¹ Ani Yesu akaka, otomowa ta tepelo, baeki binde bakasusama loka akele ndembe ii lishomu. ² Akabeka libo: Oto'enai yo itotina? Lotobeka lino wewe, yeimbotikala eke litale likolo li litale yeimbokikoisomo. ³ Angalaka se ta Longo lo Oliviye. La baeki bakaena ye atokela ofelisa baito: Bekaka liso, yamo itokomele'su ta eni mbile, la itomba la eni ndembe embo'enisomoko ta losilo lo wenda? ⁴ Yesu akasanalo bo: Chungakai kembo butgibungiseke'nu. ⁵ Loka baito babule batoya mbisa ii lina liange, obeka: Ei ndjo Kilisito. La batoseisa baito babule. ⁶ Oto'okai bo obeka mbo bitumba la iyeli ii bitumba: Kukamanakai loka oiyeyanakai, loka mbo ndjaso yamo ikome. Loka mbo yeimbo mba koni la liko. ⁷ Boki bomoi botoemaela boki bosiya, la bokota bomoi botoemaela bokota bosiya, la itomba la eseke lomoi ani, lotukiso lotomba la semba ta nyele. ⁸ Itotina ye itomba liakolo lo bemusi. ⁹ Kola ongoma batotike'nu ta bemusi, la batotike'nu ongbei; la oiyamanei la beki betotina, loka lo lina liange. ¹⁰ La ongoma baito likama batosondjamana, la batositokowe, batoiyana lao bamoi ta basiya. ¹¹ Banangoli likama babe batoemala, la batoseisa baito likama. ¹² La, lokambo lotchwano lotomba, ilitisa ii botuku bo likama botomba la bofiyo. ¹³ La ono atomba la bofilili kota liko atouwa. ¹⁴ Mboli ilo ii bokota boya Mungu imbonangolomoko ta wenda bototina, loka lobaenise lilendelu ta wenda bototina. La ongoma liko litoya. ¹⁵ Loka lo'ingi, oko emboeneke'nu libimbi li ngandi, ani ebekaka bonangoli Tanyele, otaliomo ta eseke lotanu, mbo ono akatanga ekele la libangi! ¹⁶ Ongoma, bee bambombaka ya Yedeya batokimbiya ta longo; ¹⁷ ono ambombaka likolo li balele aimbosuluwa loka aose ye imbe ta mbele inde; ¹⁸ La ono ambombaka ta bilanga aimbobinowa ale lambisa loka ayaose koti inde. ¹⁹ Ngandi la bataali ba baeme la beke bambomwesaka ta be basiyo! ²⁰ Sombolakai mbo lokimbiyo lino loikomaka ta hivelia, ango ta lisiyo li Sabata. ²¹ Loka mbo, ngandi itomba ifi ta beke baitakaenaka we bomuna kota liakoli li wenda tiii kota kwani, ²² la, yomba mbo basio baiti, buto ango amoi aitouwa; loka, lo bachokolomu, bee basiyo batomba bachakolomu. ²³ Yomba mbo buto akaobekelo mbo Kilisito ambeke, la: Ambe onga, oi'imilaka. ²⁴ Loka mbo atoemalisa Kilisito ono bobe la banangoli babe-babe; batokela tokesa tofi-tofi la loka baseise baito, yomba mbo baengani, kola bachakolomu. ²⁵ Moilakai, lobeiseke'nu ko'felo. ²⁶ Yomba mbo batobeka lino: Moilakai, ambaka ta liombele, oikaka; moilakai, ambe ta bikende bi mbele, oi'imilakai. ²⁷ Kola ongoma, ani engala-ngalaka yo ta etomoelo lo lowa la oenisa kota elalelo lo lowa, yeke ndjo itomba tokesa to Wana a Buto. ²⁸ Ta eseke lomoi lotomba beliyo, elamo, etosondjamana noli ii tale. ²⁹ La mangu mbisa ii basiyo ba ngandi, lowa lokamba la lilima la bondofa ndoena ale liangangi, tolonge totokpa'se ofowa ta lobola, la befoka be bose betoma tale. ³⁰ Kola ongoma ndembe eya Wana a Buto etoenena ta lobola, beki betotina be nyele betolela, emboenaka bo Wana a Buto oya ta liumba li lobola la bofoka la taala ifi. ³¹ Atoenisa bekitomo binde la fanda ii lioi likama, la batosondje'ela ye bachakolomu bindi mia inati, kota lifaa li bose ta lifaa lisiya. ³² Ekisomokoi oengana ye iyosomu ta isandu. Loka mbo betaa binde beoya se, la mbo ngoto yo'otomowa, otoluwai mbo mbile inde eomba tina. ³³ Kola ongoma la ongoma, mbile etoene'nu ye ndjaso enyelakai mbo Wana a Buto aomba tina la boinda. ³⁴ Lotobeka lino wewe, we bofindi boimboeta ango imoi, ani itotina yeitokakoma. ³⁵ Lobola la nyele imboetaka, la ongoma baoi bange baimboeta ango imoi. ³⁶ Loka lo bee ba lowa la ba mbile, ango amoi aluwi, ango bekitomo ta bose, ango Wana, kola ongoma Afa ye angene aluwi. ³⁷ Yeke ikomaka ta mbile eya Nowa itokomele'nu oongoma etoya Wana a buto. ³⁸ Ta basiyo ba felo fela embaka baito balaka, bamwaka, basonganaka la basongisa bana bibo, kota lisiyo Nowa aotaka ta lisuwa; ³⁹ la baikaemaela la leka, ango lomoi, kota mbile eyaka fela ekatala bo batotina: Itomba ndenge emoi emboyaka Wana a Buto. ⁴⁰ Kola ongoma, baito baele batomba ta elanga, amoi ato'osomo la anomoi atotikala. ⁴¹ Bataali baele batolamba ta mbele, amoi atoosomo onomoi akotikala. ⁴² Umbakelakai, loka mbo oluwii lisiyo lie litoya la Ngene ino. ⁴³ Luwakai yo la weli, kembo boekesi bo mbele koluwaka mbo wiba botoya oya iba ye, ani atokuka la ani aitotika loka imbe mbele inde. ⁴⁴ Kola ongoma, enu aleko, mbakai tina, ta mbile etoya Wana a Buto ta mbile ene oitoenyelai ango. ⁴⁵ Oni ase bokuwi bolo-bolo la kalakala, ono boekesi akata ye likolo li be baito, loka lofaya bo bieka ta mbile e'engani? ⁴⁶ Limengo la we bokuwi, ono boekesi winde, ta lokomo linde, owanya atokela ongoma! ⁴⁷ Lotobeka lino wewe, atotaliya likolo lino batotina bieke bieka. ⁴⁸ Kola ongoma, yomba mbo imbe bokuwi bomoi bo tale, atobeka ye angene: Boekesi wange atoya la imongi, ⁴⁹ yomba mbo atonana la kendisani inde, akaola la akaomwa baana la balewi, ⁵⁰ boekesi bo bokuwi botoya lisiyo lieke amboka ango la mbile aimboluwa ango. ⁵¹ Ambo ambaka la biongo betuku be betuku, akofaya ebinde la loimo-imo: Elamo etomba la bileli la obunaka baino.