¹ Lenyu ase longonyi, nyolele ndo nyotshutshumale lote wa mananu yoya lenyu. ² Longonyi lanyu lambohonda ndo ahondo wanyu wambotshilama lahaka. ³ Mboko ndo falanga yanyu yakolelo ndo engawo keyo kekoyala oshuda wa fonu yanyu ndo yakolanya demba danyu oko djaa. nyakohomba longonyi lo shii ya mwisho. ⁴ Nyende mushara wekambi wane wona lekonda wanyu ndo nyakowonyola, mbawane ndo lavi wa wane wana yakakomi le Owandji walembe. ⁵ Nyakasene lo kete la hyangakalo ndo lo wange, nyakalotsha etema wanyu loshi lekila. ⁶ Nyakange, nyakadake wane wele kokele, wane watshikonyonge. ⁷ Nyoyale okone la vumiliya nyu analengo, polo letena ka Owandji. nyende okambi wekambo kongeka polo edja kela olowa oma lo kete, nde ndjalaka la vumiliya kende edja polo kolo vula ketondo ndo lemwisho wetena. ⁸ Ndonyu lawo, nyovumiliya, nyokeketsha etema wanyu ne da etena Kowandji keya suke. ⁹ Tanyoshitanaka lasanyu nyu analengo, kele hanyoyolomboshama: nyende shushi aya lo mulango. ¹⁰ Nyoshi analengo mufano wa sowi la vumiliya Wambutshi wane wakateketa lo lokombo Lowandji. ¹¹ Nyende yambota ongenongeno le wane wasowa la vumiliya. nyakoke wata lo te wa vumiliya ke Jobo ndo nyakeni mwisho wone wakokonya Owandji, ne da Owandji olodi la ketshi ndo la ngandji. ¹² Tondo ke dikambo tshe analengo, tanyolapake lolongo kana lo kete kana kilapo kimotshi. koko mete keye keyale mete ndo kema keye keyale kema kele hanyoko lo kilombo. ¹³ Omotshi lateyi wanyu aleko lo magumi? alombake, omotshi aleko lolo? embe esambo walotombo. ¹⁴ Omotshi lateyi wanyu aleko la hemo? ateke wazee wa lo kanisa, ndo wazee wakolombe ndo mbodisa eso lo lokombo Lowandji; ¹⁵ Dolembo da lombetawo konolaka olando, ndo Owandji mboduyaka, ndo naka akasale pekato, akodimanyiya. ¹⁶ Nyotubu pekato yanyu amotshi lakina ndo nyolombaneke amotshi lakina, kele kanyokalanganake. dombelo da kudu dakanga losembwe daleko dihombo. ¹⁷ Eliya atshi oto la lo duniya otoyi laso, akalombe la lohetete da aha vula ndoo ko akasalema miaka esato la wedi esamalo vula halo. ¹⁸ Ko akalombe mala kehende ko vula kekaholo ndo kete kekatondja elowa. ¹⁹ Analengo, naka omotshi lateyi wanyu amboyatshika etale la mete ndo okina mbokaloya lo mboka, ²⁰ Eye da kanga lakaloya kanga pekato lo mboka kekandashisho mbitshaka anima woto omalo nyoyi ndo mbufeka efula ke pekato.