁹ Bhushwa bhanu mworukirengi n'ebhiashaasha bhanu 'mbi mukwengy'ebwenge. ²⁰ Kuti mweya wabhusimanire, kuti mweya ubhurirengi mo, kuti mweya wabhunyaka, kuti mweya w'eyume, kuti mweya wabhukasure hambaso, nti mumukairire. ²¹ Nakwa nkene s'iyebha cho, twamashea bhutetera, Nakubha ebhiti byamereka mweya, nebhampe buri kirunge, n'ani namwereka byo. ²² Ibho bhaebrania? N'ani hotu; Ibho bhaisiraeri? N'ani hotu. Ibo bhana bha Iburahimu? N'ani hotu. ²³ Ibho bhakori bha Kirisitu? N'ebha mpo bhuri eshire. Ani mukori irenga: mo mirimo, rarenga, mo bhihumbo, rarenga; mor' eminwa, rarenga; ngendo ningi iya moero rw'ikwa. ²⁴ Ngendw'isanu nasundwa bhihumbo makumi anye aruka nima. ²⁵ Ngendw'ishatu nisundwange tushushu; nakonorwa rima; Met'ashatu nasond'itiya; n'echa mutu na mumwishi n'iri mo misie y'enyansa. ²⁶ Meta mingi mo sangendo nasond'etiya mo sangesi; isond'eshurwa na bhanyai, isond'ishurwa na bhanakitu, isond'ishurwa n'ebhea bh'esenganda; isond'eshurwa mosambungu; isond' ishurirwa mo bweru; isond'ekwire mosenyansa; isond'eshurwa na bhanakitu mbi bh'ema. ²⁷ Nakubhesanga mo murimo mu minubho, ntambi singi ang' iyenda toro, iyorukira rwaka na mbusha ya mecha; mu mahemo ang'irisa, iyorukira keme, n'ienjiwa munkanga. ²⁸ Ntamweba ebhiti; natimbwa na bhonso bwatukana n'emyasi y'emarameso. ²⁹ Inye ngi mutetera, nta'bhingi we n'ani? Inye ng'wakire, ntashiringi n'ani? ³⁰ Kuti kwitata, nti mo bhutetera bw'ani ngi musekwitate' ani. ³¹ Ongo ng'ishe wa Nyerekuritu Yesu, na ng'wakasanyiwa ematu ati n'eati, usi mbu ntangatima. ³² Ku Damaski, emuhanga w'emubhake Areta, wabhesangu nt'urangange er'obhungu rwa bhisa ku Damaski mw'enitinge. ³³ Eina nahichiwa mu k'orubhi kakeke, mu mutundu, w'endende 'rukumbu, n'oswa eroku.