¹ Ne bhafuku bhati, bhihiche kuri bhanyerekurwabho mu nsubhaha, kongo e rina ra Ongo ne mwenjo utakambwingi. ² Nambi bhari ne bhasimiri bhanyerekurwabho kiro bhanena bho, mwiebha mbu bhari ho na bhunakima nabho, ina bhasibhe hombu ibho bhasimiri n'eshima ikore bho byahunda. Hana bhino n'ebwamuronja bho. ³ Kubha mwea wahana mwenjo wema n'itina e bhinwa byahuna, bya Mukota Yesu Kirisitu mwenjo watukana ne bhurongu. Mwea ⁴ w'eyume, nt'usi kikai, uri nishisha rema ra bhuhaka bwa bhinwa, bhirishange mbangu, ishuanya, ne tumensimeni. ⁵ Mahaka ebhea bhachuka mitima, bhasira eira n'ianikira mbu e bhurongu ng'e nse ye mwengerero. ⁶ E ntangiro ye mwengerero nty'e bhurongu n'esangoa. ⁷ Bhushwa nti twiyanga na kikai mo chuo na twakuruki nti tusira kikai. ⁸ Twamabhe turi na bhiyo na nchangi bya tukomenwa. ⁹ Ina, e bhashima kwitumbia, bhakimengi mu mereko, mo tukunda, na mu mirao mingi isire bwenge isingwange e bhea bhakime mu bhubhisha n'erimina. ¹⁰ E rishima e bhehe nge ntangiro ye bhubhi; bhushwa bhima mo mbusha iye bhari kore n'e nsimiro, na kweria bhesine mu ngerero yema. ¹¹ Kuri ongo mwea wa Ongo, bheka e bhikai 'mbyo, nasonda e riira, er'ikoma, nsimiro, nchime, ihehera na bhongo. ¹² Kwana bhita byahunda bye nsimiro, tingirira e bhuingo bwe matu ati, bwabhikirwanga ongo munkati na bhea bhiingi mbi bhasunganga. ¹³ Nakutereka mo makako a Ongo ngu uninkange e bhikai bhiti bhuingo, na mo makako a Yesu Kirisitu ngi washeanga byahunda mu makako a Pontio Pirato, n'iranga e myomba. ¹⁴ N'angi rika na myekero; na bhibhi n'ebwakuruki Mukota witu Yesu Kirisitu. ¹⁵ Mu bhiranga byae, byasheiwa mw'ewakasanirwa, wesine, ikasanirwa mu maa ae wesine, mubhake w'ebhabhake, Mukota we bhakota. ¹⁶ Wesine ng'utamukwa, ungu warika mo chaaka mpi hatamurika mweya, kusira wamamusunganga e matuati. Amina. ¹⁷ Rera kuri e bhatumba bhe kiranga kino, kiro bhabhese n'eyume kiro bhenyihire bhutumba bwesira tete, ina ebhutumba bhuriarwe kuri Ongo ng'utuninkange e bhiti bhiri mor' omoo. ¹⁸ Hema bho mwikora byahunda, bhabhesi bhatumba munse yakonda; bhea bh'eninkana, bhakoane na bhampe. ¹⁹ Bhebhiki mihango ntangiro yahunda mo bhiranga mbi byeyange, bh'etingiri mu bhuingo bwiira. ²⁰ Oongo Timoteo, ranga e muhango wabhe, anga ikime mu mahaka abhusabhusa ingi e manko. ²¹ E mahaka bhushwa ne mahaka ema atambange, e bhea bhamutunjanga mo nsimiro. E mukisa ubhesi n'inu.