¹ Bùumbu, banakitubashururika, biimbi babese muribikirwa ra mumbingu, mwishishe nguru kuri entumwa ne mukakare mukiri wenkumano hiitu, yesu. ² Abesanga washururika kwae ùungo wamubikanga, buri musa nawe wabesanga, munkanti ne mgumba iiti ya ôngo. ³ Mwisha huo ambisanga wakomenwa bwine irenga musa, buri-mbu iwe waronjanga nyumba iingi iri na heshima nguru irenga nyumba himpe. ⁴ Mwisha kira nyumba ya ranjiwa na mweya; ina ùungo waronja ebikai bibiti nti ôngo. ⁵ Na musa muriira wabesanga washururika munkanti ne nyumba hiiti ya ôngo buri mukori ( kahungu ) ; ⁶ Ina kirisito, buri mwaana, mu nyumba ya ôngo; bùumbu enyumba yae nti baate, kuba twiseke nguru kuri-we mupake heende. ⁷ Bùumbo, bwebange mutima mutima murenge wai, ⁸ Kiro mubese na mtima ya suma, buri ntambi imbuka, ôotùu rwijaribiwa mukanti ne bwenu, ⁹ Hiimpo batita bitu banijaribianga, ba mpima, basunga mirorere yaani miaka makumi anye. ¹⁰ Mukiicho nayogwanga ne kisasa choo, neeba matu iati nti beya warituka mumitima kare; nti bakusiba ense saani; ¹¹ Buri nakusere mubusubuke bwaani, batakoshi ikime muri kokoma raani. ¹² Mukai, banakitu, kuba ubese uma wiinu ùungu uri ne mutima wasuma ùungu usira iamini ( irisiya ), muri kwitunja kuri ôngo. ¹³ Rakini tondane matùu hiati, mwisha kira unu kuri baanu kiro wakime mukakunda kee nsambi muritimwa. ¹⁴ Mwisha twamabese banakima na kirisito, kuba twitingere nguru buri mwanso muriira. Rwiru mu kaara mpaka héende. ¹⁵ Hiimpo byebwange, runoôtùu, kuba muurukira emurenge wae, kiro musumya emitima iinu, buri ntambi yerisubuka. ¹⁶ Mwisho nti banye basubukanja, mu ntambi ba rukiranga ? nti biimbi bibati batukanga kumisiri biimbi baongoswanga na musa? ¹⁷ Na ntiinye ùungu wayogwanga naba mya'aka makuanye ? nti biimbi bakoranga biibi, bakwirenga mu bweru? ¹⁸ Tena tùu nti inye uungu weserenga kuba bata kimuyo muri kokoma rae, ira biimbi ba koranga biibi? ¹⁹ Basi twasunga kuba nti bakimenga mwisha nti basimiranga.