¹ Tambile ekaya nongo,bekota betotina bekangala bekumi be baito bakawa ikumbe loka Yesu,loka baite'ye. ² Mbisa iyokandaye,bakaka linde,la bakafaye ambe Pilato bokota bofi. ³ Ndjo,Yudasi,ono aungisakaye,akaena mbo aokela bobe,akakikola botema,akabinoisa bieto tuku isaso ibingbendele ambe bekota befi la bekumi beboki, ⁴ Yembo:lowa bobe,loka lowana ngeloye yeiti la lobeko.Bakabinoiselaye mbo: yamo imbe ingi loka liso?imoili owe angene. ⁵ Yudasi akakusa bingbendele aiteni e Tepelo,akafowa onga,la akaka okakanda boliki tangingo akakakema likolo lisandu. ⁶ Bekota befi bakaosa bieto,bakabeka mbo: yei'yengani kembo toteyo aiteni eitchunga ilifaefi,loka imbe imbe bieto ingelo. ⁷ Bakaokamana labakasomba yola'elanga lo bokeli bo bibengu loka loselia beenda elo. ⁸ Ndjo,kota'aboni elanga lamo lokatomo mbo: " elanga longelo." ⁹ Ndjo lobeko lobotondoli Yilimiya atondolaka likaenganisomo mbo,bakaosa bieto tuku isaso iibingbendele,litina lia onokali kotomo litina libana ba Isalaele, ¹⁰ Labakafayo ta elanga lo bokeli bobibengu,ani ebeisaka ngene obeisei. ¹¹ Yesu akaemala felo ii Ngene a Wenda,la Ngene a Wenda akaiyolaye mbo: ombe Bokota bo Bayuda? Yesu akabinoiselaye mbo:osila obeka. ¹² Oko esitomokoye ambe Bokota befi la bakumi ba boki,aika mutolelabo ango lioi. ¹³ Ndjo Pilato akabeka linde mbo: oitooka mbeko likama yeke bakasitaka lao? ¹⁴ LaYesu aikabinoiselaye lioi ango lomoi,lamba ta lobeko ango lomoi,kolaongoma,Ngene awenda akamwala fafo. ¹⁵ Tambile eliyeti,Ngene awenda ambaka atofa la Linginda libaito bokandomu amoi ani embaka asili ibo. ¹⁶ Bambaka la bokandomu amoi ono aluwanaka likama ono atomoko mbo Balaba. ¹⁷ Mbile embaka bo eseke lomoi, Pilato akabeka libo mbo: Olangi mbo lofenu ndai, Balaba, lamba Yesu ono akatomo Kilisito? ¹⁸ Loka aluwaka mbo baungise ango ye loka loka lo liiya. ¹⁹ Ta mbile engalaka ye se ta kiti inde eosambisa, boali inde akatomela ye lioi mbo, oikelaka lobeko lo buto amo la liyengani loka loene bomusi laboni likama ta saki loka linde. ²⁰ Bekota befi la bakumi ba baito bakaimilisa linginda mbo balengile Balaba loka mbo baite Yesu. ²¹ Ngene a wenda akabeka libo lisiya mbo: Ndai ta beke baele olangii mbo lofenu? Bakabeka mbo: Balaba! ²² Pilato akabeka libo mbo: Lokele ingi loka loya Yesu ono akatomo mbo Kilisito? Batotina bakabeka mbo: Aitomoko ta lieka! ²³ Pilato akabeka libo mbo boni bobe bokawa ye? Ndjo bakamama likama mbo aitomoko ango ta lieka! ²⁴ E'enaka Pilato mbo aikalonga bo, la libuya lifoakola oya, akaosa baye, akasoola bao felo ii linginda li baito likama, ye mbo: Ei loiti la lobeko likolo lingelo ii buto ono. Imoileli enu angene. ²⁵ La baito batotina bakabinoisa mbo: Tikaka ngelo inde imbe likolo liso la bana biso! ²⁶ Ndjo Pilato akatomoisela bo Balaba la akauma Yesu fimbo, la akakesa ye mbo aitomo ta lieka. ²⁷ Basilikani baya bokota bo wenda bakaya la Yesu aiteni ii likulali basilikani la bakasela linginda lifi li basilikani se felo inde. ²⁸ Bakafoya ye tulu la bakaufa ye la tulu enenu. ²⁹ Bakakela ngundu ee biengenge bakata bio likolo li bochwe winde la bokombe bomoi ta boo winde bolome, bakasuluwa la baluwi se felo inde, loka lo'osetcha ye mbo: Kalibo Bokota bo Bayuda! ³⁰ Bakatchwela ye soii, bakaosa bokombe la bakauma ye ta botchwe. ³¹ Mbisa iyosetcha ye, bakabatisa ye tulu inde la bakaka okatika ye ta lieka. ³² Ekatomowaka bo, bakatoamana la botolome amoi buto a Kulene, la lina mbo Simona, bakatolisa ye la bofoka lieka liya Yesu. ³³ Ekomaka bo ta eseke lokatomo mbo Gologota, ilangi obeka mbo Eseke lo Touwa, ³⁴ bakafa ye vinyo imbe la likase, aikalanga omwa. ³⁵ Mbisa iyotaliya ye ta lieka, bakaana tulu inde la lokuso bikende bii tosandu tan nyele, loka loenganisa yeke inangolomoko la botondoli mbo: Baka'anana tulu yange, la bakatchakola kandjo ange. ³⁶ Kola ongoma bakangala se la bakamoila ye. ³⁷ Bakata lisitokomu likolo li botchwe winde yeke isonomoko mbo: Ono ambe Yesu, Bokota bo Bayuda. ³⁸ Akaitomo la biba bieele, amoi ta boo bolome onomoi ta boo boali. ³⁹ Baeti la ndole bakamola ye, la bakabilimisa botchwe, ⁴⁰ batobeka mbo: Owe ono otobuna tepelo, la otoshwa amo ta basiyo basaso, uwisaka owe angene! Yomba mbo ombe Wana aya Mungu, suluwaka ta lieka. ⁴¹ Bekota befi be kanga la basoni ba bikela la bekumi, bakasetcha aleko ye, la bakabeka: ⁴² Afouwisa basiya, la aiyengani ouwisa engene! Yomba mbo ambe Bokota bo Isalaele, asuluweke ta lieka, la totoimila ye. ⁴³ Atomoilela Mungu; Mungu auwiseke ye kanikani yomba mbo asami ye. Loka abeke mbo: Lombe Wana aya Mungu. ⁴⁴ La biba beke batomoko linde eseke lomoi, bakamola aleko ye. ⁴⁵ Ta mbile ee liambe, lilima likaufa likolo la wenda bototina. ⁴⁶ La ta mbile ee libwa, Yesu akamama la limiki li likama: Eli, Eli, lama sabakatani? Ilangi obeka mbo: Mungu ange, Mungu ange, loka loingi otikei? ⁴⁷ Basiya beke bambaka onga bakaoka ye, bakabeka mbo: Atota Eliya. ⁴⁸ Mangu mangu, amoi ibo akaka mangu, akaosa linuka, akawalisa la baye bangai, akata likolo li bokombe, akafa ye mbo amwe. ⁴⁹ Basiya bakabeka mbo: Toene koni lamba Eliya atoya oyauwisa ye. ⁵⁰ Yesu akamama lisiya la limiki lifi, la akatika lofeumo. ⁵¹ La tene, tulu ee tepelo ekafaama la bikende bieele ko'se ko' likolo, wenda bokabilima, batale bekafakama, ⁵² mbila ikalikolomo, bindo likama bi batanu beke bangbaka bakafufuka. ⁵³ Efowaka bo ta mbila, mbisa ii lifufukomu liya Yesu, bakaota ta boki botanu la bakaenena la likama li baito. ⁵⁴ Bokota bo basola miya emoi la beke bambaka linde loka lomoila Yesu, akaena lobilimo lo wenda, la ye ikomaka, bakamba la bowa, la bakabeka mbo: Wewe, Buto ono ambe Wana aya Mungu. ⁵⁵ Imbaka onga la bataali likama batomoila la esika; bakendaka la Yesu kota Galilaya, loka lokuwela ye. ⁵⁶ Aiteni ibo imbaka Maliya a Magadala, Maliya, inango aya Yakobo, la Yosefu, la inango a bana baya Sebedai. ⁵⁷ Ta mbile ekaya nongo, botolome amoi buto a lifoka bo boki boko Alimatayo, akumo Yosefu, ono ambaka aleko boeki boya Yesu. ⁵⁸ Akaaka ambe Pilato,loka lolengila bindo biya Yesu. Pilato akaesa ishosha mbo bafe linde ye. ⁵⁹ Yosefu akaosa bindo, akalingila ye la tulu efufu, ⁶⁰ akata mbila iyai, yeke iufomoko la litale. La akatchindja litale lifi ta bootelo bo mbila, la akaaka. ⁶¹ Maliya a Magadala la Maliya onomoi bambaka onga, bangalise tina tina la mbila. ⁶² Ta lisiyo li mbisa, mbisa ii lisiyo li likomi, bekota befi la Bafalisai bakaka eseke lomoi ambe Pilato, ⁶³ bakabeka mbo: Ngene, totoenyela ani ebekaka ono buto a lolanga, oko embaka ye la liwawi, atobeka mbo: Lombofufukaka mbisa ii basiyo basaso. ⁶⁴ Tikaka mbo mbila imoilomo la weli, loka baeki binde baiyaka oyaibaye lotiyo, loka babeke la baito mbo aofufuka ta bangbei: Kola ongoma, lolanga lo mbisa lotoeta leke lo felo. ⁶⁵ Pilata akabeka libo mbo: Ombei la bomoili, kakai, moilakai ani elangi enu. ⁶⁶ Bakaka, la bakamoila la weli mbila, mbisa iyoufa litale.