¹ La Yesu akatolomo la Bolimo ta liombele, loka mbo apimomo la satana. ² Mbisa iyokila bieka basio tuku-inati lowa la lotiyo, la akaoka semba. ³ Bopimi akaya tina linde, la akabeka: Yomba kembo ombe Wanaaya Mungu, esaka ishosha ta bee batale bakindowe bekati. ⁴ Yesu akamutoelae isonomu mbo: Buto aiyengani ouwa loka lo bokati, alakini la lio litotomoa ta bonoko boya Mungu. ⁵ Satana akatae ta boki bofi botanu, la akatae likolo li mbele mungu, la akabeka linde: ⁶ Imba mbo ombe Wana aya Mungu, kusamanaka ta nyele; La isonomu mbo: La atoesa ishosha ta ta bakeitomo baundowe la batotolowe ta bao bibo, la litina mbo likolo liao liei umanaka ta litale. ⁷ Yesu akamutoelae la akabeka: Isonomu: Aleko mbo: Yeiyengani mbo opima Ngene, Mungu ao. ⁸ Satana akailae lisiya ta longo likolo fafo, la akaenisae bekota betotina bi wenda la befoka bibo, ⁹ la akabeka linde: lotofoo mbeko ye itotina, imba mbo ototuliamelei'see la oto sombolei. ¹⁰ Yesu akabeka linde fowaka oko, Satana! Isonomu mbo: Oengani osombola Ngene, Mungu ao, la otokuelae engene. ¹¹ Kola ongoma, Satana akatikae. La bakitomo bakaya tina la Yesu, la bakakuelae. ¹² Yesu, akaoka mbo Yoani aokandomo, akaaka ta boki bo- Galilai. ¹³ Akatika Nasalete, la akangala ta Kapalanaumo, tina tina la libande lifi, ta boki boya zelubuna la Nefatali. ¹⁴ Loka loenganisa yeke ibekomoko ta ndole eya Bonangoli, Isaya: ¹⁵ Baito ba zelubuna la Nefatali tina tina la libande lifi ta boki oeta Yuludani, la Galilai la Beennda, ¹⁶ Baito be bangali ta lilima, bafoena liangange lifi, la bakambaka ta eseke le- lombe lingba liangange lifoemala. ¹⁷ Kota mbile amo Yesu aka'akola onangola, akabeka: Kikowakai, loka mbo Bokota bo likolo bo'omba tina. ¹⁸ Ekakendakae ta ngonge ee libande lifi li Galilai, akaena baito baele, Simona, ono batotae Petelo, la Andeleya, nduku inde, batokusa wengo ta libande lifi; Loka mbo bambaka baluwi. ¹⁹ Akabeka libo: Tutekeni, lotoselenu baluwi ba baito. ²⁰ Kota mbole amo, baka tika biongo bibo bakatutae. ²¹ Eka'akae esika libo, akaena baito basiya baele, Yakobo, wana aya Yebedai, la Yoani, nduku inde, bakambaka ta wato la Yebedai, ise ibo, batokomanya biengo bibo. ²² Akata bo lioi, bakatika wato la ise ibo, la mbisa bakatutae. ²³ Yesu akakenda ta Galilai, la aka'ekisa ta mbele imungu, laa onangola mboli itanu i bokota, la louwiso biale betotina la balewi batotina ta baito. ²⁴ Lokuku linde loka luamana ta Sulia etotina, la bakayelae la baito ba biale la bemusi ndike la ndike, belimo beebe, la seka, la bitukulu; La akauwisa bo. ²⁵ Linginda lifi likatutae, ta Galilai, la Dekapole, la Yelusaleme, la Yundeya, la tafangi ee Yaladene.