¹ Akaena linginda, akalila ta longo; la, felo angale'se, baeki binde bakashusha ambe ye. ² La akalila bonoko, akekisa bo, la mbo: ³ Bolo ambe tobube ta liwawi, loka mbo bokota boliko bombe wibo! ⁴ Bolo ambe bakelewa, loka mbo bambo lendisomoko! ⁵ Bolo ambe bee ba bemusi, lokambo bambo oshaka botiko bo nyele! ⁶ Bolo ambe bee bambe la semba la lema lo liengani, loka mbo bambombaka la ishibi! ⁷ Bolo ambe bee batolela loka lo lo'oanyo ambe Mungu, loka mbo balaosha bolo boya Mungu wamo! ⁸ Bolo ambe bee bambe la botema botanisomu, loka mbo bamboenaka Mungu! ⁹ Bolo ambe bee basami lilatemi, loka mbo bambotomoko bana baya Mungu! ¹⁰ Bolo ambe bee baemali ta liengani, loka mbo bokota boya Mungu bombe wibo! ¹¹ Bolo bombe lino, loka mbo bakaobekilenu babekelomu babe lino ta befono bebe, loka lange. ¹² Omalakai la mbakai ta loimilo bomusi wamo, lokambo lolipomo lino lotomba lofi ta bose; loka eke ndjo tokaena batondoli bee amba felo ino. ¹³ Ombei bekpa be nyele. La bokpa boiti ale la bokale winde, langi ase ndjo bolaokanaka? Boimbomba leka ango mbo bokuso la lousa, la linginda ta bakolo binde la baito. ¹⁴ Ombe lieneni li wenda. Boki we boshomu ta longo baoimboisamaka; ¹⁵ la baimbo baanisa tala loka bate amo ta botelo mbao, kumbi batota ta bitelo bii faka, la mbele likulu amo komba la liangangi linde. ¹⁶ Tikaka mbo liangangi liao limbe felo ii baito, loka mbo baene bakuwa bao balo, la lokambo basimole Ise ao ono ambe ta buse. ¹⁷ Oiyenyelakai mbo loye loka loseise ekela ao batondoli; loye ndjo tinga mbo loseiso, kanga ndjo loka lienganisomu. ¹⁸ Loka mbo lotobekile'nu ta wewe, ani bose la nyele yeimboetaka ango lisiyo, yeimboseselisaka ekela la mala emoi ao mala emoi ee ilenga ii lokasa, kota mbo itotina ikomomo. ¹⁹ Onoko ambo foyaka imoi ta tchwe toshosha tokikelike, la akafoekisa ta baito mbo bawe koongoma, bambotomo yana ikikelike ta bokota boya buse; ndjo ono atokuwa tcho, la yekoekisa baito lio likuweli, oko ambotomoko buto bofi ta bokota bo buse. ²⁰ Loka, lotobekalino, yomba mbo liengani liao lieitoeta lieye li basoni la lieye li Bafalusai, oimbo'ota ta bokota bo buse. ²¹ O'okei yeke ikabekilomoko ambe bato'olo: Oimbo ita; ono amboitaka aengani loanyo etumbo ta basambisomu. ²² Ndjo ei, lo'obekile'nu mbo oni ono atomba la lisomi ambe nduku inde aengani loanyo etumbo ta basambisomu; ndjo ono atobeka ambe nduku inde: .......................; la ono atombo bekaka: ............... aengani omba la etumbo ta imbé ii gehena. ²³ Yomba mbo ofoesa makabo bao ta etumbelo, la oko oiyenyelisaka mbo nduku ao ambe la leka lomoi lo liyani lao, ²⁴ tikaka elo makabo bao felo ii etumbelo, la kaaka koni okaokana la nduku ao; ndjo, yoko oyaenisa liano liao. ²⁵ Oshanakai la enu la boiyani lao, ta mbile ene ombe ta ndole enu linde, lobango loikesokowe ambe basambisi, la basambisi baikesokowe ambe bekota be leta, la oitomoko ta mbele ee likandjomu. ²⁶ Lotobeka lao ta wewe, oimbo foyomo elo ka'ani oitakalipa bakute basiya. ²⁷ O'okei yeke ikabekomoko: Oimbowaka bosombo. ²⁸ Ndjo ei, lo'obeka lino mbo ono atomoila batali loka lo lomelelo ye soi aowa oko bosombo linde ta botema winde. ²⁹ Yomba mbo liso liao lilome limbe loka lao mbo lokesowe ta bobe, foyaka lioyo la kusaka lioyo esika lao; loka ikafoanyamana lao mbo imoi ta betuku biao bo'ofya, la tikaka mbo bindo biao bitotina bieyi kusomoko ta gehena. ³⁰ La yomba mbo boo bolome wao bmbombe loka lao nole ee liseisomu, tenaka wo la kusaka wo esika lao; loka imbe bolo lao mbo butuku bomoi ta betuku bokaofya, la mbo bindo bitotina biei kaka ta gehena. ³¹ Ikabekomoko: Ono ato fafanisa boali inde lokuku lobe afeke ye lokasa lo liseani. ³² Ndjo ei, lotobeka lino ani kembo ono ato fafanisa boali inde la mboli ibe, sakolo ko loka litina libe, aomba aoya bosombo, la ono atosonga botaali akaotomo mbo aowa bosombo. ³³ O'okei lisiya yeke ikabekomoko ambe batoolo: Oimbo lapaka ango, ndjo ombo owaka ambe Mung ta yeke okalengila ta oimilo. ³⁴ Ndjo ei, lo'obekele'nu mbo ndolapakai kobule-bule, ango loka lo lobola, lokambo imbe keka eya Mungu; ³⁵ ango loka lo nyele, lokambo imbe bikendelo binde; ango loka lo Yelusaleme, loka mbo imbe boki boya bokota bofi. ³⁶ Oilapaka ango ta litina li botchwe, lokambo oimbombaka bofufu ao boilo ta sowe koimoi. ³⁷ Tikaka mbo baoi bao bambe lamba ongoma, ongoma, oto, oto; yeke batotaliyela iyeka ta baluwi. ³⁸ Oluwei yeke ikabekilomoko: Liso loka lo liso, la linda loka lo lino. ³⁹ Ndjo ei, lobekile'nu ndoemaelai bee ba tale. Yomba mbo amoi afoumowe ta likeka lilome, enisaka aleko ye lieye limoi. ⁴⁰ Yomba mbo amoi ambe la yeme iomba bobekeli bobe wao, la osaka tulu ao, tikelaka ye bakeka bao lisiya. ⁴¹ Yomba mbo amoi afoamo la bofoka mbo awo'we mia emoi, waka ta yele linde aleko. ⁴² Faka la ono atolengilowe, la oifekilaka la ono alangi okipisha ambowe ⁴³ O'okei yeke ikabekomoko: Otosama wina lao, la otoiyana la boiyani wao. ⁴⁴ Ndjo ei, lo'obeka lino: Samakai baiyani bino, outchelakai bee batofeka outchele'nu, wakai bolo ta bee batoiyana lino, la sembolakai loka lo bee bakaweke'nu bobe la bee bakabikileke'nu bobe, ⁴⁵ loka mbo ombei bana baya Ise ino ono ambe ta buse; loka mbo atoemalisaka lowa ta bee ba balee la ambe bee ba bo'ongu, la itotuka ndjaluke'se ta bee ba liengani la ambe bee baiti la liengani. ⁴⁶ Yomba mbo okaosamai bee basamiki enu, lini lilipomu liengani lino? Linginda aleko bayawa ongoma? ⁴⁷ La okasalimiya ango ba nduku bao, ingi ase okawa ye imbe ilo-ilo? Bapakano aleko bayawa ko'ongoma? ⁴⁸ Mbakai ango baito balo, kee Ise ino ono ambe ta lobola ambe bolo.