¹ Iyeli ifi ta baito la baali bibo ikatomowa loka lo banduku bibo Bayuda. ² Bamoi bakabeka mbo: Ɛsu la bana biso batolome la bana biso bataali tombe likama; totolinga bakoke loka tolɛ́ la mbo touwe. ³ Basiya bakabeka mbo: Tookesa bilanga biso la miwiti biso la mbele iso botuku; tolinge bakoke loka lo semba. ⁴ Bɛɛ amoi bakabeka mbo: Tookopisho bieto loka lo pako ɛɛ bokota ke botuku loka lo bilanga biso la miwiti iso. ⁵ Ndjo bindo biso bimbe kee bindo bi banduku biso, bana biso bambe kee bana bibo; tene, tofootisa bana biso batolome la bana biso bataali ta bekowa, bana biso basiya bataali baosila ootisomo; toiti ale la bofoka, loka baito basiya baosila oosa bilanga biso la miwiti iso. ⁶ Lokambaka la lisomi likamaoko ekaokekei bileli bibo la baoi bɛ. ⁷ Lokalinga boimo ta botema wange angene la lokamamila baito ba lokuku, la batoolo, loka beka libo mbo: Ɛnu otɔɔsai baano, buto la buto ambe nduku inde! Lokasondjamasi linginda lifi loka lo'oemaela bɔ, ⁸ lokabeka libo ani: Yeke otowai yeiti bolo, lokabeka libo lisiya ani: Aniekakeleesu, toosila oendola banduku biso Bayuda beke baungisomu ta baito ba befindi; la enu otoungisai banduku bino mbo batchambitchomo? Bakangala hai, baikamutola. ⁹ Lokabeka libo mbo: Lobeko lotobeke'nu, loiti lɔlɔ. Ɛnu oiyenganii okenda la ilitisa ambe Munguiso. loka toimolomoko ta befindi besiya biɛke bembe baiyani biso? ¹⁰ ɛi la banduku bange la bekowa biange, lokakopisha bo bakute la bakoke loka lo baano. Lo'olengila lino mbo totikeke lɛ lobeko lo baano! ¹¹ Lo'olengila lino mbo ko la liɛ lisiyo, binoiselakai bo bilanga bibo, la miwiti ibo, tosandu tchwibo to Bilaya, la mbele ibo, la baina beke okpolakai bo. ¹² Bakabeka mbo: Totobinoisela bo, latoimbo linga ale leka ango lomoi ambe bo, totokela ani ekabekowe. Lɔkata ba Kanga la lokalapisa bo mbo bakele otutana la baoi bamo. ¹³ Loka fufola tulu ange la lokabeka mbo: Tikaka Mungu afufole aleko kanda emoi buto la buto ono aitokuka liɛ lioi, ta mbele inde, ta likuwa linde, atofufolomo, atoutomo sɛ̀! Baito batotina ba Ɛaondjamelo bakabeka mbo: Imbe, Ongoma! Mungu akasimolomo, baito bakawa otutana la lioi liamo. ¹⁴ Ko'akola ta lisiyo liɛke litomoko lange kɛɛ ngene a boki bo Yuda, ko'akola ta mwaka bo tuku yele tɛɛ kota mwaka tuku isaso la yele eya bokota Aletahesasete, ta miaka liou la yele, ɛi, lamba banduku bange, toikala bieka biya bokota. ¹⁵ Bakatela baito bolito la bakaosa ambe bo boila la vinyo la bakute tuku inati aleko. Imbe ende bekowa bibo bembaka kɛɛ bekota ambe bo. Ndjo ɛi loikakela ongoma loka lo-olitisa Mungu. ¹⁶ Lokambaka la bofilili ta likuwa li likula; toikaosombaka nyele. Bakuwi batotina bakasondjamanaka loka lo'lokoto likuwa. ¹⁷ La baito miya la tuku liondo ta Bayuda la batoolo bambaka ta mesa ange, eseke lomoi ta beke bayeleke'su tina-tina la befindi biɛke bimbe tina-tina liso. ¹⁸ Yeke. ikomanyomoko loka lo lisiyɔ limoi imbaka ngombe emoi la bekoko bɛlɔ liambe; la noli ikomyolomokoi aleko la mboso ii vinyo likama mbisa ii basiya liou la liou. Imbe ende ongoma, loikalengila boila loka bokowa bombaka la bolito likolo li baito bɛ. ¹⁹ Ɛɛ, Mungu ange, enyelaka we bɔlɔ bototina we lokelaka ta baito bɛ.