¹ Yeso akoto le Bethelehema lo Yuda, lo saa ke kumekanga Herode, nyende ase tomba yomalene ahoto wonya wakakomi le Yerusalema, ² Ndo wakate: lende ele kumekanga kase Yuda ambonoto? ne da takeni yoto yande lo leke la hoto wonya, ndo takaye ndjotemola. ³ Kumekanga Heride akoke osoku, akahangayika, ndo Yerusalema tshee lande. ⁴ Akahomanya epalanga tshee wa Kohani ndo Endele nombe wa wodja, ndo akayaewonya lewo lende amboto Kristo. ⁵ Wakawote: le Bethelehema ke le Yuda; ne da akandikama oma le Ombutshi: ⁶ Ndo wee, Bethelehema, kele ke Yuda, wee mete kema tshiki lo ngelo tshee ya lo Yuda, ne da omaleye owandji akotomba lenamo Izariyele, wodja wami. ⁷ Laso Herode akeye lo siri ase tomba, ndo ndjaewoya dimena lewo aya saa ngiana yele yoto djeko lo peta. ⁸ Ko akatomi le Bethelehema, ata: nyotshu, ndo nyotombela sango yamena loote wa ona dikenda; saa konyotana, kanyombewoya ndo lemi, kele kandje lemi leme ndjotemole. ⁹ Kisha mboka kumekanga, wakatshu. ndo nyende, yoto yakaweni lo leke la hoto wonya yakakendakenda letondo kewo polo lakawakomi lateyi lene atshi ona diknda, yoto yakemala. ¹⁰ Saa kekawende yoto, wakandama la fura ke woke. ¹¹ Wakoto lo loodu, wakeni ona dikenda la Madiya, nyangende, wakakolama ndo wakotemola; wakafola le mwisho weshasha wewo, ndo wakotowe loko mboko, malashi ndo epomu. ¹² Ko, wakahengwzma la nyuma kololo lodo da aha kaloya le Herode, wakakaloya lo wodja wawo lo mboka kikina. ¹³ Saa kekawatshu, nyende, ondje wOwandji akenamo loheka le Yozefu, ndo mbote: emala, osa ona dikenda ndo nyangende, lawo lEdjibito, ndo tshikala leko polo lomokotekete; ne da Herode akona ona da mbodaka. ¹⁴ Yozefu akemala, akoshi lotsho ona la nyangende, ndo wakatshu lEdjibito. ¹⁵ Watshikala leko polo lo nyoyi ke Herode, kele kekateketa Owandji oma le Ombutshi akotshami: lakele onami landja wEdjibito. ¹⁶ Laso Herode, akeni da akasengama la ase tomba, atshi la kele kefula, ndo akatomi da ndjaka ana tshee wa miaka ehende ndo walese watshi lo Bethelema ndo lo kete yande tshee, ndjelana la loshi lone lakandewoma la ase tomba. ¹⁷ Laso kekakotshama kene kekateketa Jeremiya, Ombutshi: ¹⁸ Wakoke ekoko le Rama, delo ndo lonyango: Rashele alela ana wande, ndo konanga meenda, loote vo kema lokina. ¹⁹ Saa kekavu Herode, nyende, ondjelo wOwandji akatombe Yozefu loheka, lEdjibito, ²⁰ Ndo ata: emala, osa ona dikenda ndo nyangende, ndo otshoka lo wodja wIzariyele, ne da wane wakalange loseno lona dikenda wambovo. ²¹ Yezefu akemala, akoshi ona dikenda ndo nyangende, ndo akatshu lo wodja wIzariyele ²² Koko, akoke da Arkelawu akatawala le Yuda lo fashi ke Herode, shende, akoke woma da tsho leko; ndo, akadjangemela dimena loheka, akatshu le Galileya, ²³ Ndo akatshu totshikala lo ngelo kelewo Nazareta, kele kele kekateketa Ambutshi kekotshami: akelame ose Nazareta.