¹ Abesenga utu rwa roso muriinga, mukomakoma nguru, benda e kusinda, barisha e kumanano ishi ya besenga ya kushisha bo, nambi wampe bendanga hima nabo. ² Basunga e rikokoi nti bamukitoro kumunda ne sinda. ³ Na bakime kumunda batasungi e mumbi wa kukota Yesu. ⁴ Basunga nti bishisharo mu binwa mbi bwameta, basunga, beya babii nti bamasimana kwihi nabo nti bambara nchangi sa sana nguru. ⁵ Nabo basenge nti bari na booba wingi bake kwansi, nabo bashishi, inki ashibwa musonda ingu ushere kumunda ne sinda?(bakwa?) ⁶ Iwe usira tu ano, iwe wamafuka; mukandire mbu wakianga wemba ninu matu abesenga nti watamatuka ku Gariraya, ⁷ Wemba, rarengeka e mwana we beya irierwa mumine ye beya mbi bee bibii na imunubya, ne rifuka utu rwa ishatu. ⁸ Bakandira e binwa bya Yesu ⁹ Bakuruka ituka ku kusinda, e binwa bibiti bya bashisha byo e santumwa sae ikumi na uma, ne bampe bibati. ¹⁰ E bamina mbi baturanga e ninwa mbi kuri e santumwa abesenga Maria makidarena, Yohana, na Maria nina wa Yakobo, na bampe bamina hima nabo, bashishanga e santmwa e binwa bibyo. ¹¹ E binwa byabo byasungwa busa munkati nabo, na bahundwa ibasimira ibo bamina. ¹² Petero naye watuka, wenda tete e kusinda, weya asinda wasimana, wainyinya kumunda, wasunga naye nti e sa nchangi ibi sabesenga sambarae nti samabikwa kumushi, wakuruka ku kwaye nti uwishishange mu binwa mbi byameta. ¹³ Nasunga, murutu rundo rundo, babi mutumwa babesnga nti bendake mu ubungu ruma rwa babikirangero umbu ku Emausi, ntichirikore na ku Yerusaremu nti ari rwendo rwa ntambi simbii. ¹⁴ Na ntibatiranengi e mwasi nchi yetayo kuro. ¹⁵ Na babesenga nti bakiri baturane ngi e mwasi incho ishishana ibo kwa ibo, Yesu wisine wa kumana bo, nae wachuchana nabo. ¹⁶ Sasa e meso abo abesenga bui aminwa bari nae na ntitibakumusimba. ¹⁷ Washisha bo, bini binwa mbi byebange banu bya boonso na banu mwendange, basima na ntibarina boonso. ¹⁸ Uma mubo babi, rina rae Kiriepa, wamusubie, ungo uma ho mwendendi mu Yerusaremu oongo ntinge usi e mwasi uno ya kweta kuko mumatu ano kuko,washi bo bini binwa? ¹⁹ Wamushisha binwa bya Yesu wa ku Nasereti, ungu wakesa na musheeri wa nguru mu kinwa cha ôngo na mu beya bibati, ²⁰ Na mubumbu e bakakare be sa ndushu na mbi batweberenga bate umbu bakumininkana bo mbu bamushure, na bamukama. ²¹ Na tabesengayo twamainyihire mbu iwenge waramwa Israeri. Na mwisha tu ne binwa mbi, runotu runo rwameya matu ashatu, itukire e binwa mbi byeta ibi bibiti. ²² Na abunduke tu bamina babi batutinga bakukitu benda e kusinda mukoma koma nguru. ²³ Bakianga beya asinda batasungi e mubii wa wae, beya baturaombu bakusu e sansori se ba Maraika ibii bakesao umbu iwe wa mashukara iya ushere(wamafuka). ²⁴ Kwabesenga bima ntibari hima nabo benda e kusinda, nabo basunga mbu wakesa e mamina, nabo batamusungi. ²⁵ Yesu washisha bo, e banu mbi musira wenge nabi bine mitima ya ritowa isira isimira kumunda ninu, mubiti mbii bya kwemba e basheeri! ²⁶ Banu nt musimba mbu Kirisito, wamusunga e minubo chii mwisha rae musona wae itaya mu wame we kwiyo? ²⁷ Na watangira mu kitabu cha Musa na basheeri bibati, na iturebo e binwa bibiti mbi byashibwanga batira e mwandiko iyu nacho. ²⁸ Bakianga bamabungure e rubungu ndu rwenderenge bo, nae wasondore bo tu. ²⁹ Nabo bamuranda, bamushisha tu chetane, mwisha e butu busondange isira, iya banye beta wakime mu numba ima nabo. ³⁰ Na wakianga wamarika nabo tubarisange, watinge e kambosa ne rikasanye ko, wanawa ko ne rininka bo ko. ³¹ E meso abo arinduka, bamusimba, waribisama munkati nabo. ³² Bashishana e mitima yitu nti ya kuisarimana muntambi nchi mumunse, ni tusosomore rwebange e mitiro. ³³ Benda muntambi incho incho, bakuruka tu ku Yerusaremu, bakumane e santumwa sae ikumi na nima ntitibabakumanena, nabo ntibameya hima nabo. ³⁴ Benda, yira mukota wamafuka, wamasungana na Simoni. ³⁵ Nabo bature bo e mwasi ye binwa mbi byakweta mumunse, nabu wakikia bamusimba muntambi nchi yeri kakanye e kamboosa. ³⁶ Na bakianga baturange e mwasi ngo, wesine Yesu wasimana munkati nabo, washisha bo nabukeya. ³⁷ Kumunda nabo bishishirisha basubaha, baihisha kuwa bakukumanena ni kitingi. ³⁸ Nae washisha bo, banu muishishirishange mwisha nkii, na buni musubahienge nkii mumitima yinu? ³⁹ Musunge e mine yani ne mindi yani, nti ani wisine uno, munitinge mona musunge mwisha e mutima he usira mubii na makuwa. ⁴⁰ Wakianga wamemba mbo washa bo e mine yae ne mindi yae. ⁴¹ Mwisha munkati ne ikokoma nabo, babesenga ntitinesi basimira murisheshemerwa, washisha bo banu muriano na kikai cheririsa? ⁴² Bamuninka chunda cha kikwa cha tekwa, na buki bukeke. ⁴³ Watinge, warisa munkati nabo. ⁴⁴ Na kuruma washisha bo, ibyonge binwa bya bushishanga ani ntinikiri ninu hima, mwisha e binwa bibiti byete mbi byatirwanga mwisha nani mu matu ya Musa na mu basheirwi, na munkati ne saburi. ⁴⁵ Na kuruma warindo e wenge wabo basimbe usimba umbu wemba e mitiro. ⁴⁶ Washisha bo, nge bumbu watiranga bo, nange bumbu byarengekana Kirisito ikwa na inuba na ifuka uturwa ashatu umbu werwanga. ⁴⁷ Ne binwa byo bye musasiro ne risasirwa re bibii bitu rirwe mu rina rae mu chuo chichiti, itukire ku Yerusaremu. ⁴⁸ Na banu musebese bashuhura bye binwa bo. ⁴⁹ Na musunga, narebeka murembe wa tita wani, rakini murinde mu rubungu rwa ku Yerusaremu, na asekia mushe e maa e mutima mutaberi sasetuka e kwiyu. ⁵⁰ Na waimisanya nabo abutara mupaka ku Betania, wasimanya e mine yae ne rikasanye bo. ⁵¹ Na wakianga wamakasanye bo, wisiyanya nabo, na wataya ku mbingu. ⁵² Nabo bamukoke, bakuruka ku Yerusaremu ne sangowa sikiri. ⁵³ E matu yati babesenga ku munda ne numba ya ôngo ntibatatange ôngo ne rimukasane.