¹ Kola ongoma Yesu, akabeka la baito likama la baeki binde, akabeka mbo: ² Basoni la Bafalisai bangali se ta enangoelo loya Mose. ³ Kelakai la moilakai ye itobeka bo; la oikelakai osamisa bakuwa bibo. Loka mbo batobeka, la baitokela yo. ⁴ Bakakanda belito bakaeta, la kota batotoko la batolome, kola ongoma baikasama ango inekele iumane la yo. ⁵ Batokela bakuwa bibo batotina loka baenene kee baito. Kola ongoma, bokotola pilatele efi-efi, la bambaka la ndembe esa esa ta tulu ibo; ⁶ basami eseke lomoui lofelo-felo ta Fesetina, la engaelo lofelo-felo ta mbele eya Mungu; ⁷ basamaka ofayomo kalibo ta biseke bi baito babule, la otomo la baito Labi, Labi. ⁸ Enu oitotomoi Labi, loka koamoi ango ambe Boekesi wino, enu atotiona ombei banduku. ⁹ Ndo tai buto Afa eke ta wenda, loka amoi angoambe Ise ino, ono ambe ta likolo. ¹⁰ Ndo tomoi aleko Bangene, amoi ango ambe Ngene ino, ye Kilisito. ¹¹ Ono ambe bali aitenii ino atomba bokuwi wino. ¹² Ye ndai amboemalaka amboseisomoko, la ye ono atoseisomo amboemalisomoko. ¹³ Ngandi lino, basoni la Bafalisai baimi-imi! LOka mbo o'okandai baito loka lo bokota bo bose; oimbotai enuangene, la oimbotikai o'ota tabe bambe la yeme iota. ¹⁴ Ngandi lino basoni la Bafalisai baimi-imi! Loka mbo ofotai ta mbele ii bataali be bakaongbela batolome, la enu kokela la lolimboko basomboli basa-asa; loka lo yamo, otosambisomoi likama. ¹⁵ Ngandi lino basoni la Bafalisai baimi-imi! Loka mbo otokai mangu ta baye la ta nyele loka okelei Poloselite; la, ta mbile eyaka ye, okakelai wana amoi aya gehena mala yele koetenu. ¹⁶ Ngandi lino, basoni felo ba bangbei baiso! Ndai atobeka: Yomba mbo buto amoi alape ta tepelo, aikeli leka; kola ongoma, yamba mbo buto amoi alape loka aiwama atosomo ta likuwa. ¹⁷ Baotchango weli la bangbei baiso! Ndai aeteli bofi, litale liongala-ngala, la tepelo ene etotaanisa litale lingali-ngali? ¹⁸ Yomba mbo buto amoi, aobekele'nu lisiya, lolapo ta enangoelo, yeiti ango leka, kola ongoma, yomba mbo buto amoi aolapa loka lo lifaefi, lie limbe ta enangoelo atoosomo ta likuwa. ¹⁹ Buto akaongba baiso!Ini ndjo imbe ifi, bafaefi, lamba enangoelo la totoanisa lifaefi? ²⁰ Ye ono atolapa ta enangoelo alapeke ta enangoelo la batotina bee baiteli ale lla baenyeli; ²¹ ye ono atolapa ta tepelo alapeke ta tepelo la bee atouwa libo eseke lomoi; ²² ye ono atolapa ta lobola alapeke loka lo bokota boya Mungu la ye ono angali se. ²³ Ngandi lino basoni la Bafalisai, baimi-imi, loka mbo otolipai imoi ta liou la lilimbi, la otolikai ye imbe la litina lifi-lifi ta ekela, la boengani, la ngandi , la wewe: Yamo ndjo iyengani lino okela, ndolengetanisa bieka ango bimoi. ²⁴ Baandi felo ba bangbei baiso! Ndai achoweya tokoka, la ndai akamela kamela. ²⁵ Ngandi lino, basoni la Bafalisai baimi-imi! Loka mbo ototanisai eseke lo bolelamu la lolalise, la aiteni bawalisomo fuu bee baiti la botema bosa. ²⁶ Mofalisai bongbeli baiso! Taanaka mala ee felo-felo aiteni ii eseke lo lolelami la ndoena longo, ta mbo bee balousa loko baye batanisomo. ²⁷ Ngandi lino, basoni la Bafalisai baimi-imi! Loka mbo enu o'osondjamanai la mbeko ibe, itoenena bolo ete lousa, la bandai, aiteni, bambe fuuu la bangbei la tonanamatobe tototina. ²⁸ Enu aleko, ete lousa, ofaananai la baito, kola ongoma, aiteni, ombei fuu la limai-imi la losuwano. ²⁹ Ngandi lino, basoni la Bafalisai baimi-imi! Loka otolufiai ndembe baengani, ³⁰ la mbo enu otobekai: Yoma mbo enu ouwakai ta mbile ee baise biso, la toitofaya bo fofe mbo bakande linga la ngelo ii banangoli. ³¹ Enisakai oemaela enu angene mbo ombei bana babe baitaka banangoli. ³² Talimanakai la bakuwa ba baise bino. ³³ Fele, kee fele ee bangala! Loka loingi otoisamai ta lisomi li gehena? ³⁴ Loka lo ongoma, moilakai, loto'totomele'nu banangoli, beke baweli la basoni. Omboitakai bo la oto'omelisai bamoi, otoumai basiya totumbo ta mbele eya Mungu, la otokuchai bo lousa lo beki befi la ta beki befi, ³⁵ loka mbo itokpa likolo lino batotina ngelo ii bee baikeli lobeko, ngelo ii bo outama se ta nyele, kota ngelo iya Abeli ono aengani kota ngelo iya Sakayo, wana botolome aya Balasi, ono oitakai ye ta tepelo la enangoelo. ³⁶ Lotobeke lino wewe, yo itotina ikpelakase likolo li we bofindi. ³⁷ Yesusaleme, Yelusaleme, bandai bakaita banangoli la bakauma bo babuki bee batomelomoko bo, mala yanga losamaka osondje'nu bana bino, kee koko osondja bana binde sekala ii bapapu binde, la oikalangakai! ³⁸ Moilakai, mbele ino itotikala kee liombele; ³⁹ Ta mbile, lotobeka lino, oimboenenai ale lisiya, kota mbile etobeke'nu: Auchelomoko ono atoya la lina liya Ngene!