¹ Ikabeisomo la Sanebaleta la Tobiya la Geseme, Moalaba, la baiyani basiya biso mbo loosila ɔshwa likula la mbo oto lifwa liɛitikali elo munga, ta mbile amo ani loitaka emalisa beliyo katikati ii beinda, ² Sanebaleta bo la Geseme bakatomelei baoi ani: Yo'oko toto'amane ta boki bomoi ta wenda bo ono. Ndjo bambaka la baenyeli babe loka lange. ³ Lokatomela bo batomomu obeka libo mbo: Lotokela likuwa lifi la loimbo tika; likuwa liemaeli ɛi tolɛ́ eingi lotike loka looya elo embe'nu? ⁴ Batomelekei ta bofono wamo mala inati ndjo lobinoiselaka bo ta bomuna we. ⁵ Kola ongoma Sanebalata akatoma bokowa winde ambei mala ɛɛ liondo la lokasa fololo ta boo winde; ⁶ isonomoko elo munga mbo: Iyobeisomo ta befindi la Gasemu atoimila yo mbo enu aleko la Bayuda olangii otombokai; kola ongoma owe otoshwa likula; la mbo otomba kee bokota ambe bo ta baoi bee. ⁷ Osila oota aleko betondoli mbo batondole ta Yelusaleme loka lao angene mbo: Bokota ambe ta Yuda. Ko-kaniakani itobeisomo la bikota otutana la be baoi. Kanikani, yooko toote ikumbe. ⁸ Lokatomela ye ani mbo: Mbeko yeikelomu ani etobekowe; ndjo owe otoenyekela ango yo ta botema wao angene; ⁹ loka mbo bo batotina bakalinga baungise'su, bo mbo: Baoo bibo batolewa-lewa ta likuwa mbo liekelomoko. Ndjo kanikani, ɛ Mungu, angemisaka baoo bange. ¹⁰ Lokaaka ta mbele eya Semaya, wana a Delaya, wana a Metabele ono akandomoko. Akabeka mbo totoamane ta mbele-Mungu katikati ii tepelo, tolike aleko beinda be tepelo loka batoya oyaite'su; ɛɛ batoya katikati ee lotiyo oyaite'su. ¹¹ Ndjo lokabeka mbo: Buto kani embei atoka ende mangu? Oni buto atoota ta tepelo loka lo'ouwisa liwawi linde? Loito'ota. ¹² Lokaluwa la lokalembela mbo Mungu aitomi ye, ndjo atondole ango lobeko lɛ loka lo'oemaelei; Tobiya la Sanabalata baosila osomba ye. ¹³ Asombomoko ta litina mbo lobange la lokele kee ono la mbo lokele bobe; kola ongoma bokomba la fofe ofei lina libe loka baoshishei soni. ¹⁴ Ɛ mungu ange. enyelaka Tobiya la Sanebalata otutana la bakuwa bibo batotina la botondoli wibo botaali akumo Noadia la betondoli besiya beke baingolinga ofei bowa. ¹⁵ kola ongoma likula lisilaka ta lisiyo li tuku liondo ta tengai ee Ɛlulu, likuwa ta basiyo tuku liondo la yele. ¹⁶ Ɛkaokaka baiyani biso le lobeko, baito ba befindi besiya beke balingileke'su ba bangaka la bakasuluwa ta baiso bibo loka balembelaka kembo likuwa lieke likelomoko la Mungu iso. ¹⁷ Ta basiyo bamo la baito ba lokuku ba Bayuda bakatoma kasa likama ambe Tobiya la kasa iya Tobiya ikomelaka aleko bo. ¹⁸ loka baito likama ta Yuda baimanaka linde, akamba wana ab libala liya Sekania, wana a Alaha, la wana inde Yohanana aisili oosa wana botaali a Mesulana, wana a Belekia, kee boali inde. ¹⁹ Babekaka aleko loka lo bakuwa binde balo felo yange la bakabeisa ye baoi bange. Tobiya akatoma kasa loka lo'obangisei.