¹ Mbisa ii lisiyo li Yenga ta liako li felo ta posho, Maliya a Mangandala la Maliya onomoi bakaka okamoila losaii. ² Tene, ikambaka la lotuko lo nyele; loka bokitomo bomoi boya Mungu bokasuluwaka ofowa ta lobola, akakikoisa litale, la akangaela likolo. ³ Bofo'ono winde bokambaka kee ikali'kali, la tulu inde ɛfufu kee litumba. ⁴ Bakuki bakabilima la libangi, la bakamba kee beliyo. ⁵ Bokitomo bokaosa baoi, la akabeka la bataali: Loka lino, oibangakai; loka loluwi mbo otolukai Yesu ono akangbaka ta lieka. ⁶ Aiti ale ɛkɛ; aosila ofufuka, ani abekaka ye. Yokoi, enakai eseke leke lokambaka ye, ⁷ la ka'akai okabeisa baeki binde mbo aofufuka katikti ii bangbei. La tene, aoka felo ino ta Galilaya: Ɛlo ndjo otoenai ye. Tene lobeise'nu. ⁸ Bakaka esika la losai, la libangi la likama li liomali, la bakaka mangu okabeisa la baeki. ⁹ Tene, Yesu akaka ta litowani libo, la akabeka: Lo'ofenu kalibo. Bakasusama loka lo'ounda ye bakolo binde, la bakauma baluwi se felo inde. ¹⁰ Ngoko Yesu akabeka libo: oibangakai; kabeisekei bofindi wange bake ta Galilaya: Ɛlo ndjo etoena bo ɛɛi. ¹¹ Mbile ekambaka bo ta ndole, baito bamoi ta bakuki bakaota ta boki bofi, la bakasemowa ta bangbatele ndjaso itotina yeke ikambaka. ¹² Yeke, mbisa iotowana la bekumi la lo'osho beimo, bakafa basilikani likama li bieto, ¹³ bakabeka: Bekakai; baeki binde bakayaka lotiyo oyaiba ye, mbisa ekambeke'su ta tɔlɔ. ¹⁴ La bokota bofi bo wenda akaoluwa, totolombokola ye, la totfoyenu ta lobeko. ¹⁵ Basilikani bakaosa bieto, la bakatuta liekisomu lifomoko bo. La iyeli yamo ikamelana katikati ii Bayufa, kota la boni. ¹⁶ Baeki liou la amoi bakaka ta Galilaya, ta longo leke lokaluisaka Yesu bo. ¹⁷ Mbile ekaenaka ye bo ye, bakauma baluwi se felo inde. Bamoi bakamba la fiɛɛ. ¹⁸ Yesu, akasusama, akabeka libo ani: Bofoko bototina bo'ofomo lange likolo la nyele. ¹⁹ Kakai, komisakai baeki ta wenda bototina, lufiakai bo ta lina liya Afa, la Wana, la Bolimo Botanu, ²⁰ Ekisakai bo bakotche itotina yeke ikaoekisomo ɛnu. Tene, lombe lino basiyo batotina, kota losilo lo wenda.