¹ Pauro, ntumwa ya Yesu Kirisitu, mu momba wa Ongo rukombora witu na Yesu Kirisitu ngi mwinyihiro witu. ² Kuri Timoteo, mwana 'ni mor' isimira; e nchumo, ne bhoonso ne bhuhoro, uninkwe byo na Ongo Tita na kuri Yesu Kirisitu Nyerekuritu. ³ Nakusubhukia mo byakutondenga mw'ani mor'etuka r'ani ku Makedonia narekiya nakutinge mw'irika ku Efeso, Mw'ihana bhea bhima kiro bhahana impe myenjo. ⁴ Na nti bhatetingiri mu ngano na mu mabhutwa asira kinwa, ingi amubhuta mahaka amusinga e murimo wa Ongo wafund'ienda e kubhusondori muresimira. ⁵ E chahun' e myomba, nty'enchime yatuka mo mutima wahunda, mutima wa kwesibhirira na isimira shushu. ⁶ Bhimabhima, bharekia bhamabhinduka mo bhikai mbyo, bheriminya, mu bhinwa bya bhusabhusa. ⁷ Bhasondnge ibhesa bhahani bhakiri bhe myomba, na bhantangerikira na'mbi ebyebhange bho, ari bhisimirange bho. ⁸ Ntitwasera mbu e myomba yakoma, ina rakomenwa nti twemisayo ishu. ⁹ Isibha mbu e myomba nt'yakorwanga mo bhis'e riira ina bhushwa ebharimira n'ebhakwemi, e bhakonsikonsi ne bhabhi, bhatendanga mu rushu rwa Ongo, ne ntibhai e kinwa, bhayeri. ¹⁰ E bhasingirani, ebhakonsi, ne bhibhi bye bhea, e bhashukishuki, e bhabhangani ne bhaserenga mu manko, mu bhiti bye rirenganya e reira re mwenjo. ¹¹ Etukana ne kinwa cha Ongo che bwime bwa Tita mine bhuhoro, kinwa cha Ongo e chambesangae. ¹² Natata ungu e wampesenga e bhunkangwe, kuri Yesu Kirisitu Nyerekuritu, iwe ngwanikerenga e rubhansa ishu. ¹³ Mw'intereka mo murimo wae, ani ngu nabhesenga waroso mukwemi, muyeri, wabhume mubhisha, muyeri, mweya mubhisha, Ina narishee isasi, bhushwa nabhesenga nikorange mwisera, mu bhubhi. ¹⁴ Ne nchumo ya Nyerekuritu, hima n'er'esimira ne nchimi e iri kuri Yesu Kirisitu. ¹⁵ Kino kinwa cheira na chakomenwa irisiwa mbu Yesu Kirisitu wiyanga mo chuo mwishukaya e bhabhi, n'ani ng'waroso mubhere. ¹⁶ Ina nasheenga isasi, Kongo Yesu Kirisitu washea kumunda n'ani waroso mubhere, w'eririndishiwa, bhushe nibhesi ihano mumbi ebhasimusimirayo mu karamo ke matu ati. ¹⁷ Kuri e mubhake we bhiranga, utakwanga, utasungwanga, Ongo wisine, waninkwa otunda na bwine, mo bhiranga ne bhiranga amina! ¹⁸ E myomba yakuninkanga ani, Timoteo, mwana 'ni, itukana ne bhutahwa e bwar'ebwa kubhusondori bhushwa n'abhe, itukana nambyo, ongo kwanishange bhita byakoma. ¹⁹ Muriranga e risimira n'er' ikwiteerera, bhima bhareriminyaro n'etiisha ensimiro y'abho. ²⁰ Munkati nabho kuri Imenayo ne Isikanda, ngi bharesibhura 'ni kwa nyamurairi, bhushwe bhahanwe efundw' ikamba Ongo.