¹ Leye, mbuta akambo wafona la yoho yekila. ² Mbuta da esombe wahomba ndjala tshitshi, okitshakitsha, ndjakonge, ekila lo mbetawo, lo dilemwelo, lo mbikike. ³ Mbuta da adimato wepalanga pombaka ndjala la landja ke sungana la ekilameko, aha ndjala omonyodi, kana ndjasha lo wana; kehombawo ndjasha lo wetshelo wa dimena, ⁴ La lokani la fundisha esekaseka wadimato da nanga awomi wawo ndo ana wawo, ⁵ La ndjakime, nama obikira, ndjasha lo pepe ke lo loodu, dimena, kyolamelo le awomi wawo, kele oteketa wa Zambi hawoyotolama. ⁶ Sengasenga kanga elongolongo da ndjala la kyolamelo, ⁷ Ndjaenya we weme lo dikambo tshee mufano wakambo wa dimena, ndo mbisha mafundisho wa lo tshina, wa kenemo, ⁸ L'oteketa wekila, waha nanya, kele otoni ayale lohokohoko, hoyala la da mbuta da koolo leso. ⁹ Sengasenga ekambi da vo ndjakitshakitsha le mwadimu wawo, la mbangenyangenya lakambo tshee, ahapendekola, ¹⁰ Aha mbuva koyango, koko menya shii tshee mbetawo, kele da mbisha doho da Zambi ombitshi waso. ¹¹ Ne da ketshi ke Zambi, kyoko ya panda le ato tshee, kekenamo. ¹² Keleko lo tofundisha da seka koolo ndo sakisaki da duniya, ndo sena lo lolonga la kakiye oko yimba, mete, ndo pepe, ¹³ Lo konga ekongelo ke dimena, ndo enyamelo ke lotombo ke Zambi kewoke ndo ombitshi waso Yeso Kristo, ¹⁴ Lakayasha nde ndame leso, kele da ndjotosomba oma lo koolo tshee, ndo da ndjatshe wodja wele wande, mbedama lande ndo opomu lo akambo wamena. ¹⁵ Mbuta ane akambo, sengasenga, ndo kaloya lokina, la lowandji tshee. aha oto konyola.