¹ Ekasila Yesu lobeko baoi be, akafowa ta Balilai la akaota ta botuku bo Yudeya, ta fangi ee Yaladene. ² Babule baumbakeli ye la akauwisa bo onga. ³ Bafalisai bakaya ambe ye, akapima ye la baoi mbo: Iyengani kofoya botaali la litina litotina? ⁴ Ye akabinoisa mbo: Oitakatangai mbo bokeli, akelaka bo botolome la botaali? ⁵ Akabeka loko mbo: Loka lo litina le, buto atotika ise inde la inango inde la atosondjamana linde la bo abaele batomba bindo bimoi. ⁶ Ongoma baiti ale baele baomba bindo bimoi. Ye ono Mungu aosila osola, tikakai buto ango amoi aikikoisaka yamo,. ⁷ Bakabeka linde mbo: Loka loingi Mose akalaka loka lo'ofaya ye lokasa loita libala la ofaya ye? ⁸ Akabeka libo mbo: Mose atike enu ofoyei bataali bino la bofoka ta betema bino, la ofowa ta felo-felo eitimba imbu ani. ⁹ Aotibeka lino mbo ye ono atofoya boali inde, loka lo bolefe, la akosonga boali bosiya ambe ono atokela ongoma aoshwa nyungo. ¹⁰ Baeki bakabeka linde mbo: Imba ongoma loa botolome la botaali, ye iyengani basongane! ¹¹ Ye akabeka libo mbo: Baito batotina baluwi otukumaela lioi, bo ango bakafayomo lio. ¹² Basiya bambe mikafili kota solo ii bainago bibo, la bambe ongoma mikafili be baito; la basiya bambe la mikafili loka lo bokota bo likolo. Tikaka mbo ono aluwi otukumaela lie, atukumaeleke lio. ¹³ Ongoma, bajaya ambe ye la bana bakikelike mbo atliye bao binde likolo libo loka asombole. Baeki bakamamila bo. ¹⁴ La ongoma Yesu akabeka mbo: Tikakai bainenge, baifekilaka bo loka mbo baye ambei. Loka mbo bokota bo likolo bombe wibo. ¹⁵ Akataliya bao binde likolo libo la bakafowa onga. ¹⁶ Moilaka, buto amoi akaya, akabeka linde mbo: Boekesi, boni bolo lokele loka lombe la liwawi li laya-laya? ¹⁷ Akabeka linde mbo: Loka loingi otofelisei loka lo bolo? Amoi ambe, ye ono bolo. Imba mbo asami ambe la liwawi li laya-laya, akukeke bieke bikela. ¹⁸ Yesu akabeka: Oi'itaka, oitchwaka nyongo; oi'ibaka; oibekaka lilendelu libe; samaka ise ao la inango ao, ¹⁹ la banduku bao batotina. ²⁰ Wana amoi botolome akabeka linde mbo: Lo'olitisa ye itotina. Ingi ikombe ase? Yesu akabeka linde mbo: Iomba mbo osami oengana ta bolo, kaaka oungise itotina ye imbe lao la isiya ofe la bee baiti la leka la otomba la bieka bilitina bilokolo, la yaoko oumbakelei. ²² Ekaoka wana lobeko lamo akafowa la ngandi loka akambaka la bieka bi bule. ²³ Yesu akabeka la baeki binde mbo: Lotobeka lino wewe mboimbe wale loka lo buto a bakute loka lo'ota ta bokota bo likolo. ²⁴ Lisiya lotobeka lino mbo: O'otisa la kamela ii lifola li liso li sindani imbe la lilewi loka llioti li buto a bakute ta bokota boya Mungu. ²⁵ Ekaokaka baeki onoma, bakamwala-mwala likama, bo mbo: Ndai, mia, aengani ouwa? ²⁶ Yeke akamoila bo la akabeka libo mbo: Baito baiyengani okela yamo, Mungu aengani okela yo. ²⁷ Petelo akabinoisa lioi, akabeka linde mbo: Moilaka, esu totike itotina to'umbakeli owe. Esu toto'anya ase ingi? ²⁸ Yesu akabeka libo mbo: Lotobeka lino wewembo: Lotokela kanikani, onga Wana a Buto atongala ta kiti inde ee bokota, enu bee okaosila oumbakekelei otongalai aleko ta kiti ee bokoto lioi la yele loka'osambisei befindi liou la yele be Isalaele. ²⁹ Ye ndai akatika mbele, akatika banduku batolome, bawelo bataali, akatika ise inde la inango inde, akatika bana, akatika bilanga loka lo lina li'ange, ato'anya mala likama la ato'anya liwawi li laya-laya. ³⁰ La babule bee bambe mbisa batomba ba felo-felo.