¹ Paulo, okambi wa Zambi, ndo Otomami wa Yeso Kristo lo mbetawo kasonami wa Zambi ndo la mbeya ke mete lele oko pepe, ² Nyee yele lokongelo wa loseno la pondjo, lakalakema tatee lo shii yedjedja oma le Zambi kanga la hate kashi, ³ Ndo lakenya loteketa wande lo saa kende lesambishelo kekandambisha lo mamulaka wa Zambi ombitshi waso, ⁴ Le Tito, onami hita lo mbetawo keso otoyi: ketshi ndo kii keyale oma le Zambi mbapa ndo oma le Yeso Kristo ombitshi waso! ⁵ Lakakotshike le Kreta, kele odje lonondo kene kembotshikala nongosola, ndo kele, oko wadjango wami, kitsha wazee lo ngelo la ngelo, ⁶ Naka koleko oto lahokaka, tshukana la odimoto otoyi, lele lana ambetawodi, wane wele kema loseka kana atombiki. ⁷ Ne da paka opiskopo ndjala hoke, oko kanga yoomba la Zambi; aha nde ndjala osendji, naka kele, onoshi wa wana, otomboki, kanga latama lo okosefu wadabo; ⁸ Koko ayale okitaniya, ongenyi wato wololo, kii, tshundju, okilami, osenusenu ⁹ Layasukanya lo oteketa wa mete oko wakandafishama, kele kayale lakoka wa sengasenga oko wetshelo wekila ndo da mbitshanya apingani ¹⁰ Koleko, okone, djekaleka lasa akanga wa kumbini, efula keto atomboki, eteketa wanyanya ndo wa kashi, ¹¹ Wele paka diha onyo. vo pandjolaka kumbo, la fundisha lo faïda ke soni kene kehakoke fundisha. ¹² Omotshi lasawo, Ombotshi wawo, akate: ase Kreta loshi akanga wa katshi, nyama ya lomendja, etema wehodu. ¹³ One oshuuda waleko mete. dako dele kaloyawo esadisadi, kele wayale la mbetawo kekila, ¹⁴ Ndo hawoyoyasukanya le ase ehodu wa yuda ndo elembe wato wakadimo lo mete. ¹⁵ Tshee keleko pepe le wane wele pepe; koko koyango yele pepe le wane wele mindo ndo etema kudu, yimba yawo ndo mbeya yawo djeko mindo. ¹⁶ Wakeko lo tshe kazi da mbeya Zambi, koko wakelo mbanguna oma letshaa wawo, waleko mendja, atombiki, ndo kema lakoka lo dikambo da dimena.