1 Ta mbile ee basambisi, imbaka la semba ta boki. Botolome amoi a boki bo Yuda akaaka, ye la boali inde la bana binde batolome baele loka lo'ongala ta boki bo Mowaba. 2 Lina li botolome amo mbo Ɛlimeleke, lina liya boali inde Naomi, la bana binde baele batolome batomoko mbo Mahelone la Kiliyona; bo bambaka Baefelata ofowa ta Beteleme ee Yuda. Bakakoma ta boki bo Mowaba, la bakangala elo. 3 Ɛlimeleke, bolome aya Naomi, akangba, akatikala kola bana binde baele batolome. 4 Bakasonga bataali ba Mowaba, ndjo amoi atomoko mbo Olepa, la ono moi lina linde Luta, bangalaka elo tina la miaka liou. 5 Mahelone la Kiliyona bakangba aleko bo abaele, la Naomi akatikala ndoena bana batolome binde baele la ndoena bolome. 6 Akaemala, ye la baali ba bana binde, loka lo'obinowa ta boki bo Mowaba, loka akafooka mbo Mungu aokendela baito binde la aosila ofa bo bieka biola. 7 Kola ongoma akatomowa ta eseke lombaka ye, la baali ba bana binde, bakaka ta ndole oebinowa ta boki bo Yuda. 8 Naomi akabeka la baali ba bana binde baele ani: Kaakai, binowakai buto la buto ta mbele eya inango inde! Tikakai mbo Mungu akele'nu boolo ani ekeleke'nu ambe bangbei la aleko lange! 9 Mungu asungeke'nu loka oshei lipemi buto la buto ta mbele eya bolome inde! La mbisa akaloma bo ta bakeka. Bakaila limiki la bakalela likama; 10 bakabeka linde mbo: Tinga ongoma, totoka lao ta baito bao. 11 Naomi, akabeka ani: BInowakai, bana bange! Loka loingi olangii oka lange? Bana botolome bakombe ale ta solo ange loka bambe balome bino? 12 Binowakai, bana bange! Kaakai, loka loomba botoolo loka losongolomo lisiya, loiyengani ale omba la batolome eseke lomoi. Yomba mbo lombe ko la lilendelu; imbe ende mbo lokaomba la bolome le lotiyo la ɛi kobota bana batolome baele, 13 otoumbakelai kembo bakonde, ofekai losongolomo? Tinga alo, bana bange! Lombe la ngandi likama loka lino loka mbo boo boya Mungu bofoemaelei bobe. 14 La bakaila limiki, la bakalela lisiya. Olepe akaloma boilana inde likeka, ndjo Luta akaundamana linde. 15 Naomi akabeka la Luta ani: Tene ngoto ao aobinowa ta baito binde la bamungu binde; binowaka kee ngoto ao. 16 Luta akabinoisa mbo: Oibekelekei mbo lotiko'we, lokambo loitotikowe! Ɛlo etokowe, ɛi aleko lotoka, eseke otongala, ei aleko lotongala; baito bao batomba baito bange, la Mungu ao atomba Mungu ange; 17 eseke otongba, ɛi aleko lotongba onga la lotoseliomo aleko onga. Mungu akelekei ongoma, la yeimbaka la leka losiya lotoseanisei lao sakolo ko lingba. 18 Ɛkaenaka ye mbo aota betema loka looka linde, aikabekana ale linde. 19 Bo abaele bakaaka kani ekomaka bo ta Beteleme. La ekakoma bo ta Beteleme, boki bototina bakaokela bo ngandi, la bataali bakabeka mbo: Naomi amboko ono? 20 Akabeka libo mbo: Oitekeni mbo Naomi; tekeni ndjo Mala, loka mbo ono ambe la bofoka bototina aokelekei mbeko ii likase. 21 Lokaaka lokende ani lombe la ibule, ndjo Mungu aobinoisei la bao bule. Loka loingi ototeni Naomi, ani Mungu akaokelei bobe la ono ambe la bofoka aofei bomusi? 22 Kola ongoma Naomi akalila, ofowa ta boki bo Mowaba, Naomi boilana inde, la Luta buto a Mowaba. Bakakoma ta Beteleme ta liako li eula liotena bofonga.